ਮਿੱਟੀ

ਪਿੰਡ ਦਾ ਛੱਪੜ
ਮਿਹਕੇ ਹੱਥਾਂ ਚੋਂ 
ਚੀਕਣੀ ਮਿੱਟੀ

ਨਿਰਮਲ ਸਿੰਘ ਧੌਂਸੀ

ਡਾਕ

ਕੰਮ ਤੋਂ ਆਇਆ
ਚੇਕ ਕਰੇ ਨੋਟੀਫਕੈਸ਼ਨ 
ਡਾਕ ਪਈ ਇੱਕ ਪਾਸੇ

ਸੰਜੇ ਸਨਨ

ਖਤ

ਤੇਜ਼ ਹਨੇਰੀ
ਹੱਥਾਂ ਚੋਂ ਓੁਡਿਆ ਓੁਹਦਾ ਖਤ
ਬਨੇਰੇ ਤੋਂ ਕਾਂ

ਲਵਤਾਰ ਸਿੰਘ

ਮਾਲਕੌਂਸ

ਹਾੜ ਦੀ ਰਾਤ 
ਮਾਲਕੌਂਸ ਦੇ ਸੁਰ ‘ਚ 
ਵਗੀ ਹਵਾ

ਸਰਬਜੋਤ ਸਿੰਘ ਬਹਿਲ

ਵਰਕਾ

ਵਰ੍ਹਿਆਂ ਬਾਅਦ 
ਖੋਲੀ ਕਿਤਾਬ 
ਉਹੀ ਮੁੜਿਆ ਵਰਕਾ

ਅਰਵਿੰਦਰ ਕੌਰ

ਪਰਛਾਂਵੇ

ਢਲਦਾ ਦਿਨ
ਰੁਖਾਂ ਦੇ ਪਰਛਾਂਵੇ
ਹੋ ਰਹੇ ਲੰਬੇ

ਰਿਦਮ ਕੌਰ

ਪੱਖੀ

ਤਪਦਾ ਹਾੜ- 
ਬੈਠਕ ‘ਚ ਬੈਠਾ ਪੱਖੀ ਝੱਲੇ 
ਕੰਧ ‘ਤੇ ਟੰਗੇ ਪਹਾੜ

ਸੰਜੇ ਸਨਨ

ਮਿਠਾਸ

ਮਿਠਾਸ–
ਅੰਬ ਦਾ ਰੁੱਖ ‘ਤੇ 
ਕੋਇਲ ਦਾ ਗੀਤ

ਜਸਦੀਪ ਸਿੰਘ

ਬੋਟ

ਮਾਂ ਗਵਾਹ-
ਬੋਟ ਦੀ ਪਹਿਲੀ ਉੜਾਨ
ਇੱਥੇ ਤੋਂ ੳੇੱਥੇ

mom witness-
baby bird’s first flight
here to there

ਸਰਬਜੀਤ ਸਿੰਘ ਖਹਿਰਾ

ਦੀਪਕ

ਮਸਿਆ ਦੀ ਰਾਤ 
