ਸੈਮ ਬਾਜਵਾ ਦੇ 8 ਹਾਇਕੂ

ਗਹਿਰੀ ਰਾਤ

ਚਮਕਦੇ ਤਾਰੇ ਨਾਲ਼ੇ ਜੁਗਨੂੰ

ਅੱਖੀਂ ਹੰਝੂ

****

ਗਹਿਰੀ ਰਾਤ

ਹੋਰ ਕੁਝ ਵੀ ਨਈਂ

ਤੇਰੀ ਤਸਵੀਰ

****

ਗਹਿਰੀ ਰਾਤ

ਹਵਾ ਦਾ ਬੁੱਲਾ

ਤੇਰੀ ਚਾਪ

****

ਗਹਿਰੀ ਰਾਤ

ਮਨ ਦੇ ਅੰਦਰ ਹੰਝੂ

ਅੱਖੀਂ ਸੁੱਨ

****

ਗਹਿਰੀ ਰਾਤ

ਤੇਰਾ ਮੇਰਾ ਰਿਸ਼ਤਾ

ਇਕ ਸੁਪਨਾ

****

ਗਹਿਰੀ ਰਾਤ

ਸੋਚਾਂ ਦਾ ਤਾਣਾ ਬਾਣਾ

ਉਲਝੀ ਡੋਰ

****

ਗਹਿਰੀ ਰਾਤ

ਰੋਸ਼ਨੀ ਦੀ ਇਕ ਲਕੀਰ

ਤੇਰੀ ਉਡੀਕ

****

ਗਹਿਰੀ ਰਾਤ

ਕਿੰਨੀ ਵੱਡੀ ਚੁੱਪ 

ਮੇਰੇ ਅੰਦਰ

ਸੈਮ ਬਾਜਵਾ

ਫੁੱਫੜ

ਰੁਸਿਆ ਫੁੱਫੜ
ਫਸਿਆ ਖੁੱਡੇ ਚ
ਫੜਦਾ ਕੁੱਕੜ

ਬਲਵਿੰਦਰ ਸਿੰਘ

ਚੁੱਪ

ਧਾਰਮਿਕ ਸਥਾਨ ਦੀ ਕੰਧ 
ਬੀਬੀਆਂ ਵਾਲੇ ਪਾਸੇ ਲਿਖਿਆ 
ਚੁੱਪ ਦਾ ਦਾਨ ਬਖਸ਼ੋ ਜੀ

ਸੁਰਿੰਦਰ ਸਪੇਰਾ

ਤੰਦੂਰ

ਭਬਕੇ ਚੇਹਰਾ –
ਥੇਪੇ ਤੰਦੂਰ ‘ਚ ਰੋਟੀ 
ਭੜਥਾ ਬਣਾ

ਵਿੱਕੀ ਸੰਧੂ

ਮੀਂਹ

ਭਾਦੌ ਦਾ ਮੀਂਹ
ਛੱਡ ਗਿਆ ਵੱਟ ਨਾਲ ਵੱਟ
ਸਿਖਰ ਦੁਪਹਿਰ

ਤੇਜੀ ਬੇਨੀਪਾਲ

ਚਾਦਰ

ਭੋਜਨ ਸੂਚੀ-
ਬੇਬੇ ਦੀ ਚਾਦਰ ‘ਤੇ ਲਗੇ
ਵਿਆਹ ‘ਚ ਦਾਗ

ਗੁਰਮੀਤ ਸੰਧੂ

ਚਿੱਠੀ

ਸ਼ਕਰਪਾਰਾ-
ਘੁਲ ਗਿਆ ਸਵਾਦ
ਚਿੱਠੀ ਪੜ੍ਹਦਿਆਂ

