Author Archives: nirmalbrar

ਮੁਸਕਾਨ

09 ਵੀਰਵਾਰ ਮਈ 2013

Posted by in ਪਤੀ /ਪਤਨੀ, ਬਸਤਰ, ਹਰਵਿੰਦਰ ਧਾਲੀਵਾਲ, ਹਾਇਬਨ/Haibun

≈ ਟਿੱਪਣੀ ਕਰੋ

ਉਂਝ ਮੇਰੀ ਮੰਡੀ(ਖਰੀਦ ਕੇਂਦਰ ) ਦੀ ਲੋਕੇਸ਼ਨ ਬਹੁਤ ਸ਼ਾਨਦਾਰ ਹੈ l ਇਤਿਹਾਸਿਕ ਗੁਰਦੁਆਰਾ ਸਾਹਿਬ ਦੇ ਬਿਲਕੁਲ ਨਾਲ ਲੱਗਵੀਂ ..ਤਿੰਨ ਗੁਰੂ ਸਾਹਿਬਾਨਾਂ ਦੀ ਚਰਨ ਛੋਹ ਪ੍ਰਾਪਤ ਧਰਤੀ ..ਸੰਗਤਾਂ ਦਾ ਆਉਣ ਜਾਣ…ਹੋਅ ਪਰ੍ਹੇ ਇੱਕ ਸਾਈਡ ਤੇ ਗੁਲ੍ਮੋਹਰਾਂ ਦੀ ਪਾਲ ਹੈ ..ਮੰਡੀ ਵਿੱਚ ਪੱਖਿਆਂ ਦਾ ਸ਼ੋਰ ,ਧੂੜ ਮਿੱਟੀ ਤੇ ਇੰਨਾਂ ਵਿੱਚ ਰਲੀਆਂ ਮਜਦੂਰ ਆਦਮੀ ਔਰਤਾਂ ਦੀਆਂ ਅਵਾਜਾਂ ….ਮੈਂ ਅਕਸਰ ਇਸ ਸਭ ਕਾਸੇ ਤੋਂ ਬਚਣ ਲਈ ਗੁਲਮੋਹਰ ਥੱਲੇ ਆ ਕੇ ਬੈਠਦਾ ਹਾਂ ..ਪੁਰਾਣੇ ਮੋਟਰਸਾਈਕਲ ਤੇ ਇੱਕ ਜਵਾਨ ਜੋੜਾ ਆਉਂਦਾ ਹੈ …ਮੁੰਡਾ ,ਘਰਵਾਲੀ ਨੂੰ ਗੁਲਮੋਹਰ ਦੀ ਛਾਵੇ ਖੜਾ ਕੇ ਮੰਡੀ ਵੱਲ ਨੂੰ ਹੋ ਤੁਰਿਆ ..ਸ਼ਾਇਦ ਕੰਮ ਕਰਦੇ ਕਿਸੇ ਮਜਦੂਰ ਪਰਿਵਾਰ ਚੋਂ ਹਨ ..ਚੁੰਨੀ ਦੇ ਪੱਲੇ ਚੋਂ ਸਾਂਵਲੇ ਤਿੱਖੇ ਨਕਸ਼ਾਂ ਦੀ ਝਲਕ ਪਹਿਲਾਂ ਹੀ ਮਿਲ ਗਈ ਸੀ ..ਮੁੰਡੇ ਨੇ ਦੂਰੋਂ ਕੁੱਝ ਇਸ਼ਾਰਾ ਕੀਤਾ ਹੈ …ਨੈਣਾਂ ਨੇ ਨੈਣਾਂ ਦੀ ਗੱਲ ਸਮਝੀ ਹੈ l