ਪੀਰ ਦੀ ਦਰਗਾਹ ਤੇ ਜਗਦਾ
ਚੌਮੁਖੀਆ ਦੀਪਕ

ਪ੍ਰੇਮ ਮੈਨਨ

ਦੀਵਾ

ਸੰਘਣੀ ਧੁੰਦ
ਦੀਵਾ ਟਿਮਟਿਮਾਵੇ
ਟਿੱਲੇ ‘ਤੇ

ਇੰਦਰਜੀਤ ਸਿੰਘ ਪੁਰੇਵਾਲ

ਖੰਭ

ਕਣੀਆਂ ਦੀ ਭੂਰ 
ਨਹਾਉਂਦੇ ਗੋਲਿਆਂ ਦੇ 
ਖੰਭਾਂ ਦੀ ਫੜ ਫੜ

ਉਂਕਾਰ ਸਿੱਧੂ

ਬੂੰਦ

ਸੰਘਣੀ ਧੁੰਦ 
ਪਹਿਲੀ ਕਿਰਨੇ ਸਿਰਕ ਤੁਰੀ 
ਇੱਕ ਪੱਤੇ ਤੇ ਬੂੰਦ

ਨਿਰਮਲ ਸਿੰਘ ਧੌਂਸੀ

ਹੰਝੂ

ਸਾਗਰ ਕਿਨਾਰਾ
ਰੇਤ ਚ ਸਮਾਇਆ
ਉਹਦਾ ਹੰਝੂ

ਤੇਜੀ ਬੇਨੀਪਾਲ

ਛਾਂ

ਤਪਦੀ ਦੁਪਹਿਰ
ਵਾਵਰੋਲੇ ‘ਚ ਉੱਡਦੀ ਮਿੱਟੀ
ਕਰ ਗਈ ਛਾਂ

ਰਾਜਿੰਦਰ ਸਿੰਘ ਘੁੰਮਣ 

ਜੁਗਨੂੰ

ਹਾੜ ਦੀ ਮੱਸਿਆ
ਰੁੱਖੋਂ ‘ਤਾਂਹ ਤਾਰੇ ਚਮਕਣ
ਪੱਤਿਆਂ ਵਿਚ ਜੁਗਨੂੰ

ਗੁਰਮੀਤ ਸੰਧੂ 

ਕੇਸ

ਢਲਦੀ ਸ਼ਾਮ-
ਹਵਾ ਉਡਾਵੇ ਸੁਕੇ ਪੱਤੇ
ਤੇ ਰੁਖੇ ਕੇਸ

ਮਨਦੀਪ ਮਾਨ

ਧਰਘੋਨਿਆਂ

ਹਿੱਲੀ ਧਰੇਕ
ਹੋ ਪਈ ਬਾਰਿਸ਼
ਧਰਘੋਨਿਆਂ ਦੀ

ਹਰਵਿੰਦਰ ਤਤਲਾ

ਝੋਨਾ

ਤੱਤਾ ਪਾਣੀ
ਧੁੱਪੇ ਲੂ ‘ਚ ਝੋਨਾ ਰੋਪੇ
ਪਰਦੇਸੀ ਢਾਣੀ

ਚਰਨ ਗਿੱਲ

 