ਕੁਲਜੀਤ ਮਾਨ

ਪ੍ਰਸੰਗ

ਢਾਡੀ ਪ੍ਰਸੰਗ 
ਬਾਪੂ ਦੇ ਫਰਕੇ ਡੋਲੇ ਸੁਣ 
ਸਿਖ ਰਾਜ ਦਾ ਅੰਤ

ਸਤਵਿੰਦਰ ਗਿੱਲ

ਫੁੱਲ

ਜ਼ੁਲਫ਼ ਦਾ ਛੱਲਾ-
ਲਹਿਰਾ ਰਿਹਾ
ਬਗੀਚੇ ਵਿਚ ਤਰੇਲਿਆ ਫੁੱਲ

ਕੁਲਜੀਤ ਮਾਨ

ਧੁੱਪ

ਲਵੇ ਦੀ ਧੁੱਪ- 
ਬੇਬੇ ਪੀਹਣ ਸੁੱਕਣਾ ਪਾਇਆ 
ਜੋੜਾ ਘੁੱਗੀਆ ਦਾ ਆਇਆ

ਰਘਬੀਰ ਦੇਵਗਨ

ਕਣੀਆਂ

ਬੱਦਲ ਗਰਜਣ
ਗੋਰੇ ਮੁੱਖ ਤੇ ਡਿਗਣ
ਮੀਂਹ ਦੀਆਂ ਕਣੀਆਂ

ਹਰਿੰਦਰ ਅਨਜਾਣ

ਸ਼ੀਸ਼ਾ

ਟੁੱਟਾ ਸ਼ੀਸ਼ਾ
ਕਿਨੇ ਦਿਸੇ ਬੇਰੰਗੇ ਚਿਹਰੇ
ਮੇਰੇ ਵਰਗੇ

ਲਵਤਾਰ ਸਿੰਘ

ਸ਼ਗਲੇ

ਮਾਂ ਦੀ ਗੋਦੀ ਚ’
ਖੇਡੇ ਬੱਚਾ
ਛਣਕਣ ਸ਼ਗਲੇ

ਕਮਲਜੀਤ ਮਾਂਗਟ

ਬੂੰਦਾਂ

ਠੰਢੀ ਹਵਾ ~
ਖੁਸ਼ਕ ਵਾਲਾਂ ਚ’ ਅੱਟਕੀਆਂ
ਬਾਰਿਸ਼ ਦੀਆਂ ਬੂੰਦਾਂ

ਜਸਪ੍ਰੀਤ ਕੌਰ ਪਰਹਾਰ

ਚੰਨ

ਬੂੰਦਾ ਬਾਂਦੀ
ਕਾਲੇ ਬਦਲਾ ਚੋ ਓਭਰਇਆ
ਈਦ ਦਾ ਚੰਨ

ਹਰਿੰਦਰ ਅਨਜਾਣ

ਮੁਲਾਕਾਤ

ਅੱਖੀਂ ਪਰਛਾਵਾਂ
ਹੰਝੂਆਂ ਕੀਤਾ ਮੱਧ੍ਹਮ 
ਆਖਰੀ ਮੁਲਾਕਾਤ

ਪਰਮਿੰਦਰ ਜੱਸਲ

ਚੰਨ

ਵੇਹੜੇ ਚੋਂ ਦੀਦ 
ਮੁਬਾਰਿਕ ਹੋ ਗਈ ਈਦ ਸਈਓ
ਦੋ ਚੰਨ ਇਕਠੇ

ਸਤਵਿੰਦਰ ਗਿੱਲ

ਇਕੱਲਾ

ਈਦ ਦਾ ਦਿਨ
ਆਲੇ ਦੁਆਲੇ ਕੋਈ ਨਹੀ
ਇਕੱਲਾ ਘਰ

ਮਜ਼ਹਰ ਖਾਨ

ਸਕੂਲ

ਭਾਂਡੇ ਮਾਂਜਦੀ ਕੁੜੀ
