ਗੰਡਾ

ਭਰ ਆਈਆਂ
ਗੰਡੇ ਦਾ ਚੀਰ ਹਰਣ ਕਰਦਿਆਂ-
ਉਹਦੀਆਂ ਅੱਖਾਂ

ਗੁਰਮੀਤ ਸੰਧੂ

ਇਸ਼ਤਿਹਾਰ

ਮੇਥੀ

ਇੰਡੋ-ਪਾਕ ਸਟੋਰ
ਜਮੀਲਾ ਮੰਗੇ ਅੰਬਰਸਰੀ ਵੜੀਆਂ
ਜੈਲੋ ਕਸੂਰੀ ਮੇਥੀ

ਗੁਰਮੀਤ ਸੰਧੂ

ਭੜੋਲੀ

ਰਹਰਾਸ ਵੇਲਾ 
ਭੜੋਲੀ’ਚ ਦਾਲ 
ਮਹਿਕ ਖਿਲਾਰੇ

ਸਹਿਜਪ੍ਰੀਤ ਮਾਂਗਟ

ਹੋਲਾ

ਟਿੱਬੀ ਵਾਲਾ ਖੇਤ
ਭੁੰਨ ਰਿਹਾ ਹੋਲਾ
ਉੱਡੇ ਰੇਤ ਤੇ ਧੂੰਆਂ ਵੀ

ਤੇਜੀ ਬੇਨੀਪਾਲ

ਗੱਡੀ

ਨਵੀਂ ਗੱਡੀ–
ਲੱਡੂਆਂ ਵਾਲੇ ਲਫਾਫੇ ‘ਚ
ਕਿੰਨੀ ਖਾਲੀ ਜਗ੍ਹਾ

ਜਗਰਾਜ ਸਿੰਘ ਨਾਰਵੇ

ਚਿੜੀਆ

ਪਹਿਲਾ ਪਹਰ- 
ਚਿੜੀਆ ਖੂਹ ਦੀ ਮੌਣ ਤੇ ਚੁਗਣ
ਦਲੀਏ ਦੇ ਦਾਣੇ

ਰਘਬੀਰ ਦੇਵਗਨ

ਫੁੱਫੜ

ਰੁਸਿਆ ਫੁੱਫੜ
ਫਸਿਆ ਖੁੱਡੇ ਚ
ਫੜਦਾ ਕੁੱਕੜ

ਬਲਵਿੰਦਰ ਸਿੰਘ

ਤੰਦੂਰ

ਭਬਕੇ ਚੇਹਰਾ –
ਥੇਪੇ ਤੰਦੂਰ ‘ਚ ਰੋਟੀ 
ਭੜਥਾ ਬਣਾ

ਵਿੱਕੀ ਸੰਧੂ

ਚਾਦਰ

ਭੋਜਨ ਸੂਚੀ-
ਬੇਬੇ ਦੀ ਚਾਦਰ ‘ਤੇ ਲਗੇ
ਵਿਆਹ ‘ਚ ਦਾਗ

ਗੁਰਮੀਤ ਸੰਧੂ

ਚਿੱਠੀ

ਸ਼ਕਰਪਾਰਾ-
ਘੁਲ ਗਿਆ ਸਵਾਦ
ਚਿੱਠੀ ਪੜ੍ਹਦਿਆਂ

ਕੁਲਜੀਤ ਮਾਨ

ਖ਼ੁਸ਼ਬੂ

ਕਿਣਮਿਣ ਕਣੀਆਂ –
ਘਰ ਦੇ ਵਿਹੜੇ ‘ਚ ਫੈਲੀ 
ਗੁਲਗੁਲਿਆਂ ਦੀ ਖ਼ੁਸ਼ਬੂ

ਸੰਜੇ ਸਨਨ

ਲੱਡੂ

ਵਿਆਹ ਸੰਪੰਨ–
ਕਿੱਲੋ ਦੇ ਵੱਟੇ ਨਾਲ ਜੋਖੇ 
ਹੱਥੀਂ ਵੱਟੇ ਲੱਡੂ

ਲੱਸੀ

ਚਾਟੀ ਦੀ ਲੱਸੀ
ਪਹਿਲੀ ਘੁੱਟ ਭਰਦਿਆਂ
ਖੱਬੀ ਅੱਖ ਮੀਚੀ

ਬਲਵਿੰਦਰ ਸਿੰਘ

