ਪੱਖੀ-9

ਪੱਖੀ ਦੀ ਝੱਲ
ਸੜਕ ਕਿਨਾਰੇ ਭੁੰਨੇ ਛੱਲੀ
ਛੱਲੀ ਵਰਗੀ

ਜਗਤਾਰ ਲਾਡੀ

ਹਨੇਰੀ

ਚੱਲੇ ਤੇਜ ਹਨੇਰੀ –
ਖੇਤਾਂ ਵਿਚ ਲਹਿਰਾਉਂਦੀ ਫਸਲ 
ਹੋਈ ਪਲ ਵਿਚ ਢੇਰੀ

ਲਵਤਾਰ ਸਿੰਘ

ਗੀਝਾ

ਸ਼ਾਮ ਦਾ ਘੁਸ੍ਮੁਸਾ 
ਟਾਕੀਆਂ ਵਾਲੇ ਗੀਝੇ ਚੋਂ ਲਟਕਣ 
ਚੋਰੀ ਦੇ ਕਰੇਲੇ

ਗੀਤ ਅਰੋੜਾ

ਗਗਨਦੀਪ ਸਿੰਘ ਦੇ 5 ਹਾਇਕੂ

ਮਾਂ ਲਿਪੇ ਮਿਟੀ
ਬੱਚਾ ਚੁੰਘੇ ਗੂਠਾ
ਓਟੇ ਓਹਲੇ

ਹੋਲੀ ਦੀ ਦੁਪਹਿਰ
ਪਿਚਕਾਰੀ ਨਾਲ ਭਿਜੀ
ਵਿਧਵਾ ਦੀ ਚੁੰਨੀ

ਗਿਲੇ ਖਾਲ਼ ‘ਚ
ਸੱਪ ਦੀ ਕੰਜ
ਪੈਰ ਤਰਭਕੇ ਰੁਕੇ

ਬਿਜਲੀ ਗੜਕੇ
ਮਾਂ ਨੇ ਲਕੋਈ
ਕਾਂਸੀ ਦੀ ਥਾਲੀ

ਬੱਦਲ ਲਸ਼ਕੇ
ਦੂਰ ਦੂਰ ਸੁੱਤੇ
ਮਾਮਾ ਤੇ ਭਾਣਜਾ

ਗਗਨਦੀਪ ਸਿੰਘ

ਅਮਲਤਾਸ

ਅਮਲਤਾਸ ਦੀ ਛਾਂ – 
ਤਿੰਨ ਸੈਲ ਫੋਨਾਂ ਵਾਲਾ ਅਜਨਬੀ 
ਆਖਿਰ ਚੁੱਪ ਕੀਤਾ !
ਰੋਜ਼ੀ ਮਾਨ

ਤੱਤੀ ਤਵੀ

ਮਘਦਾ ਸੂਰਜ-
ਤੱਤੀ ਤਵੀ ਤੇ ਬਿਰਾਜਮਾਨ 
ਸ਼ਹੀਦਾਂ ਦਾ ਸਿਰਤਾਜ

ਤੇਜਿੰਦਰ ਸਿੰਘ ਗਿੱਲ

 