ਨੀਜ ਲਾ ਕੇ ਵੇਖੇ
ਸਕੂਲ ਬਸ

ਗੁਰਬਾਜ ਛੀਨਾ

ਯਾਤਰਾ

ਦੋਸਤੋਂ ਯਾਤਰਾ ਤੇ ਹਾ ਸ਼੍ਰੀ ਹੇਮਕੁੰਟ ਸਾਹਿਬ ਦੇ ਦਰਸ਼ਨ ਕਰਨ ਦਾ ਮੌਕਾ ਮਿਲਿਆ ਵਾਹ ਕਿਆ ਔਲਕਿਕ ਨਜ਼ਰਾਂ ਸੀ ਉੱਚੇ ਪਹਾੜ ਨੀਵੇਂ ਬਦੱਲ ਟੇਡਾ ਮੇਡਾ ਰਸਤਾ ਵਲ ਖਾਦੀ ਨਦੀ ਉੱਚੇ ਝਰਨੇ ਠੰਡੇ ਪਾਣੀ ਦੀ ਝੀਲ/ਸਰੋਵਰ 16000 ਫੁੱਟ ਦੀ ਉਚਾਈ ਤੇ ਸਾਰੇ ਕੱਪੜੇ ਉਤਰ ਕੇ ਇਸ਼ਨਾਨ ਕਰਨਾ ਕਿਆ ਬਾਤ ਸੀ। ਬਰਫ਼ ਵਾਗ ਠਰ ਜਾਣਾ ਫਿਰ ਗੁਰਦੁਆਰਾ ਸਾਹਿਬ ‘ਚ ਮੇਥਾ ਟੇਕਣਾ ਬਾਣੀ ਸੁਣਾ ਅਰਦਾਸ ਕਰਨਾ ਇਸ ਸਭ ਤੋਂ ਬਆਦ ਬਾਬਾ ਜੀ ਗਰਮ ਗਰਮ ਦੇਗ਼ ਵੰਡਣਾ ਤੇ ਠੰਡੇ ਠੰਡੇ ਹੱਥਾਂ ਤੇ ਦੇਗ਼ ਦਾ ਆਉਣਾ ਕਿਆ ਬਾਤ ਸੀ।

ਸ਼੍ਰੀ ਹੇਮਕੁੰਟ ਸਾਹਿਬ ਜੀ–
ਠੰਡੇ ਠੰਡੇ ਹੱਥਾਂ ਤੇ ਰੱਖੀ ਬਾਬਾ ਜੀ 
ਗਰਮ ਗਰਮ ਦੇਗ਼

ਗੁਰਬਾਣੀ ਦਾ ਪਾਠ
ਕੰਨਾਂ ‘ਚ ਰਸ ਘੋਲਦੀ
ਝਰਨੇ ਦੀ ਆਵਾਜ਼

ਲਛਮਣ ਮੰਦਿਰ
ਗੁਰਦੁਆਰੇ ‘ਚ ਪ੍ਰਸ਼ਾਦ ਲੈ
ਖੜਕਾਏ ਟੱਲ

ਸ਼੍ਰੀ ਹੇਮਕੁੰਟ ਦੀ ਚੋਟੀ ਤੇ ਗੁਰਦੁਆਰੇ ਸਾਹਿਬ ਦੇ ਨਾਲ ਹੀ ਲਛਮਣ ਮੰਦਿਰ ਵੀ ਹੈ ਸ਼ਾਤ ਮਾਹੌਲ ‘ਚ ਜੋਂਦ ਟੱਲ ਨੂੰ ਕੋਈ ਖੜਕਾਉਦਾ ਹੈ ਤਾਂ ਚਾਰੇ ਪਾਸੇ ਗੂੰਜ ਪੈਦਾ ਹੋ ਜਾਦੀ ਹੈ…
ਬਾਕੀ ਦਾ ਹਾਲ ਅਗਲੇ ਹਫ਼ਤੇ

