ਰਸਗੁੱਲਾ

ਰੱਖੜ ਪੁੰਨਿਆ –
ਧਾਗਾ ਬੰਨ੍ਹ ਵੀਰੇ ਦੇ ਮੂੰਹ ‘ਚ ਪਾਇਆ 
ਚਿੱਟਾ ਰਸਗੁੱਲਾ

ਹਰਲੀਨ ਸੋਨਾ

ਭੈਣ

ਅਪਾਹਜ ਭੈਣ 
ਵੀਣੀ ‘ਤੇ ਟਪਕਿਆ ਹੰਝੂ
ਰੱਖੜੀਆਂ ਵਾਲੇ ਦਿਨ

my paralized sister
a tear-drop on my wrist
on rakhi day

ਅਮਰਾਓ ਸਿੰਘ ਗਿੱਲ

ਮਿਸਰੀ

ਸਿੱਲ੍ਹੀ ਸਵੇਰ-
ਲਿਫਾਫੇ ਚੋਂ ਰੱਖੜੀ ਕੱਢਦਿਆਂ
ਖਿੱਲਰੀ ਮਿਸਰੀ

ਦੀਪੀ ਸੈਰ

ਭੈਣ

ਸੋਚਾਂ…ਰੱਖੜੀ 
ਮਿਲਣ ਦਾ ਫੂਨ ਕਰਾਂ-
ਪਹਿਲ ਕਰ ਗਈ
ਭੈਣ ਅੱਜ ਵੀ
ਰੱਖੜੀ ‘ਤੇ

ਸੁਵੇਗ ਦਿਓਲ

ਪੌਂਚੀਆਂ

ਰੱਖੜੀ ਦਾ ਦਿਨ-
ਲਿਫਾਫੇ ਨੂੰ ਗੁੱਟ ਤੇ ਸਜਾਵਾਂ
ਰਹਿਗੀਆਂ ਰਾਹ ‘ਚ ਪੌਂਚੀਆਂ

ਗੁਰਮੀਤ ਸੰਧੂ

ਛੜਾ

ਰੱਖੜੀ ਦਾ ਦਿਨ –
ਨਵੀਂ ਗੁਆਂਢਣ ਦੀਆਂ ਦੋ ਧੀਆਂ 
ਛੜਾ ਲੁਕਦਾ ਫਿਰੇ

ਸੰਜੇ ਸਨਨ

ਨੀਰ

ਪ੍ਰਦੇਸਾਂ ਚ ਵੀਰ
ਡਾਕ ਚ ਰੱਖੜੀ
ਨੈਣਾਂ ਚ ਨੀਰ

ਸੁਖਜੀਤ ਸਿੰਘ ਪਾਤਰਾ

ਰੱਖੜੀ

ਭਰਿਆ ਬਜ਼ਾਰ
ਯਤੀਮ ਬੱਚੇ ਨੇ ਚੁੱਕੀ
ਭੁੰਜੇ ਡਿੱਗੀ ਰੱਖੜੀ

ਜਗਦੀਪ ਸਿੰਘ ਮੁੱਲਾਂਪੁਰ

ਫੁਹਾਰ

ਨਿੱਕੀ ਨਿੱਕੀ ਫੁਹਾਰ
ਹਰ ਬੂੰਦ ਵਿਚੋਂ ਦਿਸੇ
ਵੀਰ ਦੀ ਨੁਹਾਰ

ਅਰਵਿੰਦਰ ਕੌਰ

ਵੀਰੇ

ਨਾਹ ਧੋ
ਨਵਾਂ ਸੂਟ ਪਾ
ਆ ਰਹੀ ਫੈਰੀ ਬੈਠ-
ਛੁੱਟੀ ਕਰ ਵੀਰੇ
ਉਡੀਕਣ ਰੱਖੜੀ

ਸੁਵੇਗ ਦਿਓਲ

ਡਾਕ

ਰੱਖੜੀ ਦਾ ਦਿਨ
ਡਾਕ ਚ ਰੁਲੀਆ ਰੱਖੜੀਆ
ਖਾਲੀ ਗੁੱਟ

ਤੇਜੀ ਬੇਨੀਪਾਲ

ਰੱਖੜੀ

ਹੱਥ ਵਿੱਚ ਫੜੀ ਰੱਖੜੀ
ਭੈਣ ਫੋਟੋ ਅਗੇ ਖੜੀ
ਵੀਰ ਬਾਡਰ ਤੇ

ਅਮਰ ਢੀਂਡਸਾ

ਟੈਗ

ਟੈਗ ਕੀਤੀ
ਰੱਖੜੀ ਭੈਣ ਨੇ
ਫੇਸਬੱਕ ਓੁੱਤੇ

ਰਾਜਿੰਦਰ ਸਿੰਘ

ਧਾਗਾ

ਪੂਰਨਮਾਸ਼ੀ –
ਵੀਰ ਦੇ ਗੁੱਟ ਉਤੇ 
ਰੇਸ਼ਮੀਂ ਧਾਗਾ

ਅਰਵਿੰਦਰ ਕੌਰ

ਭੈਣ

ਰੱਖੜੀ ਦਾ ਦਿਨ
ਪ੍ਰਦੇਸ ਪਹੁੰਚੀਆਂ
ਭੈਣ ਵੱਲੋ ਭੇਜੀਆ ਰੱਖੜੀਆਂ

ਕਮਲਜੀਤ ਮਾਂਗਟ

ਰੱਖੜੀ

ਰੱਖੜੀ
ਕੱਚੇ ਧਾਗੇ ਬੰਨਿਆ
ਭਾਰਾ ਗੁੱਟ

ਹਰਿੰਦਰ ਅਨਜਾਣ

ਰਖੜੀ

ਲਗਾਤਾਰ ਫੁਹਾਰ –
ਇਸ ਵਾਰ ਫੇਰ ਭੇਜੀ ਰਖੜੀ 
ਸਮੁੰਦਰੋਂ ਪਾਰ

ਰੋਜ਼ੀ ਮਾਨ