ਕਾਮੀ

ਝੋਨੇ ਦੀ ਲੁਆਈ –
ਕਾਮੀ ਕੁੜੀ ਨੇ ਮਿੱਧਿਆ
ਤਪਦਾ ਸੂਰਜ

ਹਰਵਿੰਦਰ ਧਾਲੀਵਾਲ

ਗਰਮੀ

ਅੱਤ ਦੀ ਗਰਮੀ–
ਬੱਚਿਆਂ ਨੇ ਘੇਰਿਆ
ਗੂੰਦ-ਕਤੀਰੇ ਵਾਲਾ ਭਾਈ

ਰਾਜਵਿੰਦਰ ਸਿੰਘ ਵਾਲੀਆ

ਝੱਖੜ

ਝੱਖੜ ਦੀ ਚੇਤਾਵਨੀ
ਦਰਵਾਜ਼ਾ ਭੇੜਿਆ 
ਭੱਜ ਕੇ ਇੱਕ ਹੋਰ

ਕੰਵਲ ਸਿੱਧੂ

ਵਾਢੀ

ਕਣਕ ਨੂੰ ਵਾਢਾ

ਆੜਤੀਆਂ ਦੀ ਹੱਟੀ ਬੈਠਾ

ਪੂੰਝੇ ਮਥੇ ਪਸੀਨਾ

ਪਵੀ ਸ਼ੇਰਗਿੱਲ

ਟਟੀਹਰੀ

ਨੋ ਮੈਨ’ਜ਼ ਲੈਂਡ–
ਰਫਲ ਦੇ ਪਟਾਕੇ ਮਗਰੋਂ
ਟਟੀਹਰੀ ਦਾ ਸ਼ੋਰ

ਜੁਗਰਾਜ ਸਿੰਗ ਨਾਰਵੇ

ਜੁਗਨੂੰ

ਪੱਤਝੜ ਦੀ ਦਸਤਕ-
ਜੁਗਨੂੰ ਛੁਪਿਆ
ਪੱਤ ਖੜਕਦੇ

ਧੀਦੋ ਗਿੱਲ

ਸੁਰਾਹੀ

ਗਰਮੀ ਦੀ ਰੁੱਤ
ਬਾਬੇ ਹੱਥ ਸੁਰਾਹੀ
ਰੇਤਾ ‘ਚ’ ਨੱਪੇ

ਇਕਬਾਲ ਭਾਮ

ਭਿਖਾਰਨ

ਤਿਖੜ ਦੁਪਿਹਰ 
ਤਪਦੀਆਂ ਗਲੀਆਂ ‘ਚ ਮੰਗੇ 
ਨੰਗੇ ਪੈਰ ਭਿਖਾਰਨ

ਰਾਣੀ ਬਰਾੜ

ਰੋਟੀਆ

ਸਿਖਰ ਦੁਪਹਿਰ
ਖੜ੍ਹੇ ਮੰਜੇ ਦੀ ਛਾਂ
ਬੇਬੇ ਲਾਵੇ ਰੋਟੀਆ

ਤੇਜੀ ਬੇਨੀਪਾਲ

ਚਮਾਸਾ

ਭਾਦੋਂ ਦਾ ਚਮਾਸਾ
ਕਮਾਦ ਗੁਡਦਿਆਂ ਦਸੇ ਬਾਪੂ
ਜਿੰਦਗੀ ਦੇ ਰਾਜ਼

ਸਤਵਿੰਦਰ ਗਿੱਲ

ਮੰਗਤਾ

ਸਿਖਰ ਦੁਪਹਿਰ-
ਮੰਗਤੇ ਦੇ ਠੂਠੇ ‘ਚ ਡਿਗੀ
ਮੁੜ੍ਹਕੇ ਦੀ ਬੂੰਦ

