ਨਿਸ਼ਾਨੀ

ਸ਼ਾਂਤ ਕਾਇਨਾਤ

ਗਲ ਚ ਪਾਈ ਆਪ ਮਾਹੀ ਨੇ

ਪਿਆਰ ਨਿਸ਼ਾਨੀ

ਗੁਰਚਰਨ ਕੌਰ

ਵਾਲ

ਰੁੱਸਿਆ ਮਾਹੀ–
ਵਾਹ ਰਹੀ ਉਲਝੇ ਵਾਲ 
ਤਿੜਕੇ ਸ਼ੀਸ਼ੇ ਅੱਗੇ 

ਜਗਰਾਜ ਸਿੰਘ ਨਾਰਵੇ

ਅਰਬੀ

ਤਰੇਲੀ ਅਰਬੀ- 
ਚਾਦਰ ਕਢਦੀ ਕੁੜੀ ਪਰੋਵੇ 
ਮਾਹੀ ਦੇ ਨਾਂ ਤੇ ਮੋਤੀ

ਗੁਰਮੁਖ ਭੰਦੋਹਲ ਰਾਈਏਵਾਲ

ਲਾਸ਼

ਸਰਦੀਂ ਮੁੜ੍ਹਕਾ 
ਸਿਆਚਿਨੋਂ ਆਈ 
ਕੰਤ ਦੀ ਲਾਸ਼

ਤੇਜਿੰਦਰ ਸਿੰਘ ਗਿੱਲ

ਚੂੜੀਆ

ਭੰਨ ਚੂੜੀਆ
ਵੇਖੇ ਪਿਆਰ ਕਿੰਨਾ
ਮਾਹੀ ਪ੍ਰਦੇਸ

ਸੁਖਵਿੰਦਰ ਬਾਜਵਾ

ਵੰਗ

ਮਾਹੀ ਪਰਦੇਸ 
ਛਣਕ ਦੀ ਵੰਗ
ਕੰਨਾਂ ਨੂ ਚੁਭੇ 

ਗੁਰਨਾਮ ਗੌਂਦਾਰਾ

ਰੰਗ

ਖਿੜ੍ਹ ਖਿੜ੍ਹ ਹੱਸੇ –
ਗੁਲਾਨਾਰੀ ਪੱਗ ਦਾ ਰੰਗ ਚੋਇਆ 
ਚਿਹਰਾ ਮਾਹੀ ਦਾ

ਵਿੱਕੀ ਸੰਧੂ

ਚੰਨ

ਈਦ ਦਾ ਚੰਨ
ਅੱਖਾ ਦੇ ਵਿੱਚ ਉਡੀਕ
ਮਾਹੀ ਪਰਦੇਸ
……………
ਈਦ ਦਾ ਚੰਨ
ਮਾਹੀ ਵਿੱਚ ਪਰਦੇਸ
ਉਡੀਕਣ ਅੱਖਾ

ਪੁਸ਼ਪਿੰਦਰ ਸਿੰਘ ਪੰਛੀ

ਡਾਇਰੀ

ਪੁਰਾਣੀ ਡਾਇਰੀ 
ਮਿਲਿਆ ਰੁੱਕਾ 
ਚੀਰੇ ਵਾਲੇ ਦਾ

ਸੁਖਵਿੰਦਰ ਵਾਲੀਆ

ਰੋਟੀ

ਹਲਕੀ ਕਿਣ-ਮਿਣ –
ਮਾਹੀ ਨੂੰ ਤੱਕਦੀ ਦੀ 
ਸੜੇ ਤਵੇ ‘ਤੇ ਰੋਟੀ

ਪ੍ਰੀਤ ਰਾਜਪਾਲ

ਵਿਜੋਗਣ

ਵਗੀ ਪੁਰਵਾਈ
ਹੁੰਮਸ ਗਈ ਚਿਰੀਂ ਵਿਜੋਗਣ
ਮਾਹੀ ਗਲ਼ ਲਾਈ

ਦਰਬਾਰਾ ਸਿੰਘ

ਤਵੀਤੜੀ

੧.
ਮਾਹੀ ਪਰਦੇਸ-
ਤਵੀਤੜੀ ਤੇ ਖੁਣਵਾਇਆ 
ਉਹਦਾ ਨਾਂ 

੨.
ਮਾਹੀ ਪਰਦੇਸ-
ਤਵੀਤੜੀ ਚ ਮੜਾਇਆ 
ਉਹਦਾ ਰੁੱਕਾ

ਅਰਵਿੰਦਰ ਕੌਰ

ਕੰਤ

ਕੰਤ ਸਿਪਾਹੀ ਤੋਰ
ਚੁੰਨੀ ਨਾਲ ਪੂੰਝੇ ਅਥਰੂ
ਬਰੂਹਾਂ ਚ ਖੜੀ

ਰਵਿੰਦਰ ਰਵੀ

ਚੰਦ

ਏਕਮ ਦਾ ਚੰਦ
ਹੋਇਆ ਚਿਹਰਾ ਉਦਾਸ
ਜੰਗ ਚ ਮਾਹੀ

ਪੁਸ਼ਪਿੰਦਰ ਸਿੰਘ ਪੰਛੀ

ਅਖਾਂ

ਮਾਹੀ ਦੀਆਂ ਅਖਾਂ 
ਬਣਾ ਸ਼ੀਸ਼ਾ ਲਗਾਵੇ ਬਿੰਦੀ 
ਮੁਸ਼ਕੜੀਆਂ ਹੱਸੇ

ਮਨਦੀਪ ਮਾਨ 

ਜਾਗੋ

‎1.
ਮਾਘ ‘ਚ ਜਾਗੋ –
ਢੋਲ ਦੇ ਨਾਲ ਖਹਿ ਗਈ 
ਸਿਤਾਰਿਆਂ ਵਾਲੀ ਚੁੰਨੀ 
2.
ਸਰਦੀ ‘ਚ ਜਾਗੋ –
ਵਿਹੜੇ ਆਇਆ ਢੋਲ 
ਮੱਥੇ ਪਸੀਨਾ

ਰੋਜ਼ੀ ਮਾਨ

ਚੁੰਨੀ

ਸ਼ਗਨਾਂ ਵਾਲੀ ਰਾਤ
‘ਚੰਨ’ ਨਾਲ ਅਠਖੇਲੀਆਂ ਕਰਨ
ਚੁੰਨੀ ਦੇ ਸਿਤਾਰੇ

ਗੁਰਮੀਤ ਸੰਧੂ

ਵੀਣੀ

ਸਤਰੰਗੀ ਪੀਂਘ-
ਗੋਰੀ ਵੀਣੀ ਤੇ ਛਪੇ ਉਸਦੇ 
ਉਂਗਲਾਂ ਦੇ ਨਿਸ਼ਾਨ

ਗੁਰਮੁਖ ਭੰਦੋਹਲ ਰਾਈਏਵਾਲ

ਮਸਿਆ

ਓਹੋ !ਮਸਿਆ 
ਤਾਹੀਓਂ ਨਾ ਚੰਨ ਦਿਸਿਆ 
ਤੇ ਨਾ ਮਹਿਬੂਬ

ਮਨਦੀਪ ਮਾਨ 

ਮਾਹੀ

ਬਹਾਰ ਦੀ ਹਵਾ
‘ਕੱਲੀ ਬੈਠੀ ਹੱਸੇ
ਰੱਖ ਮਾਹੀ ਦਾ ਨਾਂ

ਵਰਿੰਦਰ ਬੇਨੀਪਾਲ

ਕੰਧੋਲ਼ੀ

ਮਿੱਟੀ ਲਾਵੇ ਕੰਧੋਲ਼ੀ ਨੂੰ
ਯਾਦ ਸੱਜਣਾ ਦੀ ਆਈ
ਪਹਿਲਾਂ ਹੱਸੀ ਫੇਰ ਰੋਈ

ਡਿਮਪੀ ਸਿੱਧੂ

ਵਿਛੋੜਾ

ਅੰਬੀਆਂ ਨੂੰ ਬੂਰ 
ਪੌਣਾਂ ਵਿਚ ਖ਼ੁਸ਼ਬੂ 
ਚੰਨ ਮਾਹੀ ਦੂਰ

ਸੰਜੇ ਸਨਨ

ਚੰਨ ਮਾਹੀ

ਬਾਰੀ ਚੋਂ ਦੇਖੇ

ਚੜੇ ਹੋਏ ਚੰਨ ਨੂੰ 

ਉਡੀਕੇ ਚੰਨਮਾਹੀ ਨੂੰ 

ਮਨਦੀਪ ਮਾਨ

ਸਵੈਟਰ

ਤਾਰ ਸਾਫ਼ ਕਰ ਪਾਵੇ

ਮਾਹੀ ਦਾ ਸਵੈਟਰ

ਦੁੱਪਟਾ ਦੇ ਕੇ ਸੁਕਣਾ

ਸੁਖਵਿੰਦਰ ਵਾਲੀਆ

ਇੰਤਜ਼ਾਰ

ਜਸਦੀਪ ਸਿੰਘ

ਰਾਹ ਤੱਕੇ
ਮਹਿਰਮ ਦਾ
…ਗਿਆ ਪਰਦੇਸੀ… 

ਪੱਗ

ਪੂਣੀ ਕਰਾਉਂਦੇ… 

ਡਿਗਿਆ ਮਾਹੀ ਧੜੱਮ

ਪੱਗ ਹਥੋਂ ਛੁਟੀ 

ਸਹਿਜਪ੍ਰੀਤ ਮਾਂਗਟ

ਮਾਹੀ

ਕੋਠੇ ਤੇ ਮਾਹੀ 

ਫੋਨ ਫੜਾਨ ਚੜ੍ਹੀ 

ਹੋਈ ਸਾਹੋ ਸਾਹੀ

ਸੰਜੇ ਸਨਨ