ਗੰਢ

ਹਲਦੀ ਲੱਗੀ

ਰਾਜੇ ਹੱਥ ਜਾ ਰਹੀ

ਵਿਆਹ ਦੀ ਗੰਢ

ਸੁਖਨੈਬ ਸਿੱਧੂ

ਧੂੜ

ਧੂੜ ‘ਚ ਲੁਕ ਗਈ

ਬਾਬੇ ਰੋਡੂ ਦੀ ਮਟੀ

ਨਵੀਂ ਜਪਾਨੀ ਕਾਰ

ਨਵੀ ਸਿੱਧੂ

ਚਿੱਟਾ ਪੰਛੀ

ਅਲੋਪ ਹੋ ਗਿਆ

ਬੱਦਲਾਂ ਦੀ ਝੀਥ ਵਿਚੋਂ ਦਿਸਦਾ

ਚਿੱਟਾ ਪੰਛੀ…

ਕੁਲਜੀਤ ਮਾਨ

ਦੇਹਲ਼ੀ

ਝੱਖੜ ਨਾਲ

ਆਈ ਵਾਛੜ…

ਦੇਹਲੀ ਵੱਜੀ

ਜਗਦੀਸ਼ ਕੌਰ

ਗਿੱਧਾਂ

ਪਤਿਓਂ ਸੱਖਣਾ

ਸੁੱਕਾ ਰੁੱਖ…

ਗਿੱਧਾਂ  ਦਾ ਵਸੇਰਾ

ਰੇਸ਼ਮ ਸਿੰਘ ਸਾਹਦਰਾ

ਪ੍ਰਮਾਣ-ਪੱਤਰ

ਇੰਟਰਵਿਊ ਦੇ ਕੇ 

ਘਸੇ ਪ੍ਰਮਾਣ-ਪੱਤਰ ਹੱਥ ਚ 

ਮੁੜ ਰਿਹਾ ਘਰ

ਰਾਜਿੰਦਰ ਸਿੰਘ ਘੁੱਮਣ

ਭੱਠੀ ਵਾਲੀ

ਯਾਦ ਆਈ-

ਪ੍ਰਦੇਸੀ ਵਿਹੜੇ ਪੱਤੇ ਹੂੰਝਦਿਆਂ

ਭੱਠੀ ਵਾਲੀ ਨਾਮ੍ਹੋ

ਗੁਰਮੀਤ ਸੰਧੂ

ਗੁੜ

ਬਾਬਾ ਚੰਡੇ ਗੁੜ

ਪੋਤਾ ਉਡੀਕੇ ਖਾਣ ਨੂੰ 

ਡੱਕਾ ਫੜ ਹਥ ਵਿਚ

ਸਹਿਜਪ੍ਰੀਤ ਮਾਂਗਟ

ਹੂਟਰ

ਢਲ਼ਦੀ ਸ਼ਾਮ…

ਹੂਟਰ ਵਜਾਂਦੀ ਜਾਵੇ

ਸ਼ਮਸ਼ਾਨ ਘਾਟ ਦੀ ਗੱਡੀ

ਸੁਰਿੰਦਰ ਸਪੇਰਾ 

ਆਲ੍ਹਣਾ

ਸੁੱਕੇ ਰੁੱਖ ਤੇ

ਟੁੱਟਿਆ ਆਲ੍ਹਣਾ

ਤੀਲਾ ਤੀਲਾ ਡਿੱਗੇ

ਹਰਿੰਦਰ ਅਨਜਾਣ

ਉਡੀਕ

ਸਿਲ੍ਹੀਆਂ ਅੱਖਾਂ

ਚੀਰੇ ਵਾਲੇ ਦੀ ਉਡੀਕ

ਰਾਹ ਦੂਰ ਤੱਕ ਸੁੱਨਾਂ

ਮਨਦੀਪ ਮਾਨ

ਜਾਮ

ਛਲਕ ਰਹੇ 

ਡਰਾਇੰਗ-ਰੂਮ ‘ਚ ਜਾਮ

ਰਸੋਈ ‘ਚ ਹੰਝੂ…

ਰਾਜਿੰਦਰ ਸਿੰਘ

ਖੁੱਦੋ

ਘਰ ਦੀ ਸਫਾਈ…

ਮਿਲੀ ਮਾਂ ਦੀ ਸੰਦੂਕੜੀ ‘ਚੋਂ

ਬਚਪਨ ਦੀ ਖੁੱਦੋ

ਸੁਵੇਗ ਦਿਓਲ

ਬੱਦਲ਼

ਕੱਤੇ ਦੀ ਦੁਪਹਿਰ 

ਚਿੱਟੇ ਬੱਦਲ਼ਾਂ ਝਰੀਟਿਆ 

ਨੀਲਾ ਅੰਬਰ 

ਰਣਜੀਤ ਸਿੰਘ ਸਰਾ

ਰੇਤ-ਘੜੀ

ਕਿਰਦਾ ਵੇਖ ਰਿਹਾ

ਇੱਕ ਇੱਕ ਪਲ

ਜ਼ੈਲਦਾਰ ਪਰਗਟ ਸਿੰਘ

ਭੂੰਡ

ਸਰਦ ਸਵੇਰ…

ਮਾਂ ਥੱਲੇ ਪਾਥੀਆਂ

ਬੱਚਾ ਡਰੇ ਭੁੰਡਾਂ ਤੋਂ

ਰਾਹੁਲ ਕਟਾਹਰੀ

ਜੁਲਫ ਰੇਸ਼ਮੀ

ਮੱਥਾ ਟੇਕਦੀ ਦਾ 

ਪੱਲਾ ਖਿਸਕੇ

ਅਰਵਿੰਦਰ ਕੌਰ

ਪਹਾੜ ‘ਤੇ ਕੀੜੀ

ਖੜਾ ਤੱਕੇ
ਪਹਾੜ ਦੇ ਪੈਰਾਂ ‘ਚ
ਕੀੜੀ ਉਪਰ ਚੜਦੀ

ਇੰਦਰਜੀਤ ਸਿੰਘ ਪੁਰੇਵਾਲ

ਹੰਝੂ

ਨੈਣਾਂ ‘ਚ ਹੰਝੂ

ਬਰਸਾਤ ਦਾ ਮੌਸਮ

ਕੱਲੀ ਖੜ੍ਹੀ ਵੇਖੇ

ਅਵੀ ਜਸਵਾਲ

ਕੱਚੇ ਕੋਠੇ ਦੀਵਾ

ਚੰਨ ਦੇ ਕੋਲ
ਇੱਕ ਤਾਰਾ
ਕੱਚੇ ਕੋਠੇ ਦੀਵਾ ਜਗੇ

ਤੇਜੀ ਬੈਨੀਪਾਲ

ਖਾਲੀ ਠੂਠਾ

ਖਾਲੀ ਠੂਠਾ
ਭਰੀਆਂ ਅੱਖਾਂ
ਮੂੰਹ ‘ਚ ਅੰਗੂਠਾ

ਸਰਬਜੋਤ ਸਿੰਘ ਬਹਿਲ