ਸੰਜੇ ਸਨਨ

ਬੀਂਡੇ

ਤਪਦਾ ਹਾੜ੍ਹ- 
ਬੀਂਡੇ ਅਤੇ ਰਾਤ
ਟਿਕੇ ਹੋਏ

ਰਘਬੀਰ ਦੇਵਗਨ

ਮੁੜ੍ਹਕਾ

ਤਿਖੀ ਧੁੱਪ ਮਾਰੇ ਸੇਲੇ
ਗੋਡੀ ਕਰਦੇ ਦੇ ਚੋਵੇ
ਧਰਾਲੀਂ ਮੁੜ੍ਹਕਾ

ਰਵਿੰਦਰ ਰਵੀ

ਪੱਖੀ

ਹੁੰਮਸ ਭਰੀ ਦੁਪਿਹਰ
ਝੱਲ ਮਾਰਦਿਆਂ ਟੁੱਟੀ
ਬਾਜ਼ਾਰੂ ਪੱਖੀ

ਦੀਪੀ ਸੈਰ

ਪੱਖੀ

ਕੈਲੰਡਰ
ਪੱਖੀ ਨੇ ਹਿਲਾਇਆ
ਅਗਸਤ ਵਾਲਾ ਪੰਨਾ

ਹਰਿੰਦਰ ਅਨਜਾਣ

ਡਾਰ

ਲੂਹਵੀ ਧੁੱਪ- 
ਆਰਾਮਗਾਹ ਵਿਚ ਉੱਤਰੀ 
ਪੰਛੀਆ ਦੀ ਡਾਰ

ਰਘਬੀਰ ਦੇਵਗਨ

ਬਰਫ਼

ਜੂਨ ਮਹੀਨਾ-
ਕਮਰੇ ਟੰਗੀ ਤਸਵੀਰ ‘ਚ
ਪਹਾੜਾਂ ‘ਤੇ ਬਰਫ਼

ਕਾਲਿਮ / Kalim Bandaicha

ਭੜਾਸ

ਹਾੜ ਦੀ ਸ਼ਾਮ- 
ਪਾਣੀ ਛਿੜਕਣ ਨਾਲ ਉੱਠੀ 
ਮਹਿਕਦੀ ਭੜਾਸ

ਰਘਬੀਰ ਦੇਵਗਨ

ਝੋਨਾ

ਸਿਖਰ ਦੁਪਹਿਰਾ
ਇੱਕ ਮੁਟਿਆਰ
ਝੋਨਾ ਲਾਉਂਦੀ

ਦਲਵੀਰ ਗਿੱਲ

ਧਰੇਕ

ਦੁਪਹਿਰੀਂ ਲੱਗਾ ਵੱਟ
ਛਤਰੀਦਾਰ ਧਰੇਕ
ਹੇਠਾਂ ਬੈਠਾ ਜੱਟ

ਹਰਵਿੰਦਰ ਤਤਲਾ

ਆਡ

ਲਸ਼ਕਾਰਾ –
ਸਿਖ਼ਰ ਦੁਪਹਿਰੇ ਟੱਪੀ
ਵਗਦੀ ਆਡ

ਰੋਜ਼ੀ ਮਾਨ

ਆਸਮਾਨ

ਹਾੜ੍ਹ ਮਹੀਨਾ
ਬਾਪੂ ਤੱਕੇ ਆਸਮਾਨ
ਚੱਲੇ ਪੁਰੇ ਦੀ ਹਵਾ
…………….
ਚੱਲੇ ਪੁਰਾ
ਬਾਪੂ ਤੱਕੇ ਆਸਮਾਨ
ਹਾੜ੍ਹ ਮਹੀਨੇ