ਗੁਰਵਿੰਦਰ ਸਿੰਘ ਸਿੱਧੂ

ਜਾਲਾ

ਮੱਕੜੀ ਦਾ ਜਾਲਾ
ਪੁਰੇ ਦੀ ਵਾ ਨਾਲ ਹਿੱਲੇ
ਫੁੱਲ ਦੀ ਖ਼ੁਸਬੂ

ਤੇਜੀ ਬੇਨੀਪਾਲ

ਖ਼ੁਸ਼ਬੂ

ਕਿਣਮਿਣ ਕਣੀਆਂ –
ਘਰ ਦੇ ਵਿਹੜੇ ‘ਚ ਫੈਲੀ 
ਗੁਲਗੁਲਿਆਂ ਦੀ ਖ਼ੁਸ਼ਬੂ

ਸੰਜੇ ਸਨਨ

ਪੈੜ

ਜਾਣ ਪਿੱਛੋਂ
ਗਹੁ ਨਾਲ ਤੱਕ ਰਿਹਾ-
ਉਸ ਦੀ ਪੈੜ

ਸਹਿਜਪ੍ਰੀਤ ਮਾਂਗਟ

ਚੰਨ

ਗੋਰੇ ਮੁੱਖ ਤੋਂ ਉਸ
ਹਟਾਇਆ ਕਾਲਾ ਬੁਰਕਾ
ਈਦ ਦਾ ਚੰਨ

ਹਰਵਿੰਦਰ ਧਾਲੀਵਾਲ

ਸੂਰਜਮੁਖੀ

ਗਾਗਰ `ਚ ਸਾਗਰ
ਸਾਗਰ ਦਾ ਮੂੰਹ ਚੜ੍ਹਦੇ ਵੱਲ
ਉਡੀਕੇ ਸੂਰਜਮੁਖੀ

ਕੁਲਜੀਤ ਮਾਨ

dragonfly

ਅਵੀ ਜਸਵਾਲ

ਜੁਗਨੂੰ

ਅੱਧੀ ਰਾਤ 
ਚਮਕੇ ਜੁਗਨੂੰ
ਤ੍ਰੇੜਾ ਵਿਚੋ ਰੋਸ਼ਨੀ

ਪ੍ਰੇਮ ਮੈਨਨ

ਮਡੀਰ

ਤਾਕੀ ਖੁੱਲੀ
ਭਾਦੋਂ ਦੀ ਸ਼ਾਤ ਰਾਤ-
ਹੱਥਾਂ ‘ਚ ਬੱਤੇ
ਚੀਕਾਂ ਮਾਰੇ ਮਡੀਰ
ਕਰੀਕ ਕਿਨਾਰੇ

ਸੁਵੇਗ ਦਿਓਲ

ਅੱਕ

ਰੋਹੀ ਦਾ ਅੱਕ-
ਸੁੱਕੇ ਦੁੱਧ ਗਿੱਟੇ ਗਜਰਾ
ਬੱਚਾ ਵਿਲਕੇ ਦੁੱਧ ਨੂੰ

ਧੀਦੋ ਗਿੱਲ

ਈਦ

ਈਦ ਦਿਹਾੜਾ
ਸਰਸਰਾਉਂਦੇ ਛੁਹ ਰਹੇ
ਪਿੱਪਲ ਦੇ ਪੱਤੇ

ਜਗਦੀਸ਼ ਕੌਰ

ਖੰਬ

ਹਵਾ ਦਾ ਬੁੱਲ੍ਹਾਂ
ਉੱਡਦੇ ਕਬੂਤਰ ਵੱਲ ਜਾਵੇ
ਡਿੱਗਿਆ ਖੰਬ

ਪ੍ਰੇਮ ਮੈਨਨ

ਗਿੱਧਾ

ਗਿੱਧਾ ਪਾਵਣ ਨਾਰਾਂ
ਹੱਸੇ ਮੁਸਕਰੀ
ਬੱਗੀਆਂ ਮੁਛਾਂ ਚੋਂ ਬਾਬਾ

ਸਰਦਾਰ ਧਾਮੀ

ਖੁੱਡ

ਗਾਰੇ ਦੀ ਚਨਾਈ
ਆਪਣਾ ਘਰ ਢੋਹੁਦਿਆ
ਕੀੜੀ ਦੀ ਖੁੱਡ ਢਾਈ

ਰਾਜਿੰਦਰ ਸਿੰਘ ਘੁੱਮਣ

ਮਹਿਕ

ਹਰੇ ਖੇਤ 