ਕੂਕ

ਪੱਕਣ ਅੰਬ 
ਹੋਰ ਮਿੱਠੀ ਹੋ ਰਹੀ 
ਕੋਯਲ ਦੀ ਕੂਕ

ਸੰਜੇ ਸਨਨ

ਈਜ਼ਲ

ਪੱਤਝੜ-ਚਿੱਤਰ
ਮੇਰੇ ਈਜ਼ਲ ‘ਤੇ ਟਿਕਿਆ
ਦਿਆਰ ਦਾ ਪੱਤਾ

Fall-landscape
a maple leaf settles
on my easel

ਅਮਰਾਓ ਸਿੰਘ ਗਿੱਲ

ਲਾਲਟੈਣ

ਤੇਜ਼ ਹਵਾ- 
ਲਾਲਟੈਣ ਦੀ ਬੱਤੀ ਫਰਕੇ 
ਹਿੱਲਣ ਪਰਛਾਂਵੇ

ਰਘਬੀਰ ਦੇਵਗਨ

ਤਿੱਤਲੀ

ਮੈਂ ਚਿੱਤੇਰਾਂ ਫੁੱਲ
ਕੈਨਵਸ ਦੁਆਲੇ ਘੁੰਮੇ
ਇੱਕ ਤਿੱਤਲੀ

I paint flowers
a butterfly wanders
around the canvas

ਅਮਰਾਓ ਸਿੰਘ ਗਿੱਲ

ਤਰਲ

ਤੱਤੀ ‘ਵਾ 
ਨਦੀ ਦੇ ਤਲ ‘ਤੇ ਵਹਿ ਰਿਹਾ 
ਕਾਰਖਾਨਿਆਂ ਦਾ ਤਰਲ

ਰਣਜੀਤ ਸਿੰਘ ਸਰਾ

ਵਿੱਲੋ

ਪਿਤਰ-ਦਿਵਸ –
ਮੈਂ ਚੁੰਮਾ ਵੀਪਿੰਗ-ਵਿੱਲੋ
ਪੋੱਤੇ ਦੀ ਯਾਦ

 fathers day –
memories of my grandson
I hug weeping-willow

ਅਮਰਾਓ ਸਿੰਘ ਗਿੱਲ 

ਬਾਲੜੀ

ਤਪਦੀ ਦੁਪਹਿਰ
ਸਹਿਮੀ ਸਹਿਮੀ ਚੁਗਦੀ ਡੱਕੇ
ਪੋਲੀਉ ਮਾਰੀ ਬਾਲੜੀ

ਚਰਨ ਗਿੱਲ

ਕੋਇਲ

ਧੀ ਨੇ ਟੁਰਨਾ 
ਸਵੇਰ ਤੋਂ ਕੂਕ ਰਹੀ ਕੋਇਲ 
ਸਿਲੀ ਵਾ

ਅਰਵਿੰਦਰ ਕੌਰ

ਝਲਕ

ਵਗਦਾ ਦਰਿਆ —
ਓਹਦੇ ਮੁਖ ਦੀ ਝਲਕ ਨਾਲ 
ਰੰਗਲਾ ਹੋਇਆ ਪਾਣੀ

ਅਰਵਿੰਦਰ ਕੌਰ

ਨਿੱਛ

ਨਿੱਛ-
ਪਾਣੀ ਵਾਲੇ ਕੂੰਡੇ ਤੇ
ਚਿੜੀਆ ਅਲੋਪ

ਰਘਬੀਰ ਦੇਵਗਨ

ਚਿੱਠੀ

ਹੁਨਾਲੇ ਦਾ ਮੀਂਹ-
ਇਕ ਚਿੱਠੀ ਆਈ
ਭਿੱਜੀ ਹੋਈ

ਰਘਬੀਰ ਦੇਵਗਨ

ਖੂੰਡੀ

ਫੁੱਲਾਂ ਨਾਲ ਫੋਟੋ-
ਬੂਟੇ ਉਹਲੇ ਲਕੋ ਰਿਹਾ
ਐਨਕ ਅਤੇ ਖੂੰਡੀ

ਗੁਰਮੀਤ ਸੰਧੂ

ਫੁੱਲ

ਤਾਰਿਆ ਭਰੀ ਰਾਤ