ਪੁਸ਼ਪਿੰਦਰ ਸਿੰਘ ਪੰਛੀ

ਕੁਲਫ਼ੀ

ਹਾੜ ਦੀ ਦੁਪਹਿਰ
ਕੁਲਫ਼ੀ ਦਾ ਹੋਕਾ ਸੁਣ ਭੱਜੇ
ਅੰਦਰੀਂ ਡੱਕੇ ਬੱਚੇ

ਗੁਰਮੀਤ ਸੰਧੂ

ਕੁਲਫ਼ੀ

ਸਿਖ਼ਰ ਦੁਪਹਿਰਾ –
ਬਸ ਅੱਡੇ ‘ਤੇ ਪਿਘਲ ਰਹੀ 
ਪਿਸਤਾ ਕੁਲਫ਼ੀ

شکھر دوپہرے
بس اڈے تے پگھل رہی
پستہ قلفی

ਕਾਲਿਮ / Kalim Bandaicha

ਬਦਲੋਟੀ

ਸ਼ਿਖਰ ਦੁਪਿਹਰ
ਮੱਥੇ ਤੋ ਪੂੰਝ ਪਸੀਨਾ ਕਿਸਾਨ
ਵੇਖੇ ਉੱਡਦੀ ਬਦਲੋਟੀ

ਰਮਨਦੀਪ ਸਿੰਘ

ਧੁੱਪ

ਲੂਹਵੀ ਧੁੱਪ- 
ਆਰਾਮਗਾਹ ਵਿਚ ਉੱਤਰੀ 
ਪੰਛੀਆ ਦੀ ਡਾਰ

ਰਘਬੀਰ ਦੇਵਗਨ

ਫੁੱਲ

ਵਗਦੀ ਲੂ 
ਮੁਰਝਾਇਆ ਖਿੜਨ ਤੋ ਪਹਿਲਾਂ 
ਸੂਹਾ ਫੁੱਲ

ਮਨਦੀਪ ਮਾਨ

ਬੂੰਦ

ਉਸਦੀ ਆਮਦ
ਤਪਦੀ ਜ਼ਮੀਨ ਤੇ ਡਿੱਗੀ
ਅੰਬਰੋ ਠੰਡੀ ਬੂੰਦ

ਰਾਜਿੰਦਰ ਸਿੰਘ ਘੁੱਮਣ 

ਸਮਾਧ

ਤਪਦੀ ਦੁਪਹਿਰ –
ਸਮਾਧ ਦੀ ਛਾਂਵੇ ਬੈਠ ਰੋਵੇ 
ਇੱਕ ਮਰੀਅਲ ਕਤੂਰਾ

ਸੰਜੇ ਸਨਨ 

ਪਾਣੀ

ਤਿੱਖੜ ਦੁਪਹਿਰ–
ਨਹਿਰ ਕਿਨਾਰੇ ਨਲਕੇ ਦਾ 
ਕਿੰਨਾ ਠੰਡਾ ਪਾਣੀ

ਜਗਰਾਜ ਸਿੰਘ ਨਾਰਵੇ

ਭਿਖਾਰੀ

ਮੁੜ੍ਹਕੋ ਮੁੜ੍ਹਕੀ ਸਵਾਰੀਆਂ
ਦੇਵੀ ਦੀ ਤਸਵੀਰ ਦੀ ਕੰਨੀ ਚੱਬੇ 
ਗੂੰਗਾ ਭਿਖਾਰੀ ਬੱਚਾ

ਰਣਜੀਤ ਸਿੰਘ ਸਰਾ

ਨਿੰਮ

ਪੁਰਾਣਾ ਵਿਹੜਾ –
ਗਰਮ ਹਵਾ ਨਾਲ ਸੂਕੇ 
ਨਿੰਮ ਦਾ ਰੁੱਖ

ਲਖਵਿੰਦਰ ਸ਼ਰੀਂਹ ਵਾਲਾ 

ਖੰਭ

ਤਪਦੀ ਪੜਛੱਤੀ –
ਕਬੂਤਰ ਦੇ ਨਾਲ ਉੱਡਿਆ
ਪੁਰਾਣਾ ਝੜਿਆ ਖੰਭ

ਸੁਰਮੀਤ ਮਾਵੀ

ਰੁਦਨ

ਹਾੜ ਦੀ ਦੁਪਿਹਰ –
ਕੋਯਲ ਦੀ ਕੂਕ ‘ਚ ਰਲਿਆ 
ਵਿਧਵਾ ਦਾ ਰੁਦਨ

ਸੰਜੇ ਸਨਨ

ਪੱਖੀ

ਤਪਦਾ ਹਾੜ- 
ਬੈਠਕ ‘ਚ ਬੈਠਾ ਪੱਖੀ ਝੱਲੇ 
ਕੰਧ ‘ਤੇ ਟੰਗੇ ਪਹਾੜ

ਸੰਜੇ ਸਨਨ

ਛਾਂ

ਤਪਦੀ ਦੁਪਹਿਰ
ਵਾਵਰੋਲੇ ‘ਚ ਉੱਡਦੀ ਮਿੱਟੀ
ਕਰ ਗਈ ਛਾਂ

ਰਾਜਿੰਦਰ ਸਿੰਘ ਘੁੰਮਣ 

ਝੋਨਾ

ਤੱਤਾ ਪਾਣੀ
ਧੁੱਪੇ ਲੂ ‘ਚ ਝੋਨਾ ਰੋਪੇ
ਪਰਦੇਸੀ ਢਾਣੀ

ਚਰਨ ਗਿੱਲ

 