ਏ ਸੀ ਬੱਸ ‘ਚ ਘੁਸ ਗਈ 
ਬਾਸਮਤੀ ਦੀ ਮਹਿਕ 

the green fields
intrusion of rice aroma
into an AC bus

ਰਣਜੀਤ ਸਿੰਘ ਸਰਾ

ਡਾਕਿਆ

ਢਲਦਾ ਦਿਨ –
ਉਤਰ ਰਹੀ ਚੁਬਾਰੇ ਤੋਂ 
ਉਡੀਕਦੀ ਡਾਕਿਆ

dhalda din
utar rahi chubare to
udikdi dakia

ਮਨਦੀਪ ਮਾਨ

ਅਲਵਿਦਾ

ਭਰੇ ਨੈਣ
ਖਾਲੀ ਹੱਥ ਹਿਲੌਂਦੀ
ਆਖੇ ਅਲਵਿਦਾ

ਹਰਿੰਦਰ ਅਨਜਾਣ

ਭਾਨ

ਬੁੱਢਾ ਬਾਂਦਰ
ਪੁਠੀਆਂ ਟਪੂਸੀਆਂ ਲਾਉਂਦੇ ਤੋਂ
ਲੋਕੀ ਉਛਾਲਣ ਭਾਨ

ਗੁਰਮੁਖ ਭੰਦੋਹਲ ਰਾਈਏਵਾਲ

ਤਸਵੀਰਾਂ

ਘਰ ਵਾਪਸੀ
ਝਾੜ ਪੂੰਝ ਸਜਾਉਂਦੀ
ਧੂੜ ਭਰੀਆਂ ਤਸਵੀਰਾਂ

ਅਨੂਪ ਬਾਬਰਾ

ਤੀਲਾ

ਰੁਮਕਦੀ ਠੰਡੀ ਹਵਾ-
ਵਗਦੀ ਨਦੀ
ਤੈਰਦਾ ਇੱਕ ਤੀਲਾ

cool breeze-
river streams
along rides a straw

ਧੀਦੋ ਗਿੱਲ

ਖੋਤਾ

ਵਿਆਹ ਵਾਲੇ ਘਰ ‘ਚ ਮਹਿਫਲ ਸਜੀ ਹੋਈ ਸੀ, ਔਰਤਾਂ ਘਰ ਅੰਦਰ ਵਿਆਹ ਦੇ ਗੀਤ ਗਾ ਰਹੀਆਂ ਸਨ ਅਤੇ ਆਦਮੀ ਬਾਹਰ ਗੈਰਜ ਵਿਚ ਹਾੜਾ-ਮੁਰਗਾ ਚਲਾ ਰਹੇ ਸਨ | ਮੇਰੀਆਂ ਕੁਝ ਗੱਡੀ ਚਲਾਉਣ ਦੀਆਂ ਜਿੰਮੇਦਾਰੀਆਂ ਕਾਰਨ ਹੱਥ ‘ਚ ਗਰਮਾ-ਗਰਮ ਚਾਹ ਦਾ ਕੱਪ ਸੀ | ਇੱਕ ਭਾਈ ਨੇ ਇੱਕ ਲਤੀਫ਼ਾ ਸੁਣਾਇਆ … ਸੀ ਤਾਂ ਉਹ ਘਸਿਆ-ਪਿਟਿਆ… ਪਰ ਇੱਕ ਹੋਰ ਭਾਈ ਦਾ ਆਪ-ਮੁਹਾਰਾ ਹਾਸਾ ਗਧੇ ਦੇ ਹਿਣਕਣ ਵਰਗੀ ਅਵਾਜ਼ ਵਾਂਗ ਨਿਕਲਿਆ … ਉਸ ਹਾਸੇ ਨੇ ਸਾਰਿਆਂ ਦੀਆਂ ਅੱਖਾਂ ਛਲਕਾ ਦਿੱਤੀਆਂ …

