ਗਲਵੱਕੜੀ

ਸਾਉਣ ਮਹੀਨਾ –
ਬਿਜਲੀ ਦੀ ਆਵਾਜ਼ ਨਾਲ
ਹੋਰ ਕਸੀ ਗਲ਼ਵੱਕੜੀ

ਮੁਖਵੀਰ ਸਿੰਘ

ਜੋੜਾ

ਲੜਦੇ ਉਠੇ ਪ੍ਰੇਮੀ 
ਬੈਂਚ ਆ ਬੈਠਾ ਕਲੋਲਾਂ ਕਰਦਾ 
ਪੰਛੀ ਜੋੜਾ

ਸੁਰਜੀਤ ਸਿੰਘ ਪਾਹਵਾ

ਖ਼ਤ

ਪੁਰਾਣਾ ਟਰੰਕ …
ਸੁੱਕੇ ਹੰਝੂਆਂ ਨਾਲ ਝੁਰੜ ਮੁਰੜ
ਮਹਿਬੂਬ ਦਾ ਖ਼ਤ
ਅਰਵਿੰਦਰ ਕੌਰ

ਦੁੱਧ

ਅੱਸੂ ਦਾ ਮਹੀਨਾ –
ਲਾਚੀਆਂ ਵਾਲਾ ਦੁੱਧ ਫੜਾਵੇ 
ਮਹਿਕੀ ਰਾਤ ਦੀ ਰਾਣੀ

ਵਿੱਕੀ ਸੰਧੂ

ਵਾਅਦਾ

ਸਵੇਰ ਉਡੀਕੇ –
ਵਾਅਦਾ ਕੱਲ ਮਿਲਾਂਗੇ 
ਅੱਖਾਂ ਉਨੀਂਦੀਆਂ

ਵਿੱਕੀ ਸੰਧੂ

ਕੀਮਤ

ਤੇਰੀ ਬਾਂਹ ‘ਤੇ ਨਾਂ ਖੁਣਵਾ ਕੇ
ਉਂਗਲੀ ਦੇ ਵਿੱਚ ਮੁੰਦਰੀ ਪਾ ਕੇ
ਕੋਠੀ ਤੇਰੇ ਨਾਂ ਕਰਵਾ ਕੇ
ਕੁਨਬੇ ਦੀ ਕੀਮਤ ਸਮਝਾ ਕੇ
ਦੇਖ, ਮੈਂ ਤੈਨੂੰ ਮਾਰ ਰਿਹਾਂ

