ਸਫੈਦਾ

ਬੁੱਢਾ ਬੋਹੜ –
ਖਹਿ ਕੇ ਤਾਂਹ ਵਧਿਆ 
ਬਚੂੰਗੜਾ ਸਫੈਦਾ

ਅੰਬਰੀਸ਼

ਇਸ਼ਤਿਹਾਰ

ਗਿਲਹਰੀ گِلہری

ਰੁੱਖ ਸੁੱਤੀ ਗਿਲਹਰੀ
ਮੀਂਹਧੁੱਪੀ ਰਾਤ ਚਾਨਣੀ
ਪਿੰਡੋਂ ਦਿਸੇ ਹਿਮਾਲਾ

رُکھ سُتی گِلہری
مینہہ۔دُھپی رات چاننی
پِنڈوں دِسے ہِمالہ

ਅੰਬਰੀਸ਼ امبریش 

ਫੋਨ

ਪਿੰਡੋਂ ਫੋਨ ਆਇਆ
ਭਤੀਜਾ ਬੋਲੇ
ਪਿਛੇ ਚਿੜੀਆਂ ਚਹਿਕਣ

ਅੰਬਰੀਸ਼ 

ਕੇਸਰੀ ਫੁੱਲ کیسری پھلّ

ਦੁਪਹਿਰੀਂ ਪਰਤਾਂਗਾ

ਹੂੰਝੇ ਹੋਣਗੇ ਹਰਸਿੰਗਾਰ ਥੱਲਿਓਂ

ਨੰਨ੍ਹੇ ਕੇਸਰੀ ਫੁੱਲ

ਅੰਬਰੀਸ਼

دوپیہریں پرتانگا
ہونجھے ہونگے ہرسنگار تھلیوں
ننھے کیسری پھلّ

 