ਮਹਿਬੂਬ ਦੇ ਕੇਸਾਂ ਚ ਟੁੰਗੇ
ਗੁਲਾਬ ਦਾ ਫੁੱਲ

ਤੇਜੀ ਬੇਨੀਪਾਲ

ਨਮੀ

ਤਪਦੀ ਦੁਪਿਹਰ
ਹਵਾ ਦੇ ਬੁੱਲੇ ਨਾਲ ਸੁੱਕੀ
ਅੱਖ ਦੀ ਨਮੀ

ਦੀਪੀ ਸੈਰ

ਉਲਝਾਅ

ਬੁੱਢਾ ਸਾਧੂ
ਸਟੇਸ਼ਨ ਤੇ ਬੈਠਾ ਦੇਖੇ 
ਪਟੜੀਆਂ ਦੇ ਉਲਝਾਅ

ਨਵਦੀਪ ਗਰੇਵਾਲ

ਕਣ

ਸਾਗਰ ਕੰਢਾ
ਰੇਤ ਦਾ ਇੱਕ ਕਣ
ਬਹੁਤ ਚਮਕੇ

ਰਘਬੀਰ ਦੇਵਗਨ

ਪੀਂਘ

ਪਹਿਲੀ ਬਾਰਿਸ਼ 
ਸਤਰੰਗੀ ਪੀਂਘ ਦੇ ਰੰਗ 
ਝਲਕਣ ਧਰਤੀ ਤੇ

ਅਰਵਿੰਦਰ ਕੌਰ

ਚਿੜੀਆਂ

ਸਰਘੀ ਵੇਲਾ-
ਦਿਲ ਟੁੰਬ ਰਹੇ
ਚਿੜੀਆਂ ਦੇ ਬੋਲ

ਸੰਦੀਪ ਕੌਰ 

ਚੰਨ

ਪੂਰਨਮਾਸ਼ੀ-
ਉਸਦੀ ਗੱਲੀ ਲੰਗਦਿਆਂ 
ਦਿਸਿਆ ਚੰਨ

ਮਨਦੀਪ ਮਾਨ

ਤਿੱਤਲੀ

ਢਲੀ ਦੁਪਹਿਰ
ਤਿੱਤਲੀ ਘੁੰਮੇ
ਮੁਰਝਾਏ ਫੁੱਲ ਤੇ

ਤੇਜੀ ਬੇਨੀਪਾਲ 

ਮੂਰਤਾਂ

ਬੱਦਲਾਂ ਚ ..
ਉਕਰੀਆਂ ਮੂਰਤਾਂ
ਸ਼ਕਲਾ ਮਿਲਾਵੇ

ਮਨਦੀਪ ਸਿੱਧੂ

ਘਾਹ

ਸੁੰਨਾ ਘਰ 
ਢੱਠਦੀ ਛੱਤ ਤੇ ਉੱਗਿਆ 
ਹਰਾ ਘਾਹ

ਪ੍ਰੇਮ ਮੈਨਨ

ਖੰਡਰ

ਘਰ ਖੰਡਰ
ਢੱਠੀਆਂ ਕੰਧਾਂ’ ਤੇ ਉੱਗੇ 
ਬੋਹੜ ਪਿੱਪਲ

ਜਗਦੀਪ ਸਿੰਘ

ਪੌਣ

ਵਗੀ ਠੰਡੀ ਠੰਡੀ ਪੌਣ
ਐਨੀ ਗਰਮੀ ਬਾਅਦ ਸਵੇਰੇ –
ਕੋਇਲੇ ਨਾ ਜਗਾ ਗਾ ਕੇ

ਦਰਬਾਰਾ ਸਿੰਘ

ਬੂਟਾ

ਕੜਕਦੀ ਧੁੱਪ
ਕੁਮਲਾਏ ਰੁੱਖ ਛਾਵੇ 
ਪੁੰਗਰਦਾ ਬੂਟਾ

ਨਵਦੀਪ ਗਰੇਵਾਲ

ਪਰਦੇਸੀ

ਹਾਕ ਮਾਰ ਪਰਦੇਸੀ 
ਪੂਛੇ ਪਤਾ ਅੰਗਰੇਜ਼ੀ ਵਿੱਚ
ਹਿੰਦੀ ‘ਚ ਦੱਸੇ ਦੇਸੀ

ਸੰਜੇ ਸਨਨ

ਦਾੜੀ

ਸਮਸਾਨਘਾਟ
ਘੁਸਰ-ਮੁਸਰ ਕਰਦਿਆਂ ਹਿੱਲੀ
ਬਜੁਰਗ ਦੀ ਦਾੜੀ

ਰਾਜਿੰਦਰ ਸਿੰਘ ਘੁੱਮਣ

ਹੰਝੂ

ਹਾੜ ਦੀ ਦਿਹਾੜੀ
