ਵਧਾਈ

ਦਾਜ ਤੋਂ ਲੜਾਈ
ਖਾਣਾ ਛੱਡ ਬਰਾਤੀ ਭੱਜੇ
ਲਾਗੀ ਬਿਨਾਂ ਵਧਾਈ

ਗੁਰਮੀਤ ਸੰਧੂ

ਤਲਾਕ

ਮੀਆਂ-ਬੀਵੀ ਦਾ ਤਲਾਕ
ਜੱਜ ਪੁੱਛੇ ਬੱਚੇ ਨੂੰ –
ਤੂੰ ਮਾਂ ਵੱਲ ਜਾਂ ਬਾਪ ਵੱਲ

ਸੁਰਿੰਦਰ ਸਪੇਰਾ

ਜੋੜ ਮੇਲਾ

ਸ਼ਹੀਦੀ ਜੋੜ ਮੇਲਾ
ਲੰਘੀ ਸੰਗਤ ਨੂੰ ਚੀਰ
ਸੰਤ ਜੀ ਦੀ ਗੱਡੀ

ਹਰਵਿੰਦਰ ਤਤਲਾ

ਲਿਪਸਟਿਕ

ਧੀ ਨੂੰ ਰੋਕੇ
ਲਿਪਸਟਿਕ ਲਾਉਣ ਤੋਂ
ਵੇਸਵਾ ਮਾਂ

ਮੋਹਿੰਦਰਪਾਲ ਬੱਬੀ

ਐਨਕ ਦੀ ਡੰਡੀ

ਦੇ ਕੇ ਮਰੋੜੀ
ਅੰਮਾਂ ਨੇ ਐਨਕ ਦੀ ਡੰਡੀ
ਧਾਗੇ ਨਾਲ ਜੋੜੀ

ਅਮਰਾਓ ਗਿੱਲ

ਰਸ ਮਲਾਈ

ਘਰ ਆਇਆ ਜਵਾਈ
ਸਹੁਰਾ ਦਿਖਾਵੇ ਯੁੱਧ ਮੈਡਲ
ਸੱਸ ਪਰੋਸੇ ਰਸ ਮਲਾਈ

ਸੰਜੇ ਸਨਨ

ਪਰਦੇਸ

ਪਰਦੇਸ :
ਪਤੀ ਕੰਮ ਤੋਂ ਆਵੇ,
ਪਤਨੀ ਜਾਵੇ

ਜਤਿੰਦਰ ਲਸਾੜਾ

ਫਿੱਡੀ ਜੁੱਤੀ

ਧੂੜਾਂ ਲੱਤੀ ਟੁੱਟੀ ਭੱਜੀ

ਬਿਨ ਪਤਾਵੇ ਫਿੱਡੀ ਜੁੱਤੀ

ਪਈ ਘੁਰਾੜਿਆਂ ਥੱਲੇ

ਚਰਨ ਗਿੱਲ

ਰੋਹ

ਲਾਲ ਮੂੰਹ ਵਾਲਾ
ਕਾਲਾ ਝੰਡਾ ਵਿਖਾਵੇ
ਚਿੱਟੇ ਕੁੜਤੇ ਵਾਲੇ ਨੂੰ

ਹਰਿੰਦਰ ਅਨਜਾਣ

ਪਾਟੀ ਚੁੰਨੀ

ਧੀ ਪੇਕੇ ਆਈ
ਘੁੱਟ ਸੀਨੇ ਲਾ ਮਾਂ ਨੇ
ਪਾਟੀ ਚੁੰਨੀ ਲੁਕਾਈ

ਸੰਜੇ ਸਨਨ

ਲਾਵਾਂ ਦਾ ਸੂਟ

ਵੀਹ ਸਾਲ ਪੁਰਾਣਾ
ਲਾਵਾਂ ਦਾ ਸੂਟ
ਗਿਣਦੀ ਜ਼ਰੀ ‘ਤੇ ਤਰੇੜਾਂ

ਅਨੂਪ ਬਾਬਰਾ

ਘੁੱਟਿਆ ਹੱਥ

ਧੜਕੇ ਦਿਲ

ਛੁਡਾਕੇ ਤੁਰਿਆ

ਘੁੱਟਿਆ ਹੱਥ

ਕੁਲਜੀਤ ਬਰਾੜ

ਸੱਖਣਾ ਪੈੰਡਾ

ਕੰਧ ਤੇ ਔਂਸੀਆਂ
ਬੂਹੇ ਵੱਲ ਨੈਣ
ਪੈਂਡਾ ਸਖਣਾ

ਅਰਵਿੰਦਰ ਕੌਰ

ਚੱਕਰ ‘ਚੋਂ ਚਿਹਰਾ

ਪੱਠੇ ਕੁਤਰਦਾ ਰੁਕਿਆ
ਚੱਕਰ ਵਿਚੋਂ ਵੇਖ ਰਿਹਾ
ਰੁੱਗ ਲਾਉਂਦੀ ਦਾ ਮੁਖੜਾ

ਹਰਵਿੰਦਰ ਸਿੰਘ ਧਾਲੀਵਾਲ

ਸਨਮਾਨ ਚਿੰਨ

ਗੁਰੂ ਘਰ :

ਸਨਮਾਨ ਚਿੰਨ ਲੈਣ ਲੱਗਾ

ਕਰੇ ਉੱਪਰ ਮੁੱਛਾਂ

ਪਰਮੈਂਦੇ ਸਿੰਘ ਸੋਢੀ

ਖਾਲੀ ਠੂਠਾ

ਖਾਲੀ ਠੂਠਾ
ਭਰੀਆਂ ਅੱਖਾਂ
ਮੂੰਹ ‘ਚ ਅੰਗੂਠਾ

ਸਰਬਜੋਤ ਸਿੰਘ ਬਹਿਲ

ਸਾਂਝੀ ਕੰਧ

ਘਰ ਵਿਚਕਾਰਲੀ

ਕੰਧ ਨਾਲ ਢੋਅ ਲਾਈ

ਬੈਠਾ ਬਾਪੂ

ਹਰਵਿੰਦਰ ਧਾਲੀਵਾਲ

ਸਲ੍ਹਾਬੇ ਨੈਣ

ਜਾਂਦੀ ਗੱਡੀ

ਮੁੜ ਮੁੜ ਵੇਖਣ

ਨੈਣ ਸਲ੍ਹਾਬੇ

ਤੇਜੀ ਬੈਨੀਪਾਲ

ਲਾੜੀ

ਤਬਲੇ ਦੀ ਥਾਪ-
ਥਿੜਕ ਰਿਹਾ ਪ੍ਰਕਰਮਾ ਵੇਲੇ
ਲਾੜੀ ਦਾ ਪੈਰ

ਗੁਰਮੀਤ ਸੰਧੂ