ਆਟਾ

ਆਟਾ ਉਡਿਆ 
ਉਸਦੇ ਆਉਣ ਦੀ ਉਡੀਕ 
ਨਜ਼ਰਾਂ ਦਰਵਾਜੇ ਤੇ

ਸੈਮ ਬਾਜਵਾ

ਖੀਰ

ਥੋਡੇ ਯਾਦ ਆ ਉਹ ਪੁਰਾਣੇ ਵੇਲੇ ?…ਜਦੋਂ ਹਾਲੇ ਮਸ਼ੀਨਰੀ ਨਹੀਂ ਆਈ ਸੀ ਤੇ ਖੇਤੀ ਦਾ ਸਾਰਾ ਕੰਮ ਹੱਥੀਂ ਕਰਨਾ ਪੈਂਦਾ ਸੀ ..ਵੱਡੇ ਤੜਕੇ ਤੋਂ ਲੈ ਆਥਣ ਤੱਕ ਮਿੱਟੀ ਨਾਲ ਮਿੱਟੀ ਹੋਣਾ ਪੈਂਦਾ ਸੀ ..ਵੱਡੀਆਂ ਵੱਡੀਆਂ ਦੇਹਾਂ ਹੁੰਦੀਆਂ ਸਨ ਬੰਦਿਆਂ ਦੀਆਂ ਤੇ ਖਾਧ ਖੁਰਾਕ ਵੀ ਖੁੱਲੀ ਹੁੰਦੀ ਸੀ ..ਰੋਟੀ ਪਿਛੋਂ ਪੰਸੇਰੀ ਪੰਸੇਰੀ ਗੁੜ ਦਾ ਕੜਾਹ ਖਾ ਜਾਂਦੇ ਸਨ ਪੁਰਾਣੇ ਬੁੜੇ !!
ਲੈ ਮੇਰੇ ਇੱਕ ਗੱਲ ਯਾਦ ਆ ਗਈ ..ਸਾਡੇ ਪਿੰਡ ਦਾ ਇੱਕ ਲਾਭਾ ਹੁੰਦਾ ਸੀ ..ਚੰਗਾ ਹੁੰਦੜਹੇਲ !..ਪਹਿਲੀ ਕੇ ਦੂਜੀ ਵਾਰ ਸਹੁਰੀਂ ਗਿਆ …ਸੱਸ ਨੇ ਹਾਰੇ ਵਿੱਚ ਹੀ ਕਾੜਨੀ ‘ਚ ਚੌਲ ਪਾ ਦਿੱਤੇ ਖੀਰ ਬਣਾਉਣ ਵਾਸਤੇ ..ਆਥਣ ਤਾਈਂ ਖੀਰ ਖੋਏ ਵਰਗੀ ਬਣ ਗਈ ..ਦੁੱਧ ਵਾਧੂ ਹੋਣ ਕਰਕੇ ਸੀ ਪਤਲੀ ਹੀ ..ਲਾਭੇ ਨੇ ਮਸਾਂ ਸਮਾਂ ਟਪਾਇਆ ਕਿ ਕਦੋਂ ਖੀਰ ਠੰਡੀ ਹੋਵੇ ..ਆਖਰ ਜਦੋਂ ਕੋਸੀ ਜਿਹੀ ਰਹੀ ਗਈ ਤਾਂ ਉਸਨੇ ਤੌੜੀ ਹੀ ਚੁੱਕ ਕੇ ਮੂੰਹ ਨੂੰ ਲਾ ਲਈ..ਤੇ ਸਾਰੀ ਖੀਰ ਖਾ ਗਿਆ ਜਾਂ ਕਹਿ ਲਈਏ ਕਿ ਪੀ ਗਿਆ ..ਮਗਰੋਂ ਨਿਆਣੇ ਖੀਰ ਨੂੰ ਰੋਣ…ਬੁੜੀ ਇੱਕ ਨਿਆਣੇ ਨੂੰ ਝਈ ਲੈ ਕੇ ਕਹਿੰਦੀ ..”ਵੇ ਕਰਦੈਂ ਚੁੱਪ ,ਕਿ ਸਿੱਟਾਂ ਲਾਭ ਸਿਓਂ ਮੂਹਰੇ ….!!!!!”

