Category Archives: ਸੁਰਮੀਤ ਮਾਵੀ

ਖੁਸ਼ਬੋਈ

09 ਐਤਵਾਰ ਸਤੰ. 2012

Posted by in ਕੁਦਰਤ/Nature, ਖੁਸਬੋ/smell, ਵਰਖਾ, ਸੁਰਮੀਤ ਮਾਵੀ

≈ ਟਿੱਪਣੀ ਕਰੋ

ਸਕੂਲ ਦੇ ਦਿਨਾਂ ਚ ਗਰਮੀਆਂ ਦੀਆਂ ਛੁੱਟੀਆਂ ‘ਚ ਨਾਨਕੇ ਫੇਰੀ ਦੇ ਦ੍ਰਿਸ਼ ਅੱਜ ਵੀ ਚੇਤਿਆਂ ‘ਚ ਓਵੇਂ ਦੇ ਓਵੇਂ ਪਏ ਨੇ… ਨਾਨਾਜੀ ਫੌਜ ‘ਦੀ ਨੌਕਰੀ ਦੌਰਾਨ ਕਈ ਸਾਲ ਮਧ ਪ੍ਰਦੇਸ਼ ਚ ਰਹੇ, ਰਿਟਾਇਰਮੈਂਟ ਤਕ… ਮਗਰੋਂ ਓਥੇ ਹੀ ਵਸ ਗਏ ਸਨ… ਕੋਰੀ ਅਨਪੜ੍ਹ, ਸਿਧੀ ਸਾਦੀ ਦੁਆਬਣ ਨਾਨੀ ਅਧਿਓਂ ਵਧ ਉਮਰ ਓਥੇ ਰਹਿ ਕੇ ਵੀ ਹਿੰਦੀ ਬੋਲਣੀ ਨਾ ਸਿਖੀ… ਓਹਦੇ ‘ਯਹਾਂ’ ਨੂੰ ‘ਹੀਆਂ’ ਤੇ ਵਹਾਂ ਨੂੰ ‘ਹੁਆਂ’ ਕਹਿਣ ਤੇ ਅਸੀਂ ਮੁਸ਼ਕੜੀਏਂ ਹੱਸਣਾ… ਸੁੱਚਮ ਦਾ ਬੜਾ ਖਿਆਲ ਰਖਦੀ… ਮੈਂ ਹਮੇਸ਼ਾ ਘੜੇ ਚੋਂ ਪਾਣੀ ਲੈਕੇ ਓਥੇ ਹੀ ਖੜ੍ਹਾ ਪੀਣ ਲਗਦਾ ਤੇ ਹਮੇਸ਼ਾ ਉਹ ਗੁੱਸੇ ਚ ਭਰ ਕੇ ਮੈਨੂੰ ਭੱਜ ਕੇ ਪੈਂਦੀ… “ਦਾਦੇ ਮਘਾਉਣੇ” ਉਹਦੀ ਮਨਪਸੰਦ ਗਾਹਲ, ਤੇ ਇਹ ਸੁਣਨ ਲਈ ਨਾਨੀ ਨੂੰ ਕਿਸੇ ਵੀ ਬਹਾਨੇ ਖਿਝਾਉਣਾ ਮੇਰੀ ਮਨਪਸੰਦ ਖੁਰਾਫਾਤ… ਪਰ ਦਿਨ ਭਰ ਦੀਆਂ ਸ਼ਰਾਰਤਾਂ ਤੋਂ ਥੱਕ ਕੇ ਜਦ ਮੈਂ ਨਾਨੀ ਕੋਲ ਆਉਣਾ ਤੇ ਉਹਨੇ ਮੈਨੂੰ ਆਪਣੇ ਕਾਲਜੇ ਨਾਲ ਲਾ ਕੇ ਮੇਰੀਆਂ ਦਿਨ ਦੀਆਂ ਸ਼ਰਾਰਤਾਂ ‘ਤੇ ਹੱਸਣਾ ਤਾਂ ਲਗਦਾ ਸੀ ਕਿ ਦੁਨੀਆ ਚ ਇਹਤੋਂ ਸੁਹਣੀ ਨਾਨੀ ਕਿਸੇ ਦੀ ਹੋ ਨਹੀਂ ਸਕਦੀ… ਮੈਂ ਵੀ ਹੱਸ ਪੈਣਾ… ਉਹਦੀ ਫ੍ਰੇਮ ਚ ਜੜੀ ਫੋਟੋ ਹੱਸਦੀ ਤਾਂ ਭਾਵੇਂ ਨਹੀਂ ਹੈ ਲੇਕਿਨ ਜਦੋਂ ਵੀ ਉਹ ਫੋਟੋ ਦੇਖਦਾ ਹਾਂ ਤਾਂ ਨਾਨੀ ਦਾ ਚਿਹਰਾ ਓਵੇਂ ਹੀ ਜਿਉਂਦਾ ਜਾਗਦਾ ਲੱਗਦਾ ਹੈ…

