ਨਿਸ਼ਾਨੀ

ਸ਼ਾਂਤ ਕਾਇਨਾਤ

ਗਲ ਚ ਪਾਈ ਆਪ ਮਾਹੀ ਨੇ

ਪਿਆਰ ਨਿਸ਼ਾਨੀ

ਗੁਰਚਰਨ ਕੌਰ

ਵੰਗਾਂ

ਚੁਗ ਰਹੀ ਹੈ
ਉਹ ਟੁੱਟੀਆਂ ਵੰਗਾਂ ਦੇ ਟੋਟੇ
ਤੇਰੇ ਜਾਣ ਤੋਂ ਬਾਅਦ

ਗੁਰਮੇਲ ਬਦੇਸ਼ਾ

ਝਾਂਜਰਾਂ

ਤ੍ਰੇਲੀ ਸਵੇਰ
ਵੱਟ ‘ਤੇ ਭੱਜਦੀ ਦੀਆਂ
ਹਰੀਆਂ ਝਾਂਜਰਾਂ

ਪੁਸ਼ਪਿੰਦਰ ਸਿੰਘ ਪੰਛੀ

ਮੁੰਦਰੀ

ਉਹ ਪਲੋਸੇ
ਹੀਰੇ ਦੀ ਮੁੰਦਰੀ 
ਖੰਭ ਕਲਮ ਨਾਲ਼

she caresses
her diamond ring
with quill-pen

वह छूआए
हीरे की अंगूठी को
कलम की पंखुरी से

ਜਗਜੀਤ ਸੰਧੂ

ਵੰਗ

ਬਾਪੂ ਦਾ ਖੰਘੂਰਾ
ਕਾਹਲੀ ਕਾਹਲੀ ਪੱਲਾ ਕਰਦਿਆਂ 
ਛਣਕ ਪਈ ਵੰਗ 

ਅਰਵਿੰਦਰ ਕੌਰ

ਕੀਮਤ

ਤੇਰੀ ਬਾਂਹ ‘ਤੇ ਨਾਂ ਖੁਣਵਾ ਕੇ
ਉਂਗਲੀ ਦੇ ਵਿੱਚ ਮੁੰਦਰੀ ਪਾ ਕੇ
ਕੋਠੀ ਤੇਰੇ ਨਾਂ ਕਰਵਾ ਕੇ
ਕੁਨਬੇ ਦੀ ਕੀਮਤ ਸਮਝਾ ਕੇ
ਦੇਖ, ਮੈਂ ਤੈਨੂੰ ਮਾਰ ਰਿਹਾਂ

ਜਗਜੀਤ ਸੰਧੂ

ਝਾਂਜਰ

ਲੰਮੀ ਵਾਟ
ਝਾਂਜਰ ਦੀ ਛਣ ਛਣ
ਤੋੜੀ ਚੁੱਪ

ਲਵਤਾਰ ਸਿੰਘ

ਕੋਕਾ

ਹੁੰਮਸੀ ਦੁਪਹਿਰ
ਪਥਰ ਸੁੱਟਦਿਆਂ ਘੁੰਡ ਵਿੱਚੋਂ 
ਲਿਸ਼ਕਿਆ ਕੋਕਾ

ਸਤਵਿੰਦਰ ਗਿੱਲ

ਚੂੜੀਆ

ਭੰਨ ਚੂੜੀਆ
ਵੇਖੇ ਪਿਆਰ ਕਿੰਨਾ
ਮਾਹੀ ਪ੍ਰਦੇਸ

ਸੁਖਵਿੰਦਰ ਬਾਜਵਾ

ਵੰਗਾਂ

ਅੰਬਰੀਂ ਪੀਂਘ–
ਮੇਰੀ ਵੀਣੀ ਤੇ
ਸਤਰੰਗੀ ਵੰਗਾਂ

ਅਰਵਿੰਦਰ ਕੌਰ

ਚੂੜੀਆਂ

ਸਮੁੰਦਰ ਦੀਆਂ ਛਲਾਂ —
ਮੇਰੀ ਵੀਣੀ ਤੇ ਸਜਦੀਆਂ 
ਹਰੇ ਕੱਚ ਦੀਆਂ ਚੂੜੀਆਂ

ਅਰਵਿੰਦਰ ਕੌਰ

ਮੁਲਾਕਾਤ

ਚੁੱਪ ਰਾਤ
ਝਾਂਜਰਾ ਖੋਲ੍ਹ ਹੱਥ ਚ ਫੜੀਆ
ਪਹਿਲੀ ਮੁਲਾਕਾਤ

ਤੇਜੀ ਬੇਨੀਪਾਲ

ਵਾਲ਼ੇ

ਮਾਂ ਦੇ ਗੁਜਦਿਆ
ਧੀ ਨੇ ਸਭਾਂਲੇ
ਕੰਨਾਂ ਦੇ ਵਾਲ਼ੇ

ਕਮਲਜੀਤ ਮਾਂਗਟ

ਵੰਗ

ਰੇਸ਼ਮੀ ਚਾਦਰ
ਫੁੱਲ ਪੱਤੀਆਂ ਨੇ ਲੁਕੋਇਆ
ਵੰਗ ਦਾ ਟੋਟਾ

ਹਰਵਿੰਦਰ ਧਾਲੀਵਾਲ

ਸਕਾਈਪ

ਸਕਾਈਪ –
ਮੰਗਲਸੂਤਰ ਨੂੰ ਚੁੰਮਦਿਆਂ 
ਡੁੱਲੇ ਹੰਝੂ 

skype-
she kisses her manglasutra
tears roll

ਅਰਵਿੰਦਰ ਕੌਰ

ਸ਼ਾਮ

ਉਹਦੀ ਪੈੜ ਸੁਣਦਿਆਂ 
ਛਣਕ ਗਈ ਝਾਂਜਰ –
ਭਿਜੀ ਸ਼ਾਮ 

hearing his footsteps
my payal goes ”chham”
rainy evening

ਅਰਵਿੰਦਰ ਕੌਰ

ਝੁਮਕੇ

ਬਸੰਤੀ ਹਵਾ –
ਉਹਦੇ ਕੰਨੀ ਝੂਮ ਰਹੇ 
ਰਾਜਸਥਾਨੀ ਝੁਮਕੇ 

spring breeze-
gently, ever so gently
her jhumka sways

ਅਰਵਿੰਦਰ ਕੌਰ

ਲੌਂਗ

ਤੀਆਂ ਦਾ ਮੇਲਾ-
ਪੀਂਘ ਦੇ ਹੁਲਾਰੇ ਨਾਲ ਲਿਸ਼ਕੇ
ਲੌਂਗ ਬੁਰਜੀਆਂ ਵਾਲਾ

ਗੁਰਮੀਤ ਸੰਧੂ

ਮੰਣਕੇ

ਚੱੜਦੀ ਸਵੇਰ
ਲੱਭੇ ਗਾਨੀ ਦੇ ਮੰਣਕੇ
ਓੁੱਠਣ ਤੋ਼ ਪਹਿਲਾਂ

ਲਵਤਾਰ ਸਿੰਘ

ਲਿਸ਼ਕੋਰ

ਦੀਵੇ ਦੀ ਲੋਅ- 
ਘੂਕ ਸੁੱਤੀ ਅੰਮੜੀ ਦੇ ਮੁਖ ‘ਤੇ
ਕੋਕੇ ਦੀ ਲਿਸ਼ਕੋਰ

ਗੁਰਮੁਖ ਭੰਦੋਹਲ ਰਾਈਏਵਾਲ

ਛੱਲਾ

ਮੇਲਾ ਵਿਛੜਿਆ
ਖੱਟੀ ਚੁੰਨੀ ਵਾਲੀ ਸਹਿਲਾਵੇ
ਚੀਚੀ ਵਾਲਾ ਛੱਲਾ

ਰਵਿੰਦਰ ਰਵੀ

ਬੋਰ

ਮਾਮੇ ਦੀ ਨੂੰਹ ਨੱਚੇ-
ਖਿੰਡ ਰਹੇ ਵਹਿੜੇ ਵਿਚ
ਝਾਂਜਰਾਂ ਦੇ ਬੋਰ

ਗੁਰਮੀਤ ਸੰਧੂ

ਤਵੀਤੜੀ

੧.
ਮਾਹੀ ਪਰਦੇਸ-
ਤਵੀਤੜੀ ਤੇ ਖੁਣਵਾਇਆ 
ਉਹਦਾ ਨਾਂ 

੨.
ਮਾਹੀ ਪਰਦੇਸ-
ਤਵੀਤੜੀ ਚ ਮੜਾਇਆ 
ਉਹਦਾ ਰੁੱਕਾ

ਅਰਵਿੰਦਰ ਕੌਰ

ਲਿਸ਼ਕੋਰ

ਬਰਕਰਾਰ
ਝੁਰੜੀਆਂ ਭਰੇ ਚਿਹਰੇ ਤੇ
ਕੋਕੇ ਦੀ ਲਿਸ਼ਕੋਰ

ਰਵਿੰਦਰ ਰਵੀ

ਵੰਗ

ਮਿੱਤਰਾਂ ਦਾ ਬੂਹਾ
ਖੰਘਿਆ ਫੋਕੀ ਖੰਘ
ਉਹਨੇ ਵੀ ਛਣਕਾਈ ਵੰਗ

ਤੇਜੀ ਬੇਨੀਪਾਲ

ਚੂੜੀਆਂ

ਖੋਲ ਬਾਂਹਾਂ
ਸਿਮਟ ਗਈ ਬਾਂਹਾਂ ‘ਚ
ਚੂੜੀਆਂ ਦੀ ਅਵਾਜ਼

ਸਰਬਜੀਤ ਸਿੰਘ ਖਹਿਰਾ

ਝਾਂਜਰਾਂ

ਛੱਤ ‘ਤੇ ਖੇਡਦਿਆਂ
ਬਾਰਸ਼ ਦੀਆਂ ਬੂੰਦਾਂ ‘ਚ 
ਝਾਂਜਰਾਂ ਦੀ ਛਣਕਾਰ

ਪੁਰਨੀਤ ਧਾਲੀਵਾਲ

ਛੱਲੇ

ਮਹਿੰਦੀ ਰੰਗੇ ਹੱਥ
ਹੋਰ ਗੂਹੜਾ ਹੋਇਆ
ਛੱਲੇ ਦਾ ਨਿਸ਼ਾਨ

ਅਮਰਾਓ ਸਿੰਘ ਗਿੱਲ

ਅੰਗੂਠੀ

ਕੈਂਡਲ ਲਾਇਟ ਡਿੰਨਰ
ਅੱਖ ਬਚਾ ਓਹਦੀ ਪਲੇਟ ਚ ਰੱਖੀ
ਹੀਰੇ ਦੀ ਅੰਗੂਠੀ

ਜਗਦੀਪ ਸਿੰਘ ਮੁੱਲਾਂਪੁਰ

ਬਿੰਦੀਆਂ

ਗੁਜਰੀ ਬਹਾਰ –
ਸ਼ੀਸ਼ੇ ਤੇ ਓਹਦੀਆਂ
ਰੰਗ ਬਰੰਗੀਆਂ ਬਿੰਦੀਆਂ

ਅਰਵਿੰਦਰ ਕੌਰ

ਪਿਪਲੀ

ਪੌਣ ਦਾ ਹੁਲਾਰਾ
ਉਹਦੇ ਕੰਨੀ ਝੂਲੀਆਂ
ਪਿਪਲੀ ਪੱਤੀਆਂ

ਅਰਵਿੰਦਰ ਕੌਰ

ਕੋਕਾ

ਸਿਖਰ ਦੁਪਿਹਰ –
ਚੁੰਨੀ ਸਵਾਰਦੀ ਦਾ ਚਮਕਿਆ
ਨੱਕ ਦਾ ਕੋਕਾ

ਵਰਿੰਦਰ ਬੇਨੀਪਾਲ

ਨਿਓਲ

ਗਰਮ ਰਾਤ 
ਬੋਤੀ ਖਣਕਾਵੇ ਨਿਓਲ 
ਗੋਰੀ ਝਾਂਝਰਾਂ

ਰਣਜੀਤ ਸਿੰਘ ਸਰਾਂ

ਵੰਗ

ਮੰਜਾ ਝਾੜਦਿਆਂ–
ਫਰਸ਼ ਤੇ ਛਣਕੀ 
ਟੁੱਟੀ ਵੰਗ

ਜਗਰਾਜ ਸਿੰਘ ਨਾਰਵੇ

ਛੱਲਾ

ਚਿਰਾਂ ਪਹਿਲਾਂ ਮਿਲਿਆ
ਛੱਲਾ ਘੁਮਾਕੇ ਦੇਖੇ
ਉਂਗਲੀ ਦਾ ਬਦਲਿਆ ਰੰਗ

ਗੁਰਮੁਖ ਧਿਮਾਣ

ਲੌਂਗ

ਗੁਆਚਿਆ ਲੌਂਗ
ਭਾਲਣ ਲਈ ਛਾਣੇ
ਕੱਕਾ ਰੇਤਾ

ਬਲਜਿੰਦਰ ਜੌੜਕੀਆਂ

ਕੋਕਾ

ਟਾਂਗਾ ਹੁਝਕਿਆ 
ਦੁਪੱਟਾ ਅੜਕ ਗਿਆ 
ਕੋਕੇ ਨਾਲ

ਰਘਬੀਰ ਦੇਵਗਨ

ਪੈੜ

ਪੈੜਾਂ ‘ਚ ਪੈੜ

ਪੈਰ ਹੇਠਾਂ ਆਈ ਉਸਦੀ

ਟੁੱਟੀ ਝਾਂਜਰ

ਜਗਦੀਪ ਸਿੰਘ ਮੁੱਲਾਂਪੁਰ

ਵੰਗਾਂ

ਛਣਕਾ ਕੇ ਵੰਗਾਂ

ਰੁੱਸੇ ਮਾਹੀ ਨੂੰ ਮਨਾਵੇ

ਨਵੀ ਵਿਆਹ

ਤੇਜੀ ਬੇਨੀਪਾਲ 

ਝੁਮਕੇ

 ਕੰਨਾਂ ਦੇ ਝੁਮਕੇ…

ਪ੍ਰਦੇਸੀਂ ਵਸਦਾ ਸੱਜਣ

ਕਰਾਉਂਦੇ ਯਾਦ

ਬਲਰਾਜ ਚਹਿਲ

 

ਕੰਗਣ

ਸਾਂਭਕੇ ਰੱਖ ਰਹੀ

ਸੱਸ ਦਾ ਦਿਤਾ ਕੰਗਣ

ਆਪਣੀ ਨੂੰਹ ਲਈ 

ਸੁਵੇਗ ਦਿਓਲ

ਕੰਗਣ

ਪਾਰਟੀ ‘ਚ ਦਿਖਾਵੇ

ਸੱਸ ਦਾ ਦਿੱਤਾ ਹੋਇਆ

ਖਾਨਦਾਨੀ ਕੰਗਣ

ਸੁਵੇਗ ਦਿਓਲ

ਝਾਂਜਰਾਂ

ਰੇਤ ਵਿਚ ਗੋਰੇ ਪੈਰ
ਚਾਂਦੀ ਦੀਆਂ ਝਾਂਜਰਾਂ
ਛਣਕਦੀ ਬੋਰਾਂ ਵਿਚ ਰੇਤ

ਸੁਰਮੀਤ ਮਾਵੀ

ਵੰਗਾਂ

ਰਾਤ ਹਨੇਰੀ
ਪੈਰ ਦਬਾ ਕੇ ਨਿਕਲੀ
ਛਣਕ ਪਈਆਂ ਵੰਗਾਂ

ਸੁਰਜੀਤ ਕੌਰ

ਬੂੰਦਾਂ

ਗਿੱਲੇ ਪੈਰ 

ਝਾਂਜਰ ਚੋਂ ਝੜੀਆਂ

ਬੂੰਦਾ ਕਲੀਨ ‘ਤੇ 

ਸਤਵਿੰਦਰ ਸਿੰਘ

ਛਣਕਾਰ

ਵਿਹੜੇ ‘ਚ ਬੈਠੀ

ਚੂੜੇ ਤੇ ਝਾਂਜਰ ਦੀ ਛਣਕਾਰ

ਮਿਲਾ ਕੇ ਦੇਖੇ

ਤੇਜੀ ਬੇਨੀਪਾਲ

ਗੁੱਡੀ

ਨਿੱਘੀ ਦੁਪਹਿਰ ਤੁਣਕੇ

ਚੂੜੇ ਵਾਲੀ ਹੱਥ ਚਰਖੜੀ

ਗੁੱਡੀ ਅਸਮਾਨ

ਸੁਖਵਿੰਦਰ ਵਾਲੀਆ

ਕੋਕਾ

ਨਕ ਦਾ ਕੋਕਾ 

ਦੇ ਰਿਹਾ ਸਤਰੰਗੀ ਲਿਸ਼ਕੋਰ 

ਸੂਰਜ ਦੀ ਕਿਰਨ ਨਾਲ 

ਮਨਦੀਪ ਮਾਨ

ਝੁਮਕੇ

ਨਵੇਂ ਨਵੇਂ ਝੁਮਕੇ 

ਕੰਨਾ ਪਿਛੇ ਟੰਗੇ 

ਘੁੰਗਰਾਲੀ ਲਿੱਟ

ਅਰਵਿੰਦਰ ਕੌਰ

ਕਾਂਟਾ

ਤੇਜ਼ੀ ਨਾਲ ਕੋਲੋਂ ਲੰਘੀ 

ਮੁੜ ਕੇ ਵੇਖਦੀ ਦਾ ਹਿੱਲਿਆ 

ਝਬੂਲੀ ਵਾਲਾ ਕਾਂਟਾ

ਹਰਵਿੰਦਰ ਧਾਲੀਵਾਲ