امبریش

ਕੰਬਣੀ کمبنی

ਹੱਡ ਠਾਰਦੀ ਕੰਬਣੀ

ਚੜ੍ਹੇ ਬੁਖਾਰ ਮੈਨੂੰ

ਚੇਤੇ ਬਿਰਧ ਬਾਪ

ਅੰਬਰੀਸ਼

ہڈّ ٹھاردی کمبنی
چڑھے بخار مینوں
چیتے بردھ باپ

امبریش

ਬੋਟ

ਘੁੱਗੀ ਪਾਇਆ ਆਲ੍ਹਣਾ

ਬੋਟਾਂ ਦੀ ਉਡਾਰੀ ਤਾਈਂ

ਬੰਦ ਰਹੁ ਬੈਠਕ ਦਾ ਬੂਹਾ

ਅੰਬਰੀਸ਼

ਮਹਿਮਾਨ مہمان

ਅੱਧੀ ਰਾਤ ਖਾਣ-ਮੇਜ਼ ਤੇ

ਬੇਤਰਤੀਬੇ ਨਿੱਕੇ ਵੱਡੇ ਡੱਬੇ

ਗੱਲੀਂ ਲੱਗੇ ਮਹਿਮਾਨ

ਅੰਬਰੀਸ਼

ادھی رات کھان-میز تے
بے ترتیبے نکے وڈے ڈبے
گلیں لگے مہمان

امبریش
شاہ مُکھی روپ : جسوندر سِنگھ
ਸ਼ਾਹਮੁਖੀ ਰੂਪ : ਜਸਵਿੰਦਰ ਸਿੰਘ

ਸੁਫ਼ਨਾ سُفنہ

ਸੁਫ਼ਨੇ ਅੰਦਰ

ਪਿੰਡ ਨੇੜਲਾ ਦਰਿਆ

ਮੁੜ ਨੀਲਾ – ਹਰਾ

ਅੰਬਰੀਸ਼

سُفنے اندر
پنڈ نیڑلا دریا
مڑ نیلا – ہرا

امبریش
شاہ مُکھی روپ : جسوندر سنگھ
ਸ਼ਾਹਮੁਖੀ ਰੂਪ : ਜਸਵਿੰਦਰ ਸਿੰਘ

ਵੱਡੀ ਕੋਠੀ وڈی کوٹھی

ਗਰਮੀਆਂ ਸਰਦੀਆਂ ਸੱਖਣੀ

ਬਾਲਕੋਨੀ ਸੜਕ ਵੱਲ

ਲਾਲਪੱਥਰੀ ਵੱਡੀ ਕੋਠੀ ਦੀ

ਅੰਬਰੀਸ਼

گرمیاں سردیاں سکھنی
بالکونی سڑک ولّ
لالپتھری وڈی کوٹھی دی

امبریش
شاہ مُکھی روپ : جسوندر سنگھ
ਸ਼ਾਹਮੁਖੀ ਰੂਪ : ਜਸਵਿੰਦਰ ਸਿੰਘ

ਬਸੰਤੀ ਧੁੱਪ بسنتی دھُپّ

ਬਸੰਤੀ ਧੁੱਪ ਚ ਬੈਠ ਗਿਆ

ਮੈਂ ਸੱਤਪੱਤੀਏ ਬਿਰਖ ਲਾਗੇ

ਉਹਨੂੰ ਵੇਖਣ ਵਾਸਤੇ

ਅੰਬਰੀਸ਼

بسنتی دھُپّ چ بیٹھ گیا
میں ستپتیئے برکھ لاگے
اوہنوں ویکھن واسطے

امبریش
شاہ مُکھی روپ : جسوندر سنگھ
ਸ਼ਾਹਮੁਖੀ ਰੂਪ : ਜਸਿਵੰਦਰ ਸਿੰਘ

ਮੀਂਹਧੁੱਪੀ ਰਾਤ مینہہ۔دُھپی رات

ਰੁੱਖ ਸੁੱਤੀ ਗਿਲਹਰੀ

ਮੀਂਹਧੁੱਪੀ ਰਾਤ ਚਾਨਣੀ

ਪਿੰਡੋਂ ਦਿਸੇ ਹਿਮਾਲਾ

ਅੰਬਰੀਸ਼

رُکھ سُتی گِلہری
مینہہ۔دُھپی رات چاننی
پِنڈوں دِسے ہِمالہ

امبریش
شاہ مُکھی روپ : جسوِندر سِنگھ