ਫੁੱਲਾਂ ਵਾਲੀ ਚਾਦਰ
ਡੀਕ ਲਾ ਕੇ ਪੀ ਗਿਆ ਲਾਭਾ
ਖੀਰ ਦੀ ਤੌੜੀ

ਹਰਵਿੰਦਰ ਧਾਲੀਵਾਲ

ਰੋਟੀ

ਠੰਢਾ ਚੁੱਲਾ
ਨਿੱਕੜੇ ਦੇ ਮੈਲੇ ਹੱਥਾਂ ਚ’
ਚੱਪਾ ਕੁ ਰੋਟੀ

ਜਸਪ੍ਰੀਤ ਕੌਰ ਪਰਹਾਰ

ਚਿੜੀ

ਰਸੋਈ ਦੀ ਬਾਰੀ-
ਚਿੜੀ ਕੂੰਡੇ ਤੋ ਫੁਦਕ 
ਚੁਗੇ ਬਾਜਰਾ

ਰਘਬੀਰ ਦੇਵਗਨ

ਪਚਰੰਗਾ

ਲੰਘ ਗਿਆ ਪਾਣੀਪੱਤ-
ਦਿੱਲੀ ਤਕ ਆ ਰਹੀ
ਪਚਰੰਗੇ ਦੀ ਗੰਧ

ਗੁਰਮੀਤ ਸੰਧੂ

ਕੁਲਫੀ

ਖੁਰਦੀ ਜਾਵੇ
ਡੱਖੇ ਵਾਲੀ ਕੁਲਫੀ
ਬੀਬੀ ਦੇ ਹੱਥ

ਅਵੀ ਜਸਵਾਲ

ਧਾਗਾ

ਹਲਦੀ-ਰੰਗੇ ਹੱਥ –
ਅਖ਼ੀਰਲੇ ਭਰੇ ਕਰੇਲੇ ਲਈ 
ਧਾਗਾ ਮੁੱਕਿਆ

ਰੋਜ਼ੀ ਮਾਨ

ਪੁੜੇ

ਬੁੰਦਾ-ਬਾਂਦੀ
ਚੁੜੇ ਵਾਲੀ ਬਣਾਵੇ
ਖੀਰ ਨਾਲ ਪੁੜੇ

ਸੁਖਵਿੰਦਰ ਵਾਲੀਆ

ਬੱਦਲ

ਘੁਲਿਆ ਬੱਦਲ
ਜ਼ਰਦੇ ਵਾਲੇ ਚੌਲਾਂ ਦਾ 
ਰੰਗ ਹੋਰ ਗੂੜ੍ਹਾ

ਗੁਰਵਿੰਦਰ ਸਿੰਘ ਸਿੱਧੂ

ਸਬ੍ਜ਼ੀ

ਵਿਆਹ ਵਾਲਾ ਘਰ–
ਗੁਰੂ-ਘਰ ਦੇ ਪਤੀਲਿਆਂ ‘ਚ 
ਉੱਬਲ ਰਹੀ “ਸਬ੍ਜ਼ੀ”