ਨਿੱਕੀ ਨਿੱਕੀ ਕਣੀ –
ਨਾਨੀ ਦੇ ਖਿੜੇ ਚਿਹਰੇ ਦੁਆਲੇ
ਚੰਦਨ ਦੀ ਖੁਸ਼ਬੋਈ

ਸੁਰਮੀਤ ਮਾਵੀ

ਮੋਚੀ

11 ਸ਼ਨੀਵਾਰ ਅਗ. 2012

Posted by in ਕੁਦਰਤ/Nature, ਜੀਵਨ/Life, ਧੰਦੇ, ਬੁਢਾਪਾ, ਸੁਰਮੀਤ ਮਾਵੀ, ਹਾਇਬਨ/Haibun

≈ ਟਿੱਪਣੀ ਕਰੋ

ਲੋਹੜੇ ਦੀ ਗਰਮੀ… ਹਾੜ੍ਹ ਦੀ ਧੁੱਪ ਤੇ ਹਵਾ ਐਨੀ ਕੁ ਕਿ ਪੱਤਾ ਨਾ ਹਿੱਲੇ… ਮੈਂ ਚੰਡੀਗੜ੍ਹ ਦੇ ਲੋਕਲ ਬਸ ਅੱਡੇ ‘ਤੇ ਬਸ ਦੀ ਉਡੀਕ ਕਰ ਰਿਹਾ ਸੀ… ਬਸ ਆਉਣ ਨੂੰ ਹਾਲੇ ਸਮਾਂ ਹੈ ਸੀ… ਇੱਕ ਬਜ਼ੁਰਗ ਮੋਚੀ ਦਿਸਿਆ ਤੇ ਮੈਂ ਸਮੇਂ ਦੀ ਵਰਤੋਂ ਆਪਣੇ ਜੁੱਤੇ ਪਾਲਿਸ਼ ਕਰਵਾਕੇ ਕਰਨ ਦੀ ਸੋਚੀ… ਬਾਬੇ ਨੇ ਵੀ ਪੂਰੀ ਰੀਝ ਨਾਲ ਜੁੱਤੇ ਝਾੜੇ, ਪਾਲਿਸ਼ ਲਾਈ ਤੇ ਚਮਕਾਉਣ ਲੱਗ ਪਿਆ… ਇੱਕ ਜੁੱਤਾ ਚਮਕ ਜਾਣ ਤੋਂ ਬਾਅਦ ਦੂਜੇ ਦਾ ਕੰਮ ਜਦੋਂ ਹਾਲੇ ਪੂਰਾ ਹੋਣ ਹੀ ਵਾਲਾ ਸੀ ਤਾਂ ਓਹਦੇ ਮਥੇ ਤੋਂ ਇੱਕ ਤੁਪਕਾ ਮੁੜ੍ਹਕੇ ਦਾ ਡਿੱਗ ਪਿਆ ਤੇ ਤੇਜੀ ਨਾਲ ਹੇਠਾਂ ਵੱਲ ਵਗ ਪਿਆ… ਇੱਕ ਪਲ ਦੇ ਲਈ ਮੁੜਕੇ ਦਾ ਉਹ ਤੁਪਕਾ ਧੁੱਪ ਚ ਲਿਸ਼ਕਿਆ ਤੇ ਫਿਰ ਗੁਆਚ ਗਿਆ