ਹਿਣਕਿਆ ਖੋਤਾ–
ਨੱਕ ਥਾਣੀਂ ਨਿਕਲਿਆ 
ਚਾਹ ਦਾ ਘੁੱਟ

ਜਗਰਾਜ ਸਿੰਘ ਨਾਰਵੇ

ਸਾਹ

ਸੰਸਕਾਰ ਉਪਰੰਤ
ਬੇਠੇ ਇਕਾਗਰ ਚਿਤ 
ਗਿਣਨ ਆਪਣੇ ਆਪਣੇ ਸਾਹ

ਸਰਦਾਰ ਧਾਮੀ

ਡਮਰੂ

ਮਦਾਰੀ ਹਥ
ਵਜ ਰਿਹਾ ਡਮਰੂ
ਬੰਦਰ ਲਾਈ ਫੇਰੀ

ਸਰਬਜੀਤ ਸਿੰਘ ਖਹਿਰਾ

ਖੁਸ਼ਬੋ

ਈਦ ਦਾ ਚੰਨ
ਵਾ ਨਾਲ ਆਈ
ਸੇਮਣੀਆਂ (ਸੇਵੀਆਂ) ਦੀ ਖੁਸ਼ਬੋ

ਅਵੀ ਜਸਵਾਲ

ਮਾਂ

ਮਾਂ ਹਾਰਟ ਦੇ ਮਰੀਜ ਹੋਣ ਕਾਰਣ ਬੀਮਾਰ ਰਹਿੰਦੇ ਹੈ ਅਕਸਰ ਖਾਂਸੀ ਵੀ ਰਹਿੰਦੀ ਹੈ…ਘਰ ਦੇ ਵਿਹੜੇ ਚ ਦੋ ਰੁੱਖ ਸੀ ਜਿਆਦਾ ਤਾਂ ਨੀ ਫਿਰ ਵੀ ਛਾਂ ਰਹਿੰਦੀ ਸੀ ਇਸ ਵਾਰ ਘਰ ਗਿਆ ਦੇਖਿਆ ਇਕ ਰੁੱਖ ਨਹੀ ਸੀ ..

ਦੇਖ ਰਿਹਾ
ਖੰਘਦੀ ਮਾਂ
ਘਟਦੀ ਛਾਂ

ਬਲਵਿੰਦਰ ਸਿੰਘ

ਚੰਨ

ਈਦ ਦਾ ਚੰਨ ~
ਤਸਵੀਰ ‘ਚ ਉਸਦਾ 
ਹੱਸਦਾ ਚੇਹਰਾ

ਸਰਬਜੀਤ ਸਿੰਘ ਖਹਿਰਾ

ਤਸਵੀਰ

ਤਿੱਤਲੀ ਆ ਬੈਠੀ
ਇੱਕਲੋਤੇ ਫੁੱਲ ਉੱਪਰ
ਪਰੀਪੂਰਨ ਤਸਵੀਰ

ਦਲਵੀਰ ਗਿੱਲ

ਲੱਡੂ

ਵਿਆਹ ਸੰਪੰਨ–
ਕਿੱਲੋ ਦੇ ਵੱਟੇ ਨਾਲ ਜੋਖੇ 
ਹੱਥੀਂ ਵੱਟੇ ਲੱਡੂ

ਜੜ੍ਹਾਂ

ਪੰਛੀ ਦੀ ਬਿੱਠ-
ਪਹਾੜ ‘ਚ ਤਰੇੜ ਪਾਈ
ਪਿੱਪਲ ਦੀਆ ਜੜ੍ਹਾਂ

ਰਾਜਿੰਦਰ ਸਿੰਘ ਘੁੱਮਣ

ਚੰਨ

ਈਦ ਦਾ ਚੰਨ
ਅੱਖਾ ਦੇ ਵਿੱਚ ਉਡੀਕ
ਮਾਹੀ ਪਰਦੇਸ
……………
ਈਦ ਦਾ ਚੰਨ
ਮਾਹੀ ਵਿੱਚ ਪਰਦੇਸ
ਉਡੀਕਣ ਅੱਖਾ