ਸ਼ਾਹਮੁਖੀ ਰੂਪ : ਜਸਵਿੰਦਰ ਸਿੰਘ

ਐਸੀ ਲਿਪੀ ایسی لپی

ਮੂੰਹਨੇਰ੍ਹਾ ਚਿੜੀ ਚੂਕੀ

ਸ਼ਿਲਾਲੇਖ ‘ਤੇ ਐਸੀ ਲਿਪੀ

ਮੈਂ ਪੜ੍ਹ ਨਾ ਸਕਿਆ

ਅੰਬਰੀਸ਼

مونہنیرھا چڑی چوکی
شِلالیکھ ‘تے ایسی لپی
میں پڑھ نہ سکیا

امبریش
شاہ مُکھی روپ : جسوِندر سِنگھ
ਸ਼ਾਹਮੁਖੀ ਰੂਪ : ਜਸਵਿੰਦਰ ਸਿੰਘ

ਡੀ ਜੇ ڈی جے

ਹਾਲ ਹਿੱਲੇ ਡੀ ਜੇ ਨਾਲ਼

ਮਮੋਲੀਆਂ ਘਾਹ ‘ਤੇ

ਕਿੰਗਫਿਸ਼ਰ ਤਾਰ ‘ਤੇ

ਅੰਬਰੀਸ਼

حالَ ہلے ڈی جے نال
ممولیاں گھاہ ‘تے
کِنگپھشر تار ‘تے

امبریش
شاہ مُکھی روپ : جسوِندر سِنگھ
ਸ਼ਾਹਮੁਖੀ ਰੂਪ : ਜਸਵਿੰਦਰ ਸਿੰਘ

ਛਾਵਾਂ

ਰੁੱਖਾਂ ਦੀਆਂ ਛਾਵਾਂ

ਤੱਕਾਂ ਸੁਭਾ ਸ਼ਾਮ

ਬਦਲ ਦੀਆਂ ਥਾਵਾਂ

ਅੰਬਰੀਸ਼

رُّکھاں دِیاں چھاواں
تّکاں صُبح شام
بدلدِیاں  تھاواں

امبرِیش
شاہ مُکھی روپ : جسوِندر سِنگھ

ਸ਼ਾਹਮੁਖੀ ਰੂਪ : ਜਸਵਿੰਦਰ ਸਿੰਘ

 

ਸ਼ਬਦ ਜਨਮ

ਤਿੜ ਤਿੜ ਚਿਰ ਚਿਰ

ਪੈਂਦੀਆਂ ਕਣੀਆਂ ਭਾਂਬੜ ‘ਤੇ

ਹੋਰ ਸ਼ਬਦ ਜਨਮਦੇ

ਅੰਬਰੀਸ਼

ਘੁੰਮਣੀ ਕੁਰਸੀ

ਵੱਭਵੀਂ ਕੁਰਸੀ ਬੈਠ

ਹੋਰ ਵੀ ਸੁਹਣੇ ਲੱਗਣ

ਅਮਲਤਾਸ਼ ਤੇ ਲਾਅਨ

ਅੰਬਰੀਸ਼

ਜਲੇਬੀਆਂ

ਹਲਵਾਈ ਦੀ ਹੱਟੀ

ਖਾਵਾਂ ਗਰਮ ਜਲੇਬੀਆਂ

ਝਾਕੇ ਕੁੱਤਾ ਗਲ਼ੀ ਦਾ

ਅੰਬਰੀਸ਼

ਧੜਕਣ

ਅੱਧੀ ਰਾਤੀਂ ਸੁਣਾਂ

ਨਾਲ਼ ਸੁੱਤਾ ਪਰਨਾਈ ਦੇ

ਕਿਸ ਦੇ ਦਿਲ ਦੀ ਧਕਧਕ

ਅੰਬਰੀਸ਼

ਟੁੱਟਿਆ ਤਾਰਾ

ਟੁੱਟਿਆ ਪੱਤਾ

ਡਿੱਗਿਆ ਜ਼ਮੀਨ ‘ਤੇ

ਤਾਰਾ ਬਲੈਕ ਹੋਲ ‘ਚ

ਅੰਬਰੀਸ਼

ਦੋਚਿੱਤੀ

ਅਮ੍ਰਿਤ ਵੇਲ਼ੇ ਮੀਂਹ

ਸੋਚਾਂ ਸੁਣਾਂ ਗੁਰਬਾਣੀ

ਕਿ ਆਵਾਜ਼ ਮੀਂਹ ਦੀ

ਅੰਬਰੀਸ਼

ਮਮੋਲੀਆਂ

ਮੇਰਿਜ ਪੈਲੇਸ ਸੰਗੀਤ

ਧਮਕ ਦਿਲ ਨੂੰ ਪਵੇ –

ਮਮੋਲੀਆਂ ਚੁਗਣ ਚੁੱਪ ਚਾਪ

ਅੰਬਰੀਸ਼

ਡੂੰਘੇ ਸਾਹ

ਸਾਨਤੋਕਾ ਦਾ ਹਾਇਕੂ  ਪੜ੍ਹਾਂ

‘ਜਿਉਂਦੇ ਹੋਣ ਦੀ ਖੁਸ਼ੀ ’ਚ’