ਜਗਜੀਤ ਸੰਧੂ

ਬੋਲ

ਰੋਜ਼ੀ ਮਾਨ

ਛੱਤਰੀ

ਚੰਨ ਦੀ ਛੱਤਰੀ –
ਅੱਖਾਂ ‘ਚ ਅੱਖਾਂ
ਉਸਦੀ ਗੋਦ

ਵਿੱਕੀ ਸੰਧੂ

ਗੁੱਡੀ

ਬੀਹੀ ਵਿੱਚ ਚੀਕ ਚਿਹਾੜਾ ਤਾਂ ਸਵੇਰੇ ਹੀ ਪੈਣਾ ਸ਼ੁਰੂ ਹੋ ਜਾਂਦਾ ਸੀ. ਸਾਂਝੇ ਪਰਿਵਾਰ ਸਨ ਅਤੇ ਖਾਣ ਪੀਣ ਸੰਬੰਧੀ ਵੰਡ ਵੰਡਈਏ ਵਿੱਚੋਂ ਉਪਜੀਆਂ ਭੜਕੀਲੀਆਂ ਰੰਜਸਾਂ ਦਾ ਪ੍ਰਗਟਾਵਾ ਅਕਸਰ ਆਪਣੇ ਬੱਚਿਆਂ ਦੀ ਬੇਰਹਿਮ ਕੁੱਟ ਰਾਹੀਂ ਕੀਤਾ ਜਾਂਦਾ. ਜਾਂ ਫਿਰ ਮਾਪੇ ਆਪਣੀਆਂ ਬਾਲਗ ਪਰਿਭਾਸ਼ਾਵਾਂ ਅਨੁਸਾਰ ਬੱਚਿਆਂ ਦੀਆਂ ਬਾਲ ਖੇਡਾਂ ਨੂੰ ਵੱਡਾ ਅਪਰਾਧ ਸਮਝ ਕੇ ਕੋਮਲ ਮਨਾਂ ਤੇ ਵਦਾਣੀ ਸੱਟਾਂ ਮਾਰ ਦਿੰਦੇ. ਸਾਡੇ ਵਿੱਚੋਂ ਕਿਸੇ ਨੂੰ ਜਦੋਂ ਕੁੱਟ ਪੈ ਰਹੀ ਹੁੰਦੀ ਤਾਂ ਬੱਗੂ ਤਾਇਆ ਵਾਹਦ ਸ਼ਖਸ ਹੁੰਦਾ ਜੋ ਮੌਕੇ ਤੇ ਸਰਗਰਮ ਦਖਲ ਦਿੰਦਾ ਬੱਚੇ ਨੂੰ ਮਾਂ ਕੋਲੋਂ ਖੋਹ ਕੇ ਆਪਣੀ ਬੁੱਕਲ ਵਿੱਚ ਲੈ ਲੈਂਦਾ ਅਤੇ ਉਹਦੀ ਵਿਲੱਖਣ ਤਾੜਵੀਂ ਆਵਾਜ਼ ਬੀਹੀ ਵਿੱਚ ਗੂੰਜ ਰਹੀ ਹੁੰਦੀ, “ ਇਹਨੂੰ ਕਿਉਂ ਕੁੱਟਦੀ ਐਂ .. ਕੀ ਵਿਗਾੜਿਐ ਤੇਰਾ ਇਹਨੇ..” ਉਹਦਾ ਅਡੋਲ ਵਿਸ਼ਵਾਸ਼ ਸੀ ਕਿ ਬੱਚੇ ਹਮੇਸ਼ਾ ਬੇਕਸੂਰ ਹੁੰਦੇ ਹਨ . ਉਹਦੀ ਝਿੜਕ ਵਿੱਚ ਮਾਸੂਮ ਬੱਚੇ ਦੇ ਕੋਮਲ ਮਨ ਦੀ ਟੀਸ ਰਚੀ ਹੁੰਦੀ. ਬੀਹੀ ਦੇ ਬੱਚਿਆਂ ਦੀ ਇੱਕੋ ਇੱਕ ਅਦਾਲਤ ਸੀ ਉਹ ਜੋ ਉਨ੍ਹਾਂ ਦੀਆਂ ਲੇਰਾਂ ਵਿਚਲੀ ਫਰਿਯਾਦ ਦੀ ਤੁਰਤ ਸੁਣਵਾਈ ਕਰਦਾ ਅਤੇ ਝਿੜਕਾਂ ਦੇ ਰੂਪ ਵਿੱਚ ਤੁਰਤ ਸਜ਼ਾ ਫਰਮਾ ਦਿੰਦਾ. ਕਿਸੇ ਮੂਕ ਸਹਿਮਤੀ ਨਾਲ ਸਾਰੀ ਬੀਹੀ ਨੇ ਇਹ ਸ਼ਕਤੀਆਂ ਉਹਨੂੰ ਦੇ ਰਖੀਆਂ ਸਨ.

ਛੂਈ ਮੂਈ 
ਬੁੱਕਲ ਲੈ ਭੋਲੀ ਭਾਲੀ ਗੁੱਡੀ 
ਹੰਝੂ ਪੂੰਝੇ ਬੱਗੂ ਤਾਇਆ

ਚਰਨ ਗਿੱਲ

ਮੇਥੀ

ਇੰਡੋ-ਪਾਕ ਸਟੋਰ
ਜਮੀਲਾ ਮੰਗੇ ਅੰਬਰਸਰੀ ਵੜੀਆਂ
ਜੈਲੋ ਕਸੂਰੀ ਮੇਥੀ

ਗੁਰਮੀਤ ਸੰਧੂ

ਪਿਆਜ਼ੀ

ਉੱਡਦੇ ਬਰਫ਼ ਫੰਬੇ –
ਹਥੇਲੀਆਂ ‘ਚ ਘੁੱਟਿਆ ਉਸਦਾ
ਹਵਾ ਪਿਆਜ਼ੀ ਚਿਹਰਾ

ਹਰਵਿੰਦਰ ਧਾਲੀਵਾਲ

ਨਾਮ

ਸਲ੍ਹਾਬੀ ਕੰਧ 
ਨਹੁੰ ਨਾਲ ਖੂਰਚ ਕੇ ਲਿਖਿਆ 
ਉਸ ਦਾ ਨਾਮ

ਗੁਰਵਿੰਦਰ ਸਿੰਘ ਸਿੱਧੂ

ਮੱਥਾ

ਮੂੰਹ ਚੋਂ ਨਿਕਲੇ ਧੂਆਂ ,
ਤੁਰੇ ਜਾਂਦਿਆਂ,
ਟੇਕਿਆ ਮੱਥਾ ….