ਪੁਸ਼ਪਿੰਦਰ ਸਿੰਘ ਪੰਛੀ

ਰਿਹਾੜ

ਵੱਡਾ ਘਰ–
ਸਜਾਵਟ ਵਾਲੇ ਫਲ ਦੇਖ 
ਬੱਚਾ ਕਰੇ ਰਿਹਾੜ

ਜਗਰਾਜ ਸਿੰਘ ਨਾਰਵੇ

ਫੁਹਾਰ

ਭਾਦੋਂ ਦੀ ਫੁਹਾਰ –
ਚਲਦੀ ਕਾਰ ਚੋਂ ਦਿਤੀ 
ਬੱਚੀ ਨੇ ਮੁਸਕਾਨ

ਸਰਬਜੀਤ ਸਿੰਘ ਖਹਿਰਾ

ਹਾਉੱਕਾ

ਤੁਰੀ ਰੇਲ ਗੱਡੀ-
ਅਫਗਾਨੀ ਔਰਤ, ਭਰਿਆ ਲੰਬਾ ਹਾਉੱਕਾ
ਹੱਥ ਛਾਤੀ ਤੇ

The rail coach steams off-
an Afghan woman sighs deep
her hand on chest

ਧੀਦੋ ਗਿੱਲ

ਈਦ

ਮਸੀਤ ਦੇ ਬਾਹਰ 
ਗਲ ਲਗ ਕਹੇ 
ਈਦ ਮੁਬਾਰਕ

ਸਹਿਜਪ੍ਰੀਤ ਮਾਂਗਟ

ਛਰਾਟੇ

ਭਾਦੋਂ ਦੇ ਛਰਾਟੇ 
ਵਾਛੜ ਨਾਲ ਆਵੇ 
ਮਿੱਟੀ ਦੀ ਮਹਿਕ

ਸਹਿਜਪ੍ਰੀਤ ਮਾਂਗਟ

ਮੀਢੀਆਂ

ਸੱਤਰੰਗੀ ਪੀਂਘ
ਫੁੱਲਾਂ ਲਾਗੇ ਬੈਠੀ ਗੁੰਦੇ
ਧੀ ਦੀਆਂ ਮੀਢੀਆਂ

ਅਮਨਪ੍ਰੀਤ ਪੰਨੂ

ਬੱਦਲੀ

ਜੇਠ ਦੀ ਦੁਪਹਿਰ…
ਨੀਮ ਸਲੇਟੀ ਬੱਦਲੀ ਓਹਲੇ
ਸੂਰਜ ਦੀ ਕੰਨੀ

ਗੁਰਮੀਤ ਸੰਧੂ

ਬੂਹਾ

ਬੂਹਾ ਵਜਿਆ 
ਨਾਲੇ ਧਕ ਧਕ ਦਿਲ 
ਕੋਈ ਵੀ ਨਾ 

ਸੈਮ ਬਾਜਵਾ

ਪਾਰਕ

ਸਾਉਣ ਮਹੀਨਾਂ
ਕੱਚੀਆਂ ਛੱਤਾਂ ਬਣੀਆਂ
ਗਰੀਨ ਪਾਰਕ

ਹਰਵਿੰਦਰ ਤਤਲਾ

ਬੱਦਲ

ਜਲ-ਧਾਰਾ
ਮਲਾਹ ਵੇਖੇ ਕਾਲੇ ਬੱਦਲ
ਕੰਢਿਆਂ ਵਿਚਾਲੇ ਫੈਲੇ

ਕੁਲਜੀਤ ਮਾਨ

ਰੋਸ਼ਨੀ

ਛਿਪਦਾ ਸੂਰਜ –
ਪੈਂਦੀ ਪੱਤਣ ਉੱਤੇ 
ਸੰਧੂਰੀ ਰੋਸ਼ਨੀ

ਬੰਟੀ ਵਾਲੀਆ