ਮੈਂ ਡੂੰਘਾ ਸਾਹ ਭਰਾਂ

ਅੰਬਰੀਸ਼

ਹਾਇਕੂ ਸਿਰਜਣਾ

ਅੱਧੀ ਰਾਤੀਂ ਖਾਣ-ਮੇਜ਼ ‘ਤੇ

ਬੇਤਰਤੀਬੇ ਡੱਬੇ ਸਾਂਭਾਂ…

ਮੈਨੂੰ ਸੁੱਝੇ ਹਾਇਕੂ

ਅੰਬਰੀਸ਼

ਤਰਿਹਾਏ ਬੂਟੇ

ਸਰਦੀ ਰੁੱਤੇ

ਗਮਲਿਆਂ ਵਿਚ

ਤਰਿਹਾਏ ਬੂਟੇ

ਅੰਬਰੀਸ਼

ਆਵੇ ਜਾਂ ਜਾਵੇ

ਖੜ੍ਹਾ ਸੋਚਾਂ ਇਹ

ਬਸਤੀ ਨੂੰ ਜਾਵੇ ਜਾਂ

ਬਾਹਰ ਆਵੇ ਸੜਕ

ਅੰਬਰੀਸ਼

ਸੱਖਣੀ ਬਾਲਕਨੀ

ਗਰਮੀ ਸਰਦੀ ਸੱਖਣੀ

ਬਾਲਕਨੀ ਸੜਕ ਵੱਲ

ਲਾਲ-ਪੱਥਰੀ ਕੋਠੀ

ਅੰਬਰੀਸ਼

ਹਿਲਦਾ ਹਾਲ

ਡੀ ਜੇ ਨਾਲ਼ ਹਿੱਲੇ ਹਾਲ

ਬਾਹਰ ਮਮੋਲੀਆਂ ਘਾਹ ‘ਤੇ

ਕਿੰਗਫਿਸ਼ਰ ਤਾਰ ‘ਤੇ

ਅੰਬਰੀਸ਼

ਬੋਟਾਂ ਦੀ ਬੈਠਕ

ਬੈਠਕ ਬੂਹੇ ਆਲ੍ਹਣਾ

ਬੋਟਾਂ ਦੀ ਉਡਾਰੀ ਤੀਕ

ਬੰਦ ਰਹੇਗਾ ਬੂਹਾ

ਅੰਬਰੀਸ਼

ਦੋ-ਰੁੱਤੇ ਰੁੱਖ

ਇਕ ਸ਼ਾਖ ਨੂੰ ਚਿੱਟੀ ਕਲੀ

ਇਕ ਸ਼ਾਖ ‘ਤੇ ਪੀਲੇ ਨਿੰਬੂ

ਇਕੋ ਰੁੱਖ ਦੋ ਰੁੱਤਾਂ

ਅੰਬਰੀਸ਼

ਸੇਲ ਸੇਲ

“ਹੁਣੇ ਖਰੀਦੋ!”

ਮਾਲ ‘ਚੋਂ ਬਾਹਰ

ਆਕਾਸ਼ ਚੁੱਪ ਨੀਲਾ

ਅੰਬਰੀਸ਼

ਘੁੰਮਣੀ ਕੁਰਸੀ

ਵੱਭਵੀਂ ਕੁਰਸੀ ‘ਤੇ ਬੈਠ

ਹੋਰ ਵੀ ਸੁਹਣੇ ਲੱਗਣ

ਅਮਲਤਾਸ਼ ਤੇ ਲਾਅਨ

ਅੰਬਰੀਸ਼

ਮਮੋਲੀਆਂ

ਮਮੋਲੀਆਂ ਨੂੰ ਯਾਦ

ਇਸੇ ਰੀਜ਼ੌਰਟ ‘ਤੇ ਪਰੂੰਪਰਾਰ

ਚੁਗਣ ਆਈਆਂ ਸੀ ਹੋਰ ਸ਼ਾਦੀ

ਅੰਬਰੀਸ਼

ਵਾਸੀ

ਮੈਂ ‘ਤੇ ਚਾਰ ਦੀਵਾਰਾਂ

ਇਸ ਘਰ ‘ਚ ਅਸੀਂ

ਪੰਜੋ ਰਹਿੰਦੇ

ਅੰਬਰੀਸ਼

ਜਿਉਣ ਦੀ ਖੁਸ਼ੀ

ਸਾਨਤੋਕਾ ਦਾ ਹਾਇਕੂ ਪੜ੍ਹਾਂ

‘ਜਿਉਂਦੇ ਹੋਣ ਦੀ ਖੁਸ਼ੀ ‘ਚ’