ਦਵਿੰਦਰ ਪਾਠਕ ‘ਰੂਬਲ’

ਛਤਰੀ

ਵਰਖਾ ਫੁਹਾਰ 
ਦੋ ਪ੍ਰੇਮੀਆਂ ਹੱਥ ਇੱਕ –
ਬੰਦ ਛਤਰੀ

ਸੁਰਿੰਦਰ ਸਪੇਰਾ

ਸੈਮ ਬਾਜਵਾ ਦੇ 8 ਹਾਇਕੂ

ਗਹਿਰੀ ਰਾਤ

ਚਮਕਦੇ ਤਾਰੇ ਨਾਲ਼ੇ ਜੁਗਨੂੰ

ਅੱਖੀਂ ਹੰਝੂ

****

ਗਹਿਰੀ ਰਾਤ

ਹੋਰ ਕੁਝ ਵੀ ਨਈਂ

ਤੇਰੀ ਤਸਵੀਰ

****

ਗਹਿਰੀ ਰਾਤ

ਹਵਾ ਦਾ ਬੁੱਲਾ

ਤੇਰੀ ਚਾਪ

****

ਗਹਿਰੀ ਰਾਤ

ਮਨ ਦੇ ਅੰਦਰ ਹੰਝੂ

ਅੱਖੀਂ ਸੁੱਨ

****

ਗਹਿਰੀ ਰਾਤ

ਤੇਰਾ ਮੇਰਾ ਰਿਸ਼ਤਾ

ਇਕ ਸੁਪਨਾ

****

ਗਹਿਰੀ ਰਾਤ

ਸੋਚਾਂ ਦਾ ਤਾਣਾ ਬਾਣਾ

ਉਲਝੀ ਡੋਰ

****

ਗਹਿਰੀ ਰਾਤ

ਰੋਸ਼ਨੀ ਦੀ ਇਕ ਲਕੀਰ

ਤੇਰੀ ਉਡੀਕ

****

ਗਹਿਰੀ ਰਾਤ

ਕਿੰਨੀ ਵੱਡੀ ਚੁੱਪ 

ਮੇਰੇ ਅੰਦਰ

ਸੈਮ ਬਾਜਵਾ

ਈਦ

ਮਸੀਤ ਦੇ ਬਾਹਰ 
ਗਲ ਲਗ ਕਹੇ 
ਈਦ ਮੁਬਾਰਕ

ਸਹਿਜਪ੍ਰੀਤ ਮਾਂਗਟ

ਵਿਛੜਨ

ਮਿਲਕੇ ਰੋਏ
ਏਅਰ ਪੋਰਟ ‘ਤੇ
ਵਿਛੜਨ ਵੇਲੇ

ਕਮਲ ਸੇਖੋਂ

ਆਸ਼ੀਰਵਾਦ

ਮੱਥੇ ‘ਤੇ ਚੁਮੰਨ ~
ਬੱਚੀ ਸੋਹਣੇ ਸੁਪਨੇ ਲਈ 
ਮੰਗੇ ਆਸ਼ੀਰਵਾਦ

ਸਰਬਜੀਤ ਸਿੰਘ ਖਹਿਰਾ

ਪੰਜੀਰੀ

ਮਾਂ ਦਾ ਪਿਆਰ
ਰਸਤੇ ਵਿਚ ਈ ਖੋਲਿਆ
ਪੰਜੀਰੀ ਵਾਲਾ ਡੱਬਾ

ਲਵਤਾਰ ਸਿੰਘ

ਸ਼ੀਤਲ

ਹਵਾਈ-ਚੁੰਮਣ
ਬੇਟੀ ਸੁੱਟਿਆ
ਤਪਦਾ ਮੱਥਾ ਸ਼ੀਤਲ

ਦਲਵੀਰ ਗਿੱਲ

ਸੱਜਣ

ਗੁਰਦੁਆਰਿਓਂ ਨਿਕਲਿਆ 
ਮਿਲ ਸੱਜਣਾ ਨੂੰ 
ਜਾ ਮਸੀਤੇ ਵੜਿਆ

ਮਜ਼ਹਰ ਖਾਨ

ਛਾਂ

ਬੋਹੜ ਦੀ ਛਾਂ …
ਕੰਬਦੇ ਹੱਥੀਂ ਨਾਨੀ ਨੇ ਚੁੰਮਿਆਂ 
ਮੇਰਾ ਮੱਥਾ

 