ਬੁਢੇ ਮੋਚੀ ਦਾ ਮੁੜ੍ਹਕਾ –
ਜੁੱਤੇ ਦੀ ਨੋਕ ‘ਤੇ ਲਿਸ਼ਕੀ
ਹਾੜ੍ਹ ਦੀ ਧੁੱਪ

ਸੁਰਮੀਤ ਮਾਵੀ

9 ਹਾਇਕੂ ਅਤੇ 1 ਤਾਨਕਾ

17 ਮੰਗਲਵਾਰ ਜਨ. 2012

Posted by in ਕੁਦਰਤ/Nature, ਜੀਵਨ/Life, ਸੁਰਮੀਤ ਮਾਵੀ

≈ 1 ਟਿੱਪਣੀ

ਨੀਲਾ ਚਿੱਟਾ ਅੰਬਰ –
ਪੰਛੀ ਪਤੰਗ ਜਹਾਜ਼ ਧੂਆਂ
ਹਾਲੇ ਥਾਂ ਖਾਲੀ 
—
ਢਲਦੀ ਸਿਆਲ ਦੀ ਧੁੱਪ –
ਗੁਲਦਾਉਦੀ ਦੇ ਪਿਛੇ ਲਿਸ਼ਕਣ 
ਗੁਲਾਬ ‘ਤੇ ਨਿੱਕੀਆਂ ਕਰੂੰਬਲਾਂ 
—-

ਨਿੱਕੀ ਨਿੱਕੀ ਕਣੀ 
ਪੱਤਾ ਪੱਤਾ ਧੋ ਰਹੀ
ਖਤ ਨੇ ਹੰਝੂ ਬੋਚਿਆ 
—–
ਹਉਕਾ ਭਰਿਆ 
ਨਜ਼ਰ ਚੁਰਾ ਕੇ ਆਖਿਆ 
ਚੰਗਾ ਰੱਬ ਰਾਖਾ 
—-
ਆਖਰੀ ਰਾਤ ਪੋਹ ਦੀ –
ਬੂਹੇ ਨੂੰ ਕੁੰਡਾ ਵੱਜਿਆ ਹੋਇਆ 
ਅੱਖ ਖੁੱਲੀ ਚੁਪੱਟ
—-
ਲੋਹੜੀ –
ਦਿਨ ਖਿੜਿਆ ਖਿੜਿਆ 
ਮੰਗਤਿਆਂ ਦੀ ਬਸਤੀ 
—-
ਸੂਰਜ ਹੋਰ ਮਘਿਆ 
ਬਾਰੀਆਂ ਖੁੱਲ੍ਹੀਆਂ ਅੱਖਾਂ ਬੰਦ 
ਹਾਲੇ ਹਨੇਰਾ ਨਹੀਂ ਗਿਆ 
—-
ਬੱਦਲਾਂ ਵਿਚ ਜਹਾਜ਼ 
ਖੇਤ ਵੇਖ ਹਉਕਾ ਭਰਿਆ
ਮੂੰਹ ਫੇਰ ਅੱਖਾਂ ਮੀਟੀਆਂ 
— 
ਸੁੱਜੇ ਅੱਖਾਂ ਦੇ ਕੋਏ
ਚੰਨ ਓਹਲੇ ਚਿੱਟੀ ਬਦਲੋਟੀ 
ਵੇਖੇ ਚਿੱਟੀ ਚੁੰਨੀ ਵਾਲੀ 
—-
ਤਾਨਕਾ :-

ਲੋਹੜੀ ਦਾ ਦਿਨ 
ਗਲੀ ਬਜ਼ਾਰ ਮੈਲੇ ਬੱਚੇ 
ਹਥ ਖੀਸੇ ਨਾ ਪਾਂਵਾਂ 
ਮਨ ਚ ਬਟੂਆ ਟੋਹ 
ਝੂਠੀ ਖਿਝ ਦਖਾਵਾਂ

ਸੁਰਮੀਤ ਮਾਵੀ

ਕਣਕ

19 ਸੋਮਵਾਰ ਦਸੰ. 2011

Posted by in ਕੁਦਰਤ/Nature, ਜੀਵਨ/Life, ਫਸਲ, ਸੁਰਮੀਤ ਮਾਵੀ

≈ ਟਿੱਪਣੀ ਕਰੋ

ਕਣਕ ਨਿੱਸਰੀ ਦੇਖਦਾ
ਚੁਪ ਚਾਪ ਦਾੜ੍ਹੀ ਖੁਰਕਦਿਆਂ
ਉਂਗਲਾਂ ਤੇ ਕੁਝ ਗਿਣ ਰਿਹਾ
…
Kanak nissri dekhda
Chupchaap Daadhi khurkdeyaan
Unglaan te kujh gin reha

ਸੁਰਮੀਤ ਮਾਵੀ

ਸੁਰ-ਸੰਗਮ

15 ਵੀਰਵਾਰ ਦਸੰ. 2011

Posted by in ਕੁਦਰਤ/Nature, ਦਰਿਆ, ਸੁਰਮੀਤ ਮਾਵੀ, ਹਾਇਗਾ/Haiga

≈ 2 ਟਿੱਪਣੀਆਂ

ਸੁਰਮੀਤ

 

ਇੱਕੋ ਰੰਗ ਰੂਪ ਇੱਕੋ ਚਾਲ ਢਾਲ
ਪਹਾੜਾਂ ਦੇ ਪੈਰੀਂ ਸਰਯੂ ਚ ਰਲੀ
ਗੋਮਤੀ ਸਰਯੂ ਬਣ ਗਈ … —-
 Ikko rang roop Ikko chaal dhaal
Pahaadaan de paireen Sarayu ch rali
Gomti Sarayu ban gaee

ਮੁਨਿਆਰੀ

12 ਸੋਮਵਾਰ ਦਸੰ. 2011

Posted by in ਪੰਜਾਬ/Punjab, ਰੀਤੀ ਰਿਵਾਜ, ਸੁਰਮੀਤ ਮਾਵੀ, ਹਾਇਗਾ/Haiga

≈ ਟਿੱਪਣੀ ਕਰੋ

ਸੁਰਮੀਤ ਮਾਵੀ

ਵੇਚਣ ਗਾਨੀਆਂ ਚੂੜੀਆਂ
ਵੇਖਦੇ ਲੰਘਦੇ ਰਾਹੀਆਂ ਵੱਲ
ਇੱਕ ਦੂਜੇ ਵੱਲ ਵੇਖਣ ਨਾ
…
Vechan Gaaniyaan Choodiyaan
Vekhde Langhde Rahiyaan Vall
Ikk Dooje Vall Vekhan Na

ਸੁਰਮੀਤ ਮਾਵੀ ਦੇ ਦੋ ਹਾਇਕੂ

25 ਸ਼ੁੱਕਰਵਾਰ ਨਵੰ. 2011

Posted by in ਜੀਵਨ/Life, ਯਾਦਾਂ, ਸੁਰਮੀਤ ਮਾਵੀ

≈ 1 ਟਿੱਪਣੀ

ਅੱਖ ਗਲੀ ਤੇ

ਹੱਥ ਕਾਲਜੇ 

ਟੀ ਵੀ ‘ਤੇ ਖਬਰਾਂ

————–

ਖ਼ਤ ਪੁਰਾਣੇ

ਲਕੋ ਕੇ ਰੱਖੀ ਫੋਟੋ

ਇੱਕ ਰੁਮਾਲ

ਸੁਰਮੀਤ ਮਾਵੀ

ਸੁਰਮੀਤ ਮਾਵੀ ਦੇ 3 ਹਾਇਕੂ

20 ਐਤਵਾਰ ਨਵੰ. 2011

Posted by in ਕੁਦਰਤ/Nature, ਜੀਵਨ/Life, ਮਾਂ, ਸੁਰਮੀਤ ਮਾਵੀ

≈ ਟਿੱਪਣੀ ਕਰੋ

ਹੱਥ ਪੁੱਤ ਦੀ ਫੋਟੋ…
ਸੜਕ ਪਾਰ ਕਰਾ ਰਿਹਾ
ਲੈਬ੍ਰਾਡੋਰ ਕੁੱਤਾ

ਕੈਟੇਗਰੀਜ਼: ਜੀਵਨ, ਮਾਂ।

ਅਖਬਾਰ ਮੇਜ਼ ਤੇ
ਐਨਕ ਟੁੱਟੀ ਹੋਈ
ਚੇਹਰੇ ਤੇ ਮੁਸਕਾਨ

ਕੈਟੇਗਰੀਜ਼: ਜੀਵਨ

ਰਿਸ਼ਮ ਸੁਨਹਿਰੀ
ਤੁਪਕਾ ਬੇਰੰਗ ਪਾਣੀ ਦਾ
ਅੱਖ ਸਤਰੰਗੀ…

ਕੈਟੇਗਰੀਜ਼: ਕੁਦਰਤ 

ਸੁਰਮੀਤ ਮਾਵੀ