ਨੀਲਾ ਗੁਲਮੋਹਰ –
ਅੱਧੇ ਕੱਢੇ ਘੁੰਡ ਚੋਂ ਛਣੀ
ਗੁਲਾਬੀ ਮੁਸਕਾਨ

ਹਰਵਿੰਦਰ ਧਾਲੀਵਾਲ

ਗਿਲਹਰੀ گِلہری

03 ਮੰਗਲਵਾਰ ਅਪ੍ਰੈ. 2012

Posted by in ਅੰਬਰੀਸ਼, ਕੁਦਰਤ/Nature, ਜੀਵ-ਜੰਤ, ਸ਼ਾਹਮੁਖੀ شاہ مُکھی

≈ ਟਿੱਪਣੀ ਕਰੋ

ਰੁੱਖ ਸੁੱਤੀ ਗਿਲਹਰੀ
ਮੀਂਹਧੁੱਪੀ ਰਾਤ ਚਾਨਣੀ
ਪਿੰਡੋਂ ਦਿਸੇ ਹਿਮਾਲਾ

رُکھ سُتی گِلہری
مینہہ۔دُھپی رات چاننی
پِنڈوں دِسے ہِمالہ

ਅੰਬਰੀਸ਼ امبریش 

ਦੀਪੀ ਸੈਰ ਦੇ 20 ਹਾਇਕੂ

03 ਸ਼ੁੱਕਰਵਾਰ ਫਰ. 2012

Posted by in ਜੀਵਨ/Life, ਦੀਪੀ ਸੈਰ

≈ 3 ਟਿੱਪਣੀਆਂ

੧
ਸੀਰੀ ਦਾ ਪੁੱਤ
ਕਹੇ ਭੁੰਜੇ ਬੈਹ 
ਰੋਟੀ ਨ੍ਹੀ ਖਾਣੀ
੨ 
ਬਦਲਵਾਈ
ਨਿੰਮੀ ਨਿੰਮੀ ਪੌਣ
ਮੋਰ ਪਾਉਣ ਪੈਲਾਂ
੩
ਪਟਿਆਲਾ ਸਲਵਾਰ
ਸਾਇਕਲ ਦੀ ਚੇਨ
ਫੱਸਿਆ ਪੌਂਚਾ
੪
ਰੇਸ਼ਮੀ ਨਾਲੇ
ਦੁਕਾਨ ਚ ਟੰਗੇ
ਕੱਸੇ ਜ਼ੀਨ ਦੀ ਬੈਲਟ
੫
ਬਿਜਲੀ ਚਮਕੇ
ਵੱਖਰੇ ਬੈਠੇ
ਮਾਮਾ ਭਾਣਜਾ
੬
ਬੱਦਲਾਂ ਦੇ ਉਤੇ ਧੁੱਪ
ਜ਼ਹਾਜ਼ ਉਤਰ ਰਿਹਾ
ਬੱਦਲਾਂ ਦੇ ਥੱਲੇ ਮੀਂਹ
੭
ਬ੍ਰਿਧ ਆਸ਼ਰਮ
ਦੇਖ ਰਿਹਾ ਪਿੱਠ
ਜਾਂਦੇ ਪੁੱਤਰ ਦੀ
੮
ਵੋਟ ਪਾ
ਪਰਚੀ ਲੈ
ਸਿੱਧਾ ਠੇਕੇ
੯
ਘੁੱਪ ਹਨ੍ਹੇਰਾ
ਆਸ਼ਕ ਤੇ ਚੋਰ ਭਿੜ੍ਹੇ
ਗਲੀ ਦਾ ਮੋੜ
੧੦
ਕਨੇਡਾ
ਖੇਤਾਂ ਚ ਲਾਵੇ ਦਿਹਾੜੀ
ਯਾਦ ਔਣ ਭਈਏ
੧੧
ਭਤੀਜੇ ਦਾ ਮੰਗਣਾ
ਦਾੜ੍ਹੀ ਨੂੰ ਰੰਗੇ
ਛੜਾ ਤਾਇਆ
੧੨
ਛਪਾਰ ਦਾ ਮੇਲਾ
ਮੰਗੇ ਚਾਬੀ ਵਾਲਾ ਖਿਡੌਣਾ
ਘਨ੍ਹੇੜੀ ਚੜ੍ਹਿਆ ਜੁਆਕ
੧੩
ਪੁੰਗਰਦੀ ਕਣਕ
ਕੂੰਬਲਾਂ ਚੱਬਣ
ਹਨ੍ਹੇਰੇ ਚ ਸਹੇ
੧੪
ਸ਼ਗਨਾਂ ਦੀ ਰਾਤ
ਦਰਵਾਜ਼ਾ ਖੜਕਿਆ
ਦੁਲਹਨ ਸਿਮਟਕੇ ਲੱਗੀ ਖੂੰਜੇ
੧੫
ਨਵਾਂ ਟਰੈਕਟਰ
ਗਿਅਰ ਬਦਲਦਿਆਂ
ਬੋਲੇ ਤੱਤਾ ਤੱਤਾ
੧੬
ਪਾਪੂਲਰ ਦੇ ਬੂਟੇ
ਵਲੈਤੀ ਪ੍ਰਾਹੁਣਾ
ਮੰਗੇ ਕਿੱਕਰ ਦੀ ਦਾਤਣ
੧੭
ਗਰਭਪਾਤ
ਸੁੱਖਣਾਂ ਸੁੱਖ ਰਹੀ
ਛੁੱਟੇ ਕੁੜੀ ਤੋਂ ਖਹਿੜ੍ਹਾ
੧੮
ਦੇਸੀ ਪੀ
ਅੰਗਰੇਜ਼ੀ ਬੋਲਣ
ਮੋਟਰ ਤੇ ਬੈਠੇ ਜੱਟ
੧੯
ਘਾਹ ਤੇ ਕੋਹਰਾ
ਛਪੀਆਂ ਪੈੜਾਂ
ਆਦਮੀ ਤੇ ਕੁੱਤਾ
੨੦
ਜਹਾਜ਼ ਦੀ ਗੜਗੜ੍ਹਾਟ
ਪੱਤਿਆਂ ਤੋਂ ਡਿੱਗ ਰਹੀ
ਜੰਮੀ ਬਰਫ