ਡੂੰਘਾ ਸਾਹ ਭਰਾਂ

ਅੰਬਰੀਸ਼

ਨੋਟ:

ਸਾਨਤੋਕਾ ਤਾਨੇਦਾ (੧੮੮੨-੧੯੪੦) ਜਾਪਾਨੀ ਹਾਇਜਨ (ਕਵੀਜਨ) ਦੇ ਇਸ ਹਾਇਕੂ ਦਾ ਜਿ਼ਕਰ ਕੀਤਾ ਹੈ ਅੰਬਰੀਸ਼ ਸਾਹਿਬ ਨੇ:

ਜਿਉਂਦੇ ਹੋਣ ਦੀ ਖੁਸ਼ੀ ‘ਚ

ਮੈ ਭਰਨ ਲਗਦਾ ਹਾਂ

ਪਾਣੀ

ਅਨੁਵਾਦ: ਪਰਮਿੰਦਰ ਸੋਢੀ

(‘ਜਾਪਾਨੀ ਹਾਇਕੂ ਸ਼ਾਇਰੀ’ ਪੁਸਤਕ ਵਿਚੋਂ ਧੰਨਵਾਦ ਸਹਿਤ)

ਮਮੋਲੀਆਂ

ਮੇਰਿਜ ਪੈਲੇਸ ਦੇ ਹਾਲ ਵਿਚ

ਧਮਕ ਦਿਲ ਨੂੰ ਪਵੇ, ਬਾਹਰ

ਚੁੱਪ ਚਾਪ ਮਮੋਲੀਆਂ ਚੁਗਣ

ਅੰਬਰੀਸ਼

ਗਲ਼ੀ ਦਾ ਕੁੱਤਾ

ਸਿਆਲੀ ਰਾਤ ਹੱਟੀ ‘ਤੇ

ਗਰਮ ਜਲੇਬੀਆਂ ਖਾਵਾਂ

ਡੂੰਘਾਂ ਝਾਕੇ ਕੁੱਤਾ ਗਲ਼ੀ ਦਾ

ਅੰਬਰੀਸ਼

ਸਿਆਲੀ ਝੜੀ

ਸ਼ਾਮ ਸਿਆਲੀ ਝੜੀ ਲੱਗੀ

ਗਿੱਲੀਆਂ ਝਾਂਬੜਾਂ ਸਾਇਕਲ ‘ਤੇ

ਛੋਹਲੇ ਪੈਡਲੀਂ ਕਾਮਾ

ਅੰਬਰੀਸ਼

ਗਾਜਰਾਂ

ਵਰਲੋਆ ਸਿਆਲ਼ੀ ਮੀਂਹ ਮਗਰੋਂ

ਪਟੜੀ-ਹੱਟ ‘ਤੇ ਮੀਂਹ-ਧੁਪੀਆਂ

ਗਾਜਰਾਂ ਹੋਰ ਗਾਜਰੀ

ਅੰਬਰੀਸ਼

ਮਹਿੰਦੀਸਾਜ਼

ਸਿਆਲੀ ਰਾਤ ਬਜ਼ਾਰ ਬੰਦ ਹੋਣ ਨੂੰ

ਮਹਿੰਦੀਸਾਜ਼ ਦੀ ਨੀਝ ਸੜਕ ‘ਤੇ

ਸਾਹਮਣੇ ਖਾਲੀ ਕੁਰਸੀਆਂ

ਅੰਬਰੀਸ਼

ਗੁੱਜਰ ਕੁੜੀ

ਕੈਮਰੇ ਤੋਂ ਮੂੰਹ ਛੁਪਾ

ਛੰਨ ‘ਚ ਗੁੰਮੀ ਗੁੱਜਰ ਕੁੜੀ

ਬਿੰਬ ਬਾਹਰ ਝਲਕਦਾ

ਅੰਬਰੀਸ਼