ਜਸਪ੍ਰੀਤ ਕੌਰ ਪਰਹਾਰ

ਰਸਗੁੱਲਾ

ਰੱਖੜ ਪੁੰਨਿਆ –
ਧਾਗਾ ਬੰਨ੍ਹ ਵੀਰੇ ਦੇ ਮੂੰਹ ‘ਚ ਪਾਇਆ 
ਚਿੱਟਾ ਰਸਗੁੱਲਾ

ਹਰਲੀਨ ਸੋਨਾ

ਨੀਰ

ਪ੍ਰਦੇਸਾਂ ਚ ਵੀਰ
ਡਾਕ ਚ ਰੱਖੜੀ
ਨੈਣਾਂ ਚ ਨੀਰ

ਸੁਖਜੀਤ ਸਿੰਘ ਪਾਤਰਾ

ਫੁਹਾਰ

ਨਿੱਕੀ ਨਿੱਕੀ ਫੁਹਾਰ
ਹਰ ਬੂੰਦ ਵਿਚੋਂ ਦਿਸੇ
ਵੀਰ ਦੀ ਨੁਹਾਰ

ਅਰਵਿੰਦਰ ਕੌਰ

ਚੀਨੀ

ਬੰਨੇ ਰੱਖੜੀ
ਲਿਫਾਫੇ ਚੋਂ ਖਿੰਡੇ ਚੀਨੀ ਦੇ ਦਾਣੇ
ਚੁਗੇ ਭੈਣ ਦਾ ਪਿਆਰ

ਲਵਤਾਰ ਸਿੰਘ

ਚੰਨ

ਪੂਰਨਮਾਸ਼ੀ
ਅਖੀਆਂ ਚ ਦਿਸਿਆ ਚੰਨ
ਗਲਵਕੜੀ ਪਾਉਂਦਿਆ

ਮਨਦੀਪ ਮਾਨ

ਵੰਗ

ਮਿੱਤਰਾਂ ਦਾ ਬੂਹਾ
ਖੰਘਿਆ ਫੋਕੀ ਖੰਘ
ਉਹਨੇ ਵੀ ਛਣਕਾਈ ਵੰਗ

ਤੇਜੀ ਬੇਨੀਪਾਲ

ਸਹੇਲੀਆਂ

ਤੀਆਂ ਦੇ ਦਿਨ
ਸਹੁਰੇ ਘਰੋਂ ਪਰਤੀ ਮੁਟਿਆਰ
ਗਲਵਕੜੀ ਪਾਉਣ ਸਹੇਲੀਆਂ

ਸਰਦਾਰ ਧਾਮੀ

ਅੱਖਾਂ

ਮੈਨੂੰ ਤੱਕ ਕੇ
ਗੱਲ੍ਹਾਂ ਭਖੀਆਂ, ਬਾਹਾਂ ਖੁੱਲ੍ਹੀਆਂ
ਅੱਖਾਂ ਹੋਈਆਂ ਬੰਦ

on seeing me
her cheeks glow, arms open
eyes close

मुझे देख कर
कपोल भखे, बाहें खुलीं
आँखें हुईं बंद

ਜਗਜੀਤ ਸੰਧੂ

ਜੋੜਾ

ਸਾਵਣ-
ਰੰਗਲੀ ਛਤਰੀ ਹੇਠ 
ਪਰੇਮੀ ਜੋੜਾ

sawan-
a couple shares
a florescent umbrella

ਅਰਵਿੰਦਰ ਕੌਰ

ਬਿਸਕੁਟ

ਡੁਬ ਗਿਆ
ਤੇਰੇ ਦਿੱਤਾ ਬਿਸਕੁਟ
ਚਾਹ ਦੇ ਗਲਾਸ `ਚ

ਕੁਲਜੀਤ ਮਾਨ

ਮੁਖੜਾ

ਪਹਿਲੀ ਮੁਲਾਕਾਤ –
ਮਹਿੰਦੀ ਵਾਲੇ ਹੱਥਾਂ ਨਾਲ 
ਲੁਕੋਇਆ ਮੁਖੜਾ

ਅਰਵਿੰਦਰ ਕੌਰ

 