ਜਗਰਾਜ ਸਿੰਘ ਨਾਰਵੇ

ਮੱਖੀ

ਢਾਬੇ ਦਾ ਮੈਨਿਊ-
ਦਾਲ ਮਖਣੀ ਵਲ ਕਰੇ ਇਸ਼ਾਰਾ
ਹੱਥ ਜੋੜ ਕੇ ਮੱਖੀ

ਗੁਰਮੀਤ ਸੰਧੂ

ਮੁਰੱਬਾ

ਮੁਰੱਬਿਆਂ ਦਾ ਮਾਲਕ 
ਭਾਅ ਸੁਣ ਰੱਖੇ ਵਾਪਸ 
ਮੁਰੱਬੇ ਦਾ ਡੱਬਾ

ਜਗਰਾਜ ਸਿੰਘ ਨਾਰਵੇ

ਪਟਾਕੇ

ਬਰਸਾਤੀ ਦਿਨ –
ਅੱਗ ‘ਤੇ ਭੁੱਜਦੀ ਛੱਲੀ ਦੇ 
ਵੱਜਣ ਪਟਾਕੇ

rainy day-
corn on fire makes
cracking noise

ਸਰਬਜੀਤ ਸਿੰਘ ਖਹਿਰਾ

ਖਿੱਲਾਂ

ਮਾਇਕਰੋ ਓਵਨ
ਦਾਣੇ ਬਣ ‘ਗੇ ਖਿੱਲਾਂ 
ਖਿੜ ਖਿੜ ਹੱਸੇ ਬੱਚਾ

ਜਗਰਾਜ ਸਿੰਘ ਨਾਰਵੇ

ਰੋਟੀ

ਏਕਮ ਦਾ ਚੰਨ
ਝੌਂਪੜੀ ਦੇ ਬੱਚਿਆਂ ਵੰਡੀ
ਖੰਨੀ-ਖੰਨੀ ਰੋਟੀ

ਅਮਰਾਓ ਸਿੰਘ ਗਿੱਲ

ਖੂਹ

ਨਜ਼ਰੀਂ ਪਈ
ਭੱਤਾ ਲੈ ਕੇ ਆਉਂਦੀ
ਖੂਹ ਦੀ ਮੌਣ ‘ਤੇ ਬੈਠਾ

ਇੰਦਰਜੀਤ ਸਿੰਘ ਪੁਰੇਵਾਲ 

ਪੂੜੇ

ਪਹਿਲਾ ਮੀਂਹ
ਚੂੜੇ ਵਾਲੀ ਕੱਢੇ
ਮਾਹਲ ਪੂੜੇ

ਜਗਦੀਪ ਸਿੰਘ

ਰੋਟੀ

ਮੰਗਲਵਾਰ
ਗੁਆਂਢਣ ਤਾਈ ਪਾਵੇ ਮਿੱਠੀ ਰੋਟੀ
ਕਾਲੇ ਕੁੱਤੇ ਨੂੰ

ਤੇਜੀ ਬੇਨੀਪਾਲ

ਰੋਟੀ

ਸੜ੍ਹ ਗਈ ਰੋਟੀ
ਉਭਰ ਆਇਆ ਓਮ
ਟੇਕੇ ਮੱਥਾ

ਮੀਤ ਅਨਮੋਲ

ਕਰੇਲੇ

ਮੇਰੀ ਮਾਂ 
ਮਿੱਠਾ ਮਿੱਠਾ ਗਾਉਂਦੀ 
ਤੜਕੇ ਕਰੇਲੇ

ਸਤਵਿੰਦਰ ਸਿੰਘ 

ਬਾਜਰੇ ਦੀ ਰੋਟੀ

ਗੋਰਿਆਂ ਹਥਾਂ ਦੀ ਥਾਪ
ਬਾਜਰੇ ਦੀ ਰੋਟੀ ਫੈਲ ਗਈ 
ਚੂੜੇ ਦੀ ਤਾਲ ‘ਤੇ 

ਸੁਰਮੀਤ ਮਾਵੀ 

ਭੱਤਾ

ਬੋਚ ਰਹੀ
ਸਿਰ ਤੋਂ ਤਿਲਕਦਾ ਭੱਤਾ
ਖਾਲ ਟੱਪਦਿਆਂ

ਅਮਰਾਓ ਗਿੱਲ 

ਝੁਕਿਆ ਪੱਤਾ

ਰਿਸ ਰਿਹਾ ਛਤਾ
ਝੁਕੇ ਹੋਏ ਪੱਤੇ ਤੇ
ਟਿਪ ਟਿਪ ਸ਼ਹਿਦ

ਕੁਲਜੀਤ ਮਾਨ

ਸੱਤ ਕਤੂਰੇ

ਚੁੰਘਣ ਸੱਤ ਕਤੂਰੇ
ਦੋ ਕਾਲੇ ਦੋ ਡੱਬਖੜੱਬੇ
ਇੱਕ ਚਿੱਟਾ ਦੋ ਭੂਰੇ

ਅਮਰਾਓ ਗਿੱਲ

ਸ਼ਿਕੰਜਵੀ

ਸਿਖਰ ਦੁਪਿਹਰ

ਸ਼ਿਕੰਜਵੀ ਦੀਆਂ ਛਿੱਟਾਂ ਦੁਆਲੇ

ਕੀੜੀਆਂ ਦੇ ਮੇਲੇ

ਅਨੂਪ ਬਾਬਰਾ

ਬਾਦਸ਼ਾਹੀ

ਸੰਜੇ ਸਨਨ

ਦਾਤੀ ਨਾਲ ਚੀਰੇ
ਸਰਦੀਆਂ ਦੀ ਸੁਗਾਤ
ਮਹਿਕੇ ਸਾਰਾ ਘਰ

 

ਨਰਮੇ ਦੀ ਸੁੰਡੀ

ਨਰਮੇ ਦੀ ਸੁੰਡੀ
ਟੀਂਡੇ ‘ਚੋ ਨਿੱਕਲ
ਚਿੜੀ ਦੇ ਮੂੰਹ

ਸੁਖਵਿੰਦਰ ਵਾਲੀਆ

ਪਨੀਰ

ਬਣੇ ਪਨੀਰ

ਭਾਰੀ ਪੱਥਰਾਂ ਥੱਲੇ

ਫਟਿਆ ਦੁੱਧ

ਰਣਜੀਤ ਸਿੰਘ ਸਰਾ

 

ਸੁਨਹਿਰੀ ਰੋਟੀ

ਪਿੱਛੇ ਛੱਡ ਗਿਆ
ਧੁੰਦ ’ਚ ਰਲਦਾ ਧੂੰਆਂ
ਇੱਕ ਸੁਨਹਿਰੀ ਰੋਟੀ

ਨਿਰਮਲ ਬਰਾੜ