ਚਿੜੀ

ਅਚਨਚੇਤ ਹਨੇਰੀ —
ਡਿਗੇ ਬਿਰਖ ਤੇ ਗਾ ਰਹੀ 
ਕੱਲੀ ਕਾਰੀ ਚਿੜੀ 

sudden storm–
a lone bird chirps
on the fallen tree

ਅਰਵਿੰਦਰ ਕੌਰ

ਹਨੇਰੀ

ਚੱਲੇ ਤੇਜ ਹਨੇਰੀ –
ਖੇਤਾਂ ਵਿਚ ਲਹਿਰਾਉਂਦੀ ਫਸਲ 
ਹੋਈ ਪਲ ਵਿਚ ਢੇਰੀ

ਲਵਤਾਰ ਸਿੰਘ

ਘੁਰਾੜੇ

ਤੂਫਾਨੀ ਰਾਤ-

ਘੁਰਾੜਿਆਂ ਚ ਰਲਗੱਡ

ਵਾਛੜ ਦਾ ਸ਼ੋਰ

ਹਰਕੀ ਜਗਦੀਪ ਵਿਰਕ

ਕੀੜੀ

ਸਮੁੰਦਰੀ ਤੂਫਾਨ
ਹਾਲੇ ਵੀ ਤਰੀ ਜਾਵੇ
ਪੱਤੇ ਤੇ ਕੀੜੀ

ਸਰਦਾਰ ਧਾਮੀ

ਝੱਖੜ

ਝੱਖੜ ਦੀ ਚੇਤਾਵਨੀ
ਦਰਵਾਜ਼ਾ ਭੇੜਿਆ 
ਭੱਜ ਕੇ ਇੱਕ ਹੋਰ

ਕੰਵਲ ਸਿੱਧੂ

ਪੈੜ

ਤੇਜ਼ ਹਨ੍ਹੇਰੀ- 
ਮਿਟੀ ਡਾਚੀ ਦੀ ਪੈੜ
ਨਮ ਅਖਾਂ

ਰਾਣੀ ਬਰਾੜ

ਝੱਖੜ

ਝੱਖੜ–
ਬਾਲਟੀ ਭਰ ਚੱਕੇ ਉਸ
ਰਲਵੇਂ ਫੁੱਲ

ਗੁਰਵਿੰਦਰ ਸਿੰਘ ਸਿੱਧੂ

ਤਸਵੀਰ

ਝੁੱਲਦਾ ਝੱਖੜ –
ਡਬਡਬੌਂਦੀਆਂ ਅੱਖਾਂ ਅੱਗੇ
ਮਾਂ ਦੀ ਤਸਵੀਰ

ਅਮਨਪ੍ਰੀਤ ਪੰਨੂ

ਜਿੰਦਾ

ਹਨੇਰੀ
ਬੰਦ ਦਰ ਦਾ ਹਿੱਲੇ
ਜੰਗਾਲਿਆ ਜਿੰਦਾ

ਹਰਿੰਦਰ ਅਨਜਾਣ

ਹਨੇਰੀ

ਹਨੇਰੀ ਮਗਰੋਂ
ਜੜੋਂ ਪੁੱਟੇ ਤੂਤ ਨਾਲ ਲਟਕੇ
ਬਿਜ਼ੜੇ ਦਾ ਘਰ

ਪ੍ਰੇਮ ਮੈਨਨ

ਪੱਤੇ

ਦਲਜੀਤ ਗਿੱਲ

ਵਾ-ਵਰੋਲਾ

ਛੋਟੇ ਜੇਹੇ ਕੰਕਰ 
ਉਠਾਇਆ ਵਾ-ਵਰੋਲਾ ਪਾਣੀ ‘ਚ –
ਉਨਾਂ ਮਾਰੀ ਇਕ ਝਾਤ

ਵਿੱਕੀ ਸੰਧੂ

ਹਨ੍ਹੇਰੀ

ਲਾਲ ਹਨ੍ਹੇਰੀ
ਭੂਬਲ ਚ ਲੁਕੀ
ਉਹਦੀ ਪੈੜ

ਤੇਜੀ ਬੇਨੀਪਾਲ

ਝੱਖੜ

ਤੇਜ਼ ਚੱਲਦਾ ਝੱਖੜ
ਟੁਟਿਆ ਪੱਤਾ ਟਾਹਣੀ ਨਾਲੋਂ
ਜਾ ਡਿੱਗਾ ਚਿੱਕੜ ਚ

ਸਰਦਾਰ ਧਾਮੀ

ਵਾਵਰੋਲਾ

ਸਿਖਰ ਦੁਪਿਹਰਾ –
ਵਾਵਰੋਲਾ ਆਉਂਦਾ ਵੇਖ 