ਵਿਦਾਇਗੀ

ਪੀਡੀ ਹੋਈ-
ਉਡਾਣ ਦੀ ਸੂਚਨਾ ਸੁਣਦਿਆਂ
ਵਿਦਾਇਗੀ ਗਲਵਕੜੀ

ਗੁਰਮੀਤ ਸੰਧੂ

ਕਲਾਈ

ਕੋਇਲ ਦੀ ਕੂਕ-
ਉਸ ਘੁੱਟਕੇ ਫੜੀ
ਗੋਰੀ ਕਲਾਈ

ਦੀਪੀ ਸੈਰ

ਰੁੱਕਾ

varrdi barsaat
tera rukka gulaabi ho riha
chunni de pallae banneya

ਰੋਜ਼ੀ ਮਾਨ

ਜੋੜੀ

ਕਾਲ਼ੀ ਘਟਾ –
ਬਿਨ ਛਤਰੀ ਇਕ ਜੋੜੀ 
ਖਿੜ-ਖਿੜ ਹੱਸੇ

ਰੋਜ਼ੀ ਮਾਨ

ਵਿੱਲੋ

ਪਿਤਰ-ਦਿਵਸ –
ਮੈਂ ਚੁੰਮਾ ਵੀਪਿੰਗ-ਵਿੱਲੋ
ਪੋੱਤੇ ਦੀ ਯਾਦ

 fathers day –
memories of my grandson
I hug weeping-willow

ਅਮਰਾਓ ਸਿੰਘ ਗਿੱਲ 

ਇਸ਼ਾਰਾ

ਸੁਰਮਈ ਸ਼ਾਮ 
ਉਸਦੀ ਅੱਖ ਸ਼ਰਮਾਈ ਦੇਖ 
ਮਾਹੀ ਦਾ ਇਸ਼ਾਰਾ

ਮਨਦੀਪ ਮਾਨ

ਅੰਗੂਠੀ

ਕੈਂਡਲ ਲਾਇਟ ਡਿੰਨਰ
ਅੱਖ ਬਚਾ ਓਹਦੀ ਪਲੇਟ ਚ ਰੱਖੀ
ਹੀਰੇ ਦੀ ਅੰਗੂਠੀ

ਜਗਦੀਪ ਸਿੰਘ ਮੁੱਲਾਂਪੁਰ

ਫੋਟੋ

ਪੁਰਾਣੀ ਫੋਟੋ 
ਪਿਛੇ ਲਿਖਿਆ ਜਨਮਾ ਦੇ ਸਾਥੀ 
ਪੜ ਕੇ ਹਸਦਾ

ਸਾਬੀ ਨਾਹਲ

ਬਿਆਈਆਂ

ਸਕੂਲ ਦਾ ਰਾਹ 
ਬਿਆਈਆਂ ਵਾਲੀ ਉਂਗਲ
ਮਲੂਕ ਹੱਥ ‘ਚ

ਸਤਵਿੰਦਰ ਸਿੰਘ

ਮੱਖੀ

ਬੂਹਾ ਖੁਲ੍ਹਿਆ
ਮੱਖੀ ਨੇ ਮੱਥਾ ਚੁੰਮਿਆ
ਉਹਨੇ ਬੁਲ੍ਹ

ਗੁਰਮੀਤ ਸੰਧੂ

ਛੋਹ

ਤੇਰੀ ਛੋਹ –
ਖਾਲੀ ਕੱਪ ‘ਚੋਂ 
ਅਜੇ ਵੀ ਪੀਵਾਂ

छुअन तुम्हारी 
खाली कप से
अभी तक पीऊँ 

your touch
still sipping on
empty cup

ਜਗਜੀਤ ਸੰਧੂ

ਪਰਛਾਵਾਂ

ਢਲਦੀ ਸ਼ਾਮ –
ਦਰਵਾਜੇ ‘ਚੋ ਲੰਘਿਆ 
ਓਹਦਾ ਪਰਛਾਵਾਂ

ਅਰਵਿੰਦਰ ਕੌਰ

ਯਾਦ