ਤਰਲ

ਤੱਤੀ ‘ਵਾ 
ਨਦੀ ਦੇ ਤਲ ‘ਤੇ ਵਹਿ ਰਿਹਾ 
ਕਾਰਖਾਨਿਆਂ ਦਾ ਤਰਲ

ਰਣਜੀਤ ਸਿੰਘ ਸਰਾ

ਬਾਲੜੀ

ਤਪਦੀ ਦੁਪਹਿਰ
ਸਹਿਮੀ ਸਹਿਮੀ ਚੁਗਦੀ ਡੱਕੇ
ਪੋਲੀਉ ਮਾਰੀ ਬਾਲੜੀ

ਚਰਨ ਗਿੱਲ

ਨਮੀ

ਤਪਦੀ ਦੁਪਿਹਰ
ਹਵਾ ਦੇ ਬੁੱਲੇ ਨਾਲ ਸੁੱਕੀ
ਅੱਖ ਦੀ ਨਮੀ

ਦੀਪੀ ਸੈਰ

ਪੌਣ

ਵਗੀ ਠੰਡੀ ਠੰਡੀ ਪੌਣ
ਐਨੀ ਗਰਮੀ ਬਾਅਦ ਸਵੇਰੇ –
ਕੋਇਲੇ ਨਾ ਜਗਾ ਗਾ ਕੇ

ਦਰਬਾਰਾ ਸਿੰਘ

ਬੂਟਾ

ਕੜਕਦੀ ਧੁੱਪ
ਕੁਮਲਾਏ ਰੁੱਖ ਛਾਵੇ 
ਪੁੰਗਰਦਾ ਬੂਟਾ

ਨਵਦੀਪ ਗਰੇਵਾਲ

ਹੰਝੂ

ਹਾੜ ਦੀ ਦਿਹਾੜੀ
ਹੋਰ ਸਲੂਣਾ ਹੋ ਗਿਆ
ਮੁੜਕੇ ਨਾਲ ਹੰਝੂ

ਸਰਬਜੋਤ ਸਿੰਘ ਬਹਿਲ

ਪਰਨਾ

ਹਾੜ੍ਹ ਦਾ ਦੁਪਹਿਰਾ
ਸਿਰ ਤੇ ਗਿੱਲਾ ਪਰਨਾ
ਜਾਵੇ ਡੰਡੀਉ ਡੰਡੀ

ਤੇਜੀ ਬੇਨੀਪਾਲ

ਪਸੀਨਾ

ਢਲਦਾ ਸੂਰਜ
ਤਿਓੜੀਆਂ ਚ ਫਸਿਆ ਪਸੀਨਾ
ਢਲਦੀ ਉਮਰ

ਸਾਬੀ ਨਾਹਲ 

ਕੁਹਾੜਾ

ਮੁੜਕੋ-ਮੁੜਕੀ ਹੋਇਆ 
ਲੱਕੜਹਾਰੇ ਹੱਥ ਕੁਹਾੜਾ 
ਛਾਂਵੇ ਆਣ ਖਲੋਇਆ

ਸੰਜੇ ਸਨਨ 

ਵਿਧਵਾ

ਪਹਿਲੀ ਬਰਸੀ 
ਜੇਠ ਦੀ ਧੁੱਪ ‘ਚ ਤੁਰੇ 
ਨੰਗੇ ਪੈਰੀਂ ਵਿਧਵਾ 

first death anniversary
a widow walks bare foot
under the June sun

ਰਣਜੀਤ ਸਿੰਘ ਸਰਾ 

ਕੀੜੀਆਂ

ਤਪਦੀ ਦੁਪਿਹਰ-
ਰਸੋਈ ਵਿਚ ਜਾ ਮੁੱਕੀ
ਕੀੜੀਆਂ ਦੀ ਕਤਾਰ

ਗੁਰਮੁਖ ਭੰਦੋਹਲ ਰਾਈਏਵਾਲ

ਕਰੰਡ

ਕਰੰਡ ਖੇਤ
ਪਲ ‘ਚ ਸੋਖ ਲਏ
ਮੁੜਕੇ ਦੇ ਤੁਪਕੇ

ਰਿਦਮ ਕੌਰ 

ਧੂੜ

ਉੱਡੀ ਧੂੜ
ਭੁੱਬਲ ‘ਚ ਡਿੱਗੀ 
ਪਸੀਨੇ ਦੀ ਬੂੰਦ

ਰਾਜਿੰਦਰ ਸਿੰਘ ਘੁੱਮਣ

ਅੱਕ

ਦੁਪਹਿਰ–
ਉੱਡ ਰਹੀਆ ਬੁੱਢੀਆਂ ਮਾਈਆ
ਸੁੱਕੇ ਅੱਕ ਤੋਂ

ਪੁਸ਼ਪਿੰਦਰ ਸਿੰਘ ਪੰਛੀ

ਡ੍ਰਾਇਵਿੰਗ

ਦੁਪਹਿਰੇ ਡ੍ਰਾਇਵਿੰਗ
ਰੇਲ ਦੀ ਲੀਹ ‘ਤੇ ਤੇਜ਼ ਰਫ਼ਤਾਰ
ਗਰਮੀ ਦਾ ਸੂਰਜ
–
noon driving
speeding summer Sun
on the rail track

ਰਣਜੀਤ ਸਿੰਘ ਸਰਾ

ਹਵਾੜ

ਹਾੜ ਦਾ ਸਾੜ
ਪਹਿਲਾ ਮੀਂਹ ਕਢ ਰਿਹਾ 
ਮਿੱਟੀ ‘ਚੋਂ ਹਵਾੜ

ਸਰਬਜੋਤ ਸਿੰਘ ਬਹਿਲ

ਮੁਖੜਾ

ਸਿਖ਼ਰ ਦੁਪਹਿਰ
ਗਰਮੀ ਨੇ ਲੂਹਿਆ
ਗੋਰੀ ਦਾ ਮੁਖੜਾ

ਜਗਦੀਪ ਸਿੰਘ