ਡੈਂਬਰਿਆ ਬਾਲ

ਪ੍ਰੀਤ ਰੰਧਾਵਾ

ਹਨੇਰ

ਹਿਲਣ ਬੇਲਗਾਮ 
ਫੁਲਾਂ ਲਦੀਆਂ ਟਾਹਣੀਆਂ 
ਮੀਂਹ ਤੋਂ ਪਹਿਲਾਂ ਹਨੇਰ
–

Shaking vigorously
flower laden branches
storm before the rain

ਮਨਦੀਪ ਮਾਨ 

ਖਤ

ਤੇਜ਼ ਹਨੇਰੀ
ਹੱਥਾਂ ਚੋਂ ਓੁਡਿਆ ਓੁਹਦਾ ਖਤ
ਬਨੇਰੇ ਤੋਂ ਕਾਂ

ਲਵਤਾਰ ਸਿੰਘ

ਛਾਂ

ਤਪਦੀ ਦੁਪਹਿਰ
ਵਾਵਰੋਲੇ ‘ਚ ਉੱਡਦੀ ਮਿੱਟੀ
ਕਰ ਗਈ ਛਾਂ

ਰਾਜਿੰਦਰ ਸਿੰਘ ਘੁੰਮਣ 

ਲਾਲਟੈਣ

ਤੇਜ਼ ਹਵਾ- 
ਲਾਲਟੈਣ ਦੀ ਬੱਤੀ ਫਰਕੇ 
ਹਿੱਲਣ ਪਰਛਾਂਵੇ

ਰਘਬੀਰ ਦੇਵਗਨ

ਪੰਖੜੀਆਂ

ਗੁੰਦਵੇਂ ਗੁਲਾਬ-
ਕੁਝ ਖਿਲਰੀਆਂ ਪੰਖੜੀਆਂ
ਝੱਖੜ ਬਆਦ

ਸਰਬਜੀਤ ਸਿੰਘ ਖਹਿਰਾ

ਝੱਖੜ

ਝੱਖੜ ਮਗਰੋਂ
ਸਫੈਦੇ ਦੀ ਟੀਸੀ ਤੇ ਟਿਕਿਆ
ਅੱਧਾ ਚੰਨ

ਜਗਦੀਪ ਸਿੰਘ ਮੁੱਲਾਂਪੁਰ

ਵਾਵਰੋਲਾ

ਵਾਵਰੋਲਾ
ਮੈਂ ਚੁੱਕ ਲਿਆਈ ਅੰਦਰ
ਨਿੱਕਾ ਜਿਹਾ ਗੁਲਦਾਨ

باد ناگهانی
تنها میتوانم گلدان کوچکی را
به اتاقم بیاورم

ਸਮਾਨੇਹ ਹੋਸ਼ਨੀ ਜ਼ਫਰਾਨੀ
ਅਨੁਵਾਦ- ਨਿਰਮਲ ਬਰਾੜ

ਹਨੇਰੀ

ਹਨੇਰੀ ਪਿਛੋਂ
ਜੜ੍ਹਾਂ ਲਾਗੇ ਪਈ 
ਮੁਰਝਾਈ ਕਲੀ

ਹਰਿੰਦਰ ਅੰਜਾਨ 

ਝੜਦੀਆਂ ਪੱਤੀਆਂ

ਝੁਲ ਰਿਹਾ ਝੱਖੜ
ਝੜ ਰਿਹੈ ਗੁਲਾਬ
ਪੱਤੀ ਪੱਤੀ

ਸੁਰਜੀਤ ਕੌਰ

ਸਰਦ ਝਖੇੜਾ

ਸਰਦ ਝਖੇੜਾ
ਸੁੱਕੇ,ਪੀਲੇ ਤੇ ਕੁਝ ਹਰੇ ਪੱਤੇ
ਭਰਿਆ ਵਿਹੜਾ

ਰਣਜੀਤ ਸਿੰਘ ਸਰਾ

ਮਲਾਹ

ਉੱਚੀਆਂ ਲਹਿਰਾਂ

ਉੱਛਲੇ ਬੇੜੀ

ਮਲਾਹ ਸ਼ਾਂਤ 

ਮਨਦੀਪ ਮਾਨ

ਡੱਕੇ

ਹਨੇਰੀ ਰੁਕੀ 

ਡੱਕੇ ਚੁਗਣ ਚਲੀਆਂ

ਨਹਰ ਕੰਢੇ ਮਾਈਆਂ

ਰਾਹੁਲ ਕਟਾਹਰੀ