ਕਾਲੇ ਬੱਦਲ
ਮੋਸਮ ਸੁਹਾਣਾ
ਸਤਾਵੇ ਤੇਰੀ ਯਾਦ

ਨਿਰਮਲ ਧੋਟ

ਪੱਤੇ

ਲੰਘੀ ਉਸਦੀ ਕਾਰ –
ਮੇਰੀ ਸਰਦਲ ਤੋਂ ਉੱਡੇ
ਸੁੱਕੇ ਪੱਤੇ

ਜਤਿੰਦਰ ਕੌਰ
 

ਬਿੰਦੀ

ਸੁਬ੍ਹਾ ਦਾ ਸੂਰਜ –
ਉਹਦੀ ਗੱਲ੍ਹ ‘ਤੇ ਲਭੀ 
ਮੱਥੇ ਦੀ ਬਿੰਦੀ

ਦੀਪੀ ਸੈਰ

ਛਤਰੀ

ਟਿਪ ਟਿਪ ਵਰਸੇ
ਦੋਨੋ ਜਾਣ ਭਿੱਜਦੇ
ਛਤਰੀ ਥੱਲੇ

ਅਵੀ ਜਸਵਾਲ

ਪੀਲਾ ਗੁਲਾਬ

ਪਹਿਲੀ ਮੁਲਾਕਾਤ 
ਕਾਰਨਰ ਟੇਬਲ ਤੇ ਉਸ ਰਖਿਆ 
ਪੀਲਾ ਗੁਲਾਬ

ਗੀਤ ਅਰੋੜਾ

ਬਾਗ

ਬਾਗ਼ ਕੱਢਦਿਆਂ
ਫੁੱਲਾਂ ਚ ਲੁਕੋਇਆ
ਉਸਦਾ ਨਾਂ

ਜਗਦੀਪ ਸਿੰਘ

ਕੋਇਲ

ਮਹਿਬੂਬ ਦਾ ਪਿੰਡ
ਸੰਘਣੇ ਬੋੜ੍ਹ ‘ਚ ਕੋਇਲ ਦੀ
ਕਿੰਨੀ ਲੰਮੀ ਕੂਕ

ਰਣਜੀਤ ਸਿੰਘ ਸਰਾ

ਚੁੰਨੀ

ਮਾਹੀ ਦੀ ਫੋਟੋ
ਲਾਉਂਦੀ ਚੁੰਨੀ ਨੂੰ ਗੋਟਾ
ਹੱਸੇ ‘ਕੱਲੀ

ਗੀਤ ਅਰੋੜਾ

ਰੰਗ

ਸਿਖਰ ਦੁਪਹਿਰ 
ਫਿੱਕਾ ਹੋਇਆ 
ਤੇਰਾ ਮਨਪਸੰਦ ਰੰਗ 

ਅਰਵਿੰਦਰ ਕੌਰ

ਪੱਖੀ

ਬੱਤੀ ਗੁੱਲ
ਕੋਲ ਬੈਠੀ ਝੱਲੇ
ਪੱਖੀ ਘੁੰਗਰੂਆਂ ਵਾਲੀ

ਜਗਦੀਪ ਸਿੰਘ ਮੁੱਲਾਂਪੁਰ

ਵੀਣੀ

ਉਸਦਾ ਨਾਂ
ਵੀਣੀ ‘ਤੇ ਖੁਣਵਾਇਆ
ਵਿਛੜਣ ਤੋਂ ਬਾਦ

ਜਗਦੀਪ ਸਿੰਘ

ਚੰਨ

ਪੂਰਨਮਾਸ਼ੀ –
ਆਹਾ! ਦਿਸੇ ਦੋਨੋ ਇਕਠੇ 
ਮਹਿਬੂਬ ਤੇ ਚੰਨ 

ਮਨਦੀਪ ਮਾਨ

ਸਾਹ

ਟੁੱਟਿਆ ਬਟਣ ਲਗਾ
ਦੰਦਾਂ ਨਾਲ ਧਾਗਾ ਟੁੱਕਦਿਆਂ
ਸੀਨਾ ਛੋਹਣ ਸਾਹ

ਅਮਰਾਓ ਸਿੰਘ ਗਿੱਲ

ਪੱਖੀ

ਬੱਤੀ ਗੁੱਲ –
ਕੋਲ ਬੈਠੀ ਝੱਲੇ
ਪੱਖੀ ਘੁੰਗਰੂਆਂ ਵਾਲੀ

ਜਗਦੀਪ ਸਿੰਘ ਮੁੱਲਾਂਪੁਰ 

ਪੱਗ

ਉਸਦੇ ਕਹਿਣ ਤੇ
ਫਿਰ ਬੰਨੀ
ਸੰਧੂਰੀ ਪੱਗ

ਜਗਦੀਪ ਸਿੰਘ