ਹੋਰ ਸਲੂਣਾ ਹੋ ਗਿਆ
ਮੁੜਕੇ ਨਾਲ ਹੰਝੂ

ਸਰਬਜੋਤ ਸਿੰਘ ਬਹਿਲ

ਵੰਝਲੀ

ਖਾਲੀ ਗਲੀ- 
ਹਵਾ ਨਾਲ ਆਵੇ 
ਵੰਝਲੀ ਦੀ ਧੁਨ

ਰਘਬੀਰ ਦੇਵਗਨ

ਹੰਝੂ

ਭਿੱਜਿਆ ਸਿਰਹਾਣਾ –
ਪਾਸਾ ਪਰਤਦਿਆਂ
ਡੁੱਲਿਆ ਹੰਝੂ

ਅਰਵਿੰਦਰ ਕੌਰ

ਟੋਕਰੀ

ਬਾਗ ‘ਚ ਰੌਣਕ
ਮਾਲਣ ਦੀ ਢਾਕ ‘ਤੇ
ਫੁੱਲਾਂ ਭਰੀ ਟੋਕਰੀ

ਜਗਰਾਜ ਸਿੰਘ ਨਾਰਵੇ

ਗਾਲਾਂ

ਨੰਗੇ ਪੈਰੀਂ
ਦੇਵੇ ਪਿੱਪਲ ਨੂੰ ਪਾਣੀ
ਭਿਖਾਰੀ ਨੂੰ ਗਾਲਾਂ

ਲਵਤਾਰ ਸਿੰਘ

ਪਰਨਾ

ਹਾੜ੍ਹ ਦਾ ਦੁਪਹਿਰਾ
ਸਿਰ ਤੇ ਗਿੱਲਾ ਪਰਨਾ
ਜਾਵੇ ਡੰਡੀਉ ਡੰਡੀ

ਤੇਜੀ ਬੇਨੀਪਾਲ

ਮੁਹਾਜਰ

ਰਾਤ ਦੀ ਸ਼ਿਫਟ 
ਖੱਡੀ ਦੀ ਖੜਤਾਲ ‘ਤੇ 
ਮੁਹਾਜਰ ਗਾਵੇ ਛੱਲਾ

ਸਰਬਜੋਤ ਸਿੰਘ ਬਹਿਲ

ਪਛੋਂ

ਇੱਕ ਵਾਰ ਫੇਰ
ਡਿਗਣ ਫੁੱਲ ਪੱਤੀਆਂ –
ਪਛੋਂ ਦੀ ਵਾ

Once more
the flower petals fall-
west wind

ਅਰਵਿੰਦਰ ਕੌਰ

ਕਿਸ਼ਤ

ਸਿਖਰ ਦੁਹਿਹਰਾ –
ਸਾਈਕਲ ‘ਤੇ ਭਰਨ ਆਇਆ
ਕਾਰ ਲੋਨ ਦੀ ਕਿਸ਼ਤ

ਗੁਰਪ੍ਰੀਤ ਸਿੰਘ ਢਿੱਲੋ 

ਧਾਰਾ

ਪਾਰਕ ਪੈਣ ਫੁਹਾਰਾਂ – 
ਬੱਚੀ ਫੜਣ ਲੱਗੀ
ਪਾਣੀ ਦੀਆਂ ਧਾਰਾ

ਅਮਰਜੀਤ ਸਾਥੀ

ਰੋੜੇ

ਬੇਰੀ ਹੇਠੋਂ 
ਬੁੜ ਬੁੜ ਕਰਦੀ ਬੇਬੇ 
ਚੱਕ ਰਹੀ ਰੋੜੇ

ਜਗਰਾਜ ਸਿੰਘ ਨਾਰਵੇ

ਪਤੀਲਾ

ਚੁੱਲ੍ਹੇ ਤੋਂ ਪਤੀਲਾ 
ਪੂਰੇ ਜੋਰ ਨਾਲ ਚੱਕਿਆ 
ਓਏ ! ਖਾਲੀ ਹੀ ਸੀ

ਜਗਰਾਜ ਸਿੰਘ ਨਾਰਵੇ

ਬੇਰੀ

ਚੱਲੇ ਹਵਾ
ਮੁੰਹ ਤੇ ਆਵੇ ਧੁਪ ਛਾਂ
ਬੇਰੀ ਥੱਲੇ

ਪੁਸ਼ਪਿੰਦਰ ਸਿੰਘ ਪੰਛੀ 

ਪਸੀਨਾ

ਢਲਦਾ ਸੂਰਜ
ਤਿਓੜੀਆਂ ਚ ਫਸਿਆ ਪਸੀਨਾ
ਢਲਦੀ ਉਮਰ

ਸਾਬੀ ਨਾਹਲ