ਚੋਗਾ

ਸਰਦ ਧੁਪਿਆਲਾ ਦਿਨ

‘ਕੱਠੇ ਚੁਗਣ ਚੋਗਾ

ਤੋਤੇ, ਗਾਲ੍ਹੜ ਅਤੇ ਕਬੂਤਰ

ਅੰਬਰੀਸ਼

ਬਸੰਤੀ ‘ਵਾ

ਬਸੰਤ ਤਿੱਖੀ ‘ਵਾ ਵਗੇ

ਫਰਾਟੇ ਮਾਰਨ ਪਤੰਗਾਂ ਅਸਮਾਨੀ

ਚਾਦਰਾਂ ਫੜਫੜਾਉਣ ਤਾਰਾਂ ‘ਤੇ

ਅੰਬਰੀਸ਼

ਸ਼ਹਿਰੀ ਤਲ਼ੀਆਂ

ਚੁੱਭਣ ਪੱਥਰ ਗੋਲ

ਨਦੀ ਤਟ ‘ਤੇ ਤੁਰਦਿਆਂ

ਸ਼ਹਿਰੀ ਤਲੀਆਂ ‘ਤੇ

ਅੰਬਰੀਸ਼

ਸਕੂਲੋਂ ਖੁੰਝਿਆ

ਮੋਢੇ ਲੁੱਟੀਆ ਪਤੰਗਾਂ

ਉਂਗਲੀਆਂ ‘ਤੇ ਵਲ਼ੇ ਡੋਰ

ਸਕੂਲੋਂ ਖੁੰਝਿਆ ਮੁੰਡਾ

ਅੰਬਰੀਸ਼

ਸ਼ੀਸ਼ੇ

ਚੌਰਾਹੇ ਰੁਕੀਆਂ ਕਾਰਾਂ

ਸ਼ੀਸੇ ਸਾਫ ਕਰਨ ਮੁੰਡੇ

ਚਾਲਕ ਅੱਖਾਂ ਚਰਾਉਣ

ਅੰਬਰੀਸ਼

ਡਰਨੇ

ਖੇਤਾਂ ਦੇ ਵਿਚ ਪਿਕਨਿਕ

ਵਾਰੀ ਵਾਰੀ ਖਿਚਾਉਣ ਵੱਡੇ

ਫੋਟੋਆਂ ਡਰਨੇ ਦੇ ਨਾਲ਼

ਅੰਬਰੀਸ਼

ਲਿੱਲ੍ਹੜੀਆਂ

ਚੌਂਕਬੱਤੀ ਰੁਕੀਆਂ ਕਾਰਾਂ

ਲਿਲ੍ਹੜੀਆਂ ਦੀ ‘ਵਾਜ

ਬੰਦ ਸ਼ੀਸਿਆਂ ਤੋਂ ਮੁੜਦੀ

ਅੰਬਰੀਸ਼

ਮਾੜਚੂ

ਸੀਤ ਸ਼ਾਮ ਪਟੜੀ ‘ਤੇ

ਘੱਟਵਸਤਰੀ ਮਾੜਚੂ ਬੰਦਾ

ਮੌਜੇ ਮਫਲਰ ਵੇਚੇ

ਅੰਬਰੀਸ਼

ਰੰਗਾਂ ਚੋਂ ਰੰਗ

ਨਿੱਕੀ ਕਣਕ

ਧੁੱਪ ‘ਚ ਮੋਰ ਚੁੱਗੇ

ਉਭਰੇ ਰੰਗ ਚੋਂ ਰੰਗ

ਅੰਬਰੀਸ਼

ਝੂਮਦਾ ਪੱਤਾ

ਅਚਾਨਕ ਪੌਣ ਰੁਮਕੀ

ਝੂਮਦਾ ਪੱਤਾ ਲਹੇ

ਸਤਿਅਮ ਸ਼ਿਵਮ ਸੁੰਦਰਮ

ਅੰਬਰੀਸ਼

ਕਤੂਰੇ

ਸਿਆਲੀ ਮੀਂਹ

ਗੁੱਛੂ ਮੁੱਛੂ ਕਤੂਰੇ

ਭਿੱਜੀਆਂ ਜੱਤਾਂ

ਅੰਬਰੀਸ਼

ਮਹੀਨ ਆਵਾਜ਼

ਪੌਣ ਰੁਮਕੇ

ਪੋਲੇ ਪੈਰੀਂ ਪੱਤਾ ਲਹੇ ਘਾਹ ‘ਤੇ

ਅੱਤ ਮਹੀਨ ਆਵਾਜ਼

ਅੰਬਰੀਸ਼

ਤੱਤ ਤੱਤਾਂ ‘ਚ ਮਿਲੇ

ਪੱਤਾ ਝੜਿਆ

ਡਿਗਿਆਂ ‘ਚ ਰਲ਼ਿਆ

ਤੱਤ ਤੱਤਾਂ ‘ਚ ਮਿਲੇ

ਅੰਬਰੀਸ਼

ਚਿੜੀਆਂ ਦਾ ਫੋਨ

ਪਿੰਡੋਂ ਫੋਨ ਆਇਆ

ਭਤੀਜਾ ਬੋਲੇ

ਪਿੱਛੇ ਚਿੜੀਆਂ ਚਹਿਕਣ

ਅੰਬਰੀਸ਼

ਸ਼ਬਦ ਜਨਮ

ਤਿੜ ਤਿੜ ਚਿਰ ਚਿਰ

ਮੀਂਹ ਕਣੀਆਂ ਭਾਂਬੜ ‘ਤੇ

ਹੋਰ ਸ਼ਬਦ ਜਨਮਦੇ

ਅੰਬਰੀਸ਼

ਇਟਰੰਗੀਏ

ਸ਼ਹਿਰੋਂ ਦੂਰ ਰੈਸਟਹਾਉਸ

ਖਿੜਕੀ ਵਿਚੋਂ ਦਿੱਸਣ

ਇੱਟਰੰਗੀਏ ਪਰ ਕਮਾਦੀ-ਕਾਂ ਦੇ

ਅੰਬਰੀਸ਼

ਪੰਜਾਹਵਿਓਂ ਪਾਰ

ਦਾਬੜੇ ‘ਚ ਭਾਂਬੜ ਮਚੇ
ਪੰਜਾਹਵਿਓਂ ਪਾਰ ਪਹਿਲੀ ਵਾਰ
ਸੁਣਾਂ ਆਵਾਜ਼ ਅੱਗ ਦੀ

ਅੰਬਰੀਸ਼

ਨਵੀਂ ਕਵਿਤਾ

ਆਧੁਨਿਕ ਕੁੜੀ

ਨੱਕ ‘ਚ ਨੱਤੀ

ਨਵੀਂ ਕਵਿਤਾ ਬਿੰਬ ਪੁਰਾਣਾ

ਅੰਬਰੀਸ਼

ਪੂਰਬ ਪੱਛਮ ਮੇਲ

ਨਵੀਂ ਵਿਆਹੀ ਕੁੜੀ

ਪਾਈ ਜੀਨ ਨਾਲ਼ੇ ਚੂੜਾ

ਪੁਰਬ ਪੱਛਮ ਮੇਲ

ਅੰਬਰੀਸ਼

ਕੂੰਜਾਂ

ਕਸਬੇ ਦੇ ਇਕੋ ਦਲਦਲੀ ਖਿੱਤੇ

ਕੂੰਜਾਂ ਸਾਇਬੇਰੀਆ ਤੋਂ ਆਈਆਂ

ਅਣਗੌਲੀਆਂ ਚੁਗਦੀਆਂ

ਅੰਬਰੀਸ਼