ਤਾਰ ਤੁਪਕਾ

ਤਾਰ ਤੁਪਕਾ –
ਚਿਰਾਂ ਬਾਅਦ ਬੈਠਿਆ
ਅਪਣੇ ਕੋਲ਼ ਆਪ

ਅਮਰਜੀਤ ਸਾਥੀ

ਚੰਨ

ਵੈਸਾਖ ਦਾ ਚੰਨ . . .
ਚਿਨਾਰ ਦੇ ਪੱਤਿਆਂ ‘ਚ ਗੁਆਚੇ
ਮੋਤੀਆਂ ਦੇ ਬੁੰਦੇ

ਅਰਵਿੰਦਰ ਕੌਰ

ਤਰੇਲ

ਤਰਿੱਪ-ਤਰਿੱਪ ਤਰੇਲ
ਗੁਲਾਬ ਦੇ ਰਾਖਿਆਂ ( ਕੰਡਿਆਂ ) ਦਾ 
ਧੁਪ ਰਿਹਾ ਮੁੱਖੜਾ

ਪ੍ਰੇਮ ਮੈਨਨ

ਪੈੜ

ਤ੍ਰੇਲੀ ਸਵੇਰ
ਦਾਦੇ ਦੀ ਪੈੜ,ਚ ਪੈੜ
ਪਿਛੇ ਭੱਜੇ ਪੋਤਾ

ਲਵਤਾਰ ਸਿੰਘ

ਨਿੰਮ

‘ਤਾਇਆ ਸਿਆਂ ,ਹਾਅ ਸਵੇਰੇ ਸਵੇਰੇ ਨਿੰਮ ਤੋਂ ਕੀ ਤੋੜੀ ਜਾਨੈਂ ‘ਘਰਾਂ ਚੋਂ ਲੱਗਦੇ ਮਾਮੇ ਨੇ ਮੇਰੇ ਨਾਨਾ ਜੀ ਨੂੰ ਬੁਲਾਉਣ ਦੇ ਇਰਾਦੇ ਨਾਲ ਪੁਛਿਆ ,ਉਂਝ ਉਸ ਨੂੰ ਪਤਾ ਹੀ ਸੀ ਕਿ ਨਾਨਾ ਜੀ ਕੀ ਤੋੜ ਰਹੇ ਹਨ ..’ਮੱਲਾ ਮੈਂ ਤਾਂ ਦਾਤਣ ਤੋੜਨ ਆਸਤੇ ਸੋਟੀਆਂ ਮਾਰਦਾ ਸੀ .ਤੁਸੀਂ ਤਾਂ ਹਾਅ ਝੱਗ ਜੀ ਫੇਰ ਲੈਨੇ ਓਂ ਦੰਦਾਂ ਤੇ..ਮੈਥੋਂ ਇਹ ਯਭਖਾਨਾ ਹੁੰਦਾ ਨੀ ..ਨਾਲੇ ਸ਼ੇਰਾ ਦਾਤਨ ਤਾਂ ਬਹੁਤ ਵਧੀਆ ਚੀਜ਼ ਹੈ .ਆਹ ਦੇਖਲਾ ਤੇਰੇ ਦੰਦਾਂ ਨਾਲੋਂ ਮੇਰੇ ਦੰਦ ਅੱਜ ਵੀ ਕੈਮ ਪਏ ਆ ..ਹੁਣ ਵੀ ਛੱਲੀਆਂ ਚੱਬ ਲਈਦੀਆਂ ਨੇ ..ਤੇ ਆਹ ਗੰਨਾ ਤਾਂ ਰੋਜ਼ ਆਗੂਂ ਚੂਪੀਦਾ……
::

ਤਰੇਲੀ ਸਵੇਰ-
ਖੂੰਡੀ ਫ਼ਸਾ ਹਲੂਣੀ ਬਾਬੇ ਨੇ
ਨਿੰਮ ਦੀ ਪੱਕੜ ਟਾਹਣੀ

ਗੁਰਮੁਖ ਭੰਦੋਹਲ ਰਾਈਏਵਾਲ

ਮੋਤੀ

ਪਹੁ ਫੁਟਾਲੇ ਡਿਗਿਆ
ਪੱਤੇ ਤੋ ਫੁੱਲ ‘ਚ 
ਇਕ ਮੋਤੀ ਤ੍ਰੇਲ ਦਾ

ਸਰਦਾਰ ਧਾਮੀ

ਪੈੜਾਂ

ਤ੍ਰੇਲੀ ਘਾਹ
ਸੱਜ਼ਰੀਆਂ ਪੈੜਾਂ
ਆਦਮੀ ਅੱਗੇ ਕੁੱਤਾ

ਹਰਕੀ ਵਿਰਕ

ਤੁਪਕਾ

ਹਰਵਿੰਦਰ ਤਤਲਾ

ਕੱਪੜੇ

ਤ੍ਰੇਲਾਂ ਰੁੱਖ
ਹਿਲਾਵੇ ਬੱਚਾ
ਭਿੱਜੇ ਕੱਪੜੇ

ਤੇਜੀ ਬੇਨੀਪਾਲ

ਖੰਭ

ਸਵੇਰ ਦੀ ਤ੍ਰੇਲ
ਗੁਲਾਬ-ਪੰਖੜੀ ‘ਤੇ
ਤਿੱਤਲੀ ਦਾ ਖੰਭ

ਅਮਰਾਓ ਸਿੰਘ ਗਿੱਲ

ਮੱਥਾ

ਰੁਮਕੀ ਪੌਣ-
ਤ੍ਰੇਲ ਭਿੱਜੇ ਪੱਤੇ ਨੂੰ ਛੂਹਿਆ 
ਮੇਰਾ ਤਪਦਾ ਮੱਥਾ

ਗੁਰਮੁਖ ਭੰਦੋਹਲ ਰਾਈਏਵਾਲ

ਦੋ ਹਾਇਕੂ

ਪੁਰਾਣੀ ਕਬਰ
ਸਲੀਬ ਦੇ ਮੁੱਢ ‘ਚ ਉਂਘੀ
ਜੰਗਲੀ ਬੂਟੀ
……………..
ਟਿਪਕ ਗਈ
ਗੁਲਾਬ ਦੇ ਪੱਤੀ ਤੋਂ
ਆਖ਼ਰੀ ਬੂੰਦ

ਗੁਰਵਿੰਦਰ ਸਿੰਘ ਸਿੱਧੂ

ਬੂੰਦ

ਤ੍ਰੇਲ ਦੀ ਬੂੰਦ
ਧਰਤੀ ਤੇ ਡਿੱਗ ਪਈ
ਸੁੱਕੇ ਪੱਤੇ ਨਾਲ

ਗੁਰਵਿੰਦਰ ਸਿੰਘ ਸਿੱਧੂ

ਬੂੰਦ

ਪੰਖੜੀ ਤੋਂ ਸਰਕੀ
ਤਰੇਲ ਦੀ ਬੂੰਦ
ਕੰਡੇ ‘ਤੇ ਲਟਕੀ

ਅਮਰਾਓ ਸਿੰਘ ਗਿੱਲ

ਮੋਤੀ

ਪਹੁ-ਫੁਟਾਲਾ–
ਪੱਤੇ ਦੀ ਨੋਕ ਤੇ ਟਿਕਿਆ
ਇੱਕ ਪਾਰਦਰਸ਼ੀ ਮੋਤੀ

ਰਜਿੰਦਰ ਘੁੰਮਣ 

ਚੱਠਾ

ਰੁੱਖੋਂ ਟਪਕਿਆ 

ਚੱਠੇ ਦੀ ਸਿਖਰਲੀ ਇੱਟ ‘ਤੇ 

ਤ੍ਰੇਲ ਤੁਪਕਾ

ਸਤਵਿੰਦਰ ਸਿੰਘ

ਤ੍ਰੇਲ

ਤ੍ਰੇਲ ਤੁਪਕੇ
ਘਾਹ ਦੀਆਂ ਤਿੜਾਂ ‘ਤੇ
ਪੱਬ ਚੱਕਵੇਂ ਚੱਕਵੇਂ

ਸੁਰਜੀਤ ਮਾਵੀ
                                   

ਤਰੇਲ

ਸੂਰਜ ਚੜ੍ਹਿਆ
ਚਮਕਦੀ ਤਰੇਲ ਤੇ
ਆਪਣੇ ਪੈਰ ਵੇਖੇ

ਰਾਜਿੰਦਰ ਸਿੰਘ ਘੁੱਮਣ

ਤਰੇਲ

ਪਹੁ ਫੁਟਾਲਾ…

ਤੁਪਕਾ ਤੁਪਕਾ ਸੂਰਜ

ਫੁਲਾਂ ‘ਤੇ ਤ੍ਰੇਲ 

ਰਿਦਮ ਕੌਰ

ਤਰੇਲ ਬੂੰਦਾਂ

ਗੀਤ ਅਰੋੜਾ

ਹਜ਼ਾਰਾਂ ਸੂਰਜ ਚਮਕਣ
ਘਾਹ ਤੇ ਵਿਛੀਆਂ
ਤਰੇਲ ਬੂੰਦਾਂ ਚੋਂ
hazaran soorj chamkan
ghah te vichhiyaan
trel boondan

ਉੱਗਦੀਆਂ ਬੂੰਦਾਂ

ਬੀਜੀ ਕਣਕ
ਉੱਗ ਆਈਆਂ ਬੇਸ਼ੁਮਾਰ
ਚਮਕਦੀਆਂ ਬੂੰਦਾਂ

ਰਣਜੀਤ ਸਿੰਘ ਸਰਾ

ਸੁੱਕੇ ਘਾਹ ‘ਤੇ ਕੋਰ੍ਹਾ

ਕੋਰ੍ਹਾ ਪਿਘਲ ਰਿਹਾ
ਚੜ੍ਹਦੇ ਸੂਰਜ ਦੀਆ ਕਿਰਨਾਂ
ਸੁੱਕੇ ਘਾਹ ‘ਤੇ

ਰਾਜਿੰਦਰ ਸਿੰਘ ਘੁੱਮਣ

ਪੁੰਗਰਦੀ ਕਣਕ

ਓੜਿਆਂ ‘ਚ ਦਿੱਸਣ

ਤਰੇਲੀਆਂ ਹਰੀਆਂ ਲੀਕਾਂ

ਪੁੰਗਰਦੀ ਕਣਕ

ਰਣਜੀਤ ਸਿੰਘ ਸਰਾ

*ਓੜਾ